Read Siyin Chin Romete 12 Bible Online

Romete 12 - Siyin Chin bible

Romete 12

¹Tua ahikom suapuite awng, Pathian ii a lian mama hong hesuakna hu in hi bangin note tungah kong ngen hi; noma le noma Pathian tungah a hingtang biakpiakna in kinei tavun a, ama ii dik a sak naseam tu in na ki aap tavun. Na piak tu uh biakna maan sia hisia ahi hi.

²Hi leitung pianzia zil in na om heak vun a, na thinsung uh kikhealthiangna taw Pathian in na sungsang uh panin na puuathaksak sitset vun. Tua hile a pha, dik a sak kicing a sak Pathian ii deinate na he tu uh hi.

³Tuaciang Pathian ii thuthiamna letsong hong piak hu in, note theampo tungah hi bangin kong ci hi: Noma le noma a kilawm za sangin a saangzaw in na kingaisun heak vun. Tua hi ngawl zaw in, na khua ngaisutna sungah na hina bangin kingaisun tavun, tuaciangin mihing sim in Pathian piak upna za taw khat tek kisitna nei tahen.

⁴Ih pumpi sungah na tam mama om hi, tuaciang hi nate in sepna tuatuam tek nei uh hi.

⁵Tuasia bangma in eite mihing tam ih hi hangin Christ sungah kipawlin pumkhat ih hi hi. Khat le khat pumpi sung nate bangin ih kizom hi.

⁶Tua ahikom ih saan letsong tuatuamte Pathian ii hong piak thuthiamna taw kizui in ih zangh tu hi. Ih letsong sia Pathian thupuakte son natu ahile upna ih neiza ciaciang taw ih son tu hi.

⁷Sepsak natu ahile zong ih sepsak tu hi. Hil natu ahile zong ih hil tu hi.

⁸Ngual hanthot natu ahile tuabang ma in ih seam tu hi. A neisa ngual a hawmte in ngo takin hawm tu hi. Thuneina neite in nasep hanciam tahen a, ngual tungah cikna le thiamna a zanghte in maitai takin zangh tu hi.

⁹Ki itna in thin tak ahi tu thupi hi. A sia theampo ensan vun a, a pha ci theampo keamcing tavun.

¹⁰Khat le khat Tapidaw unau khat bangin ki it in, khat le khat kizatak vawt vun.

¹¹Nasep hanciam vun a, datham heak vun. Thinsung bup kipiakna taw Topa atu seam vun.

¹²Na lametna in hong lungdamsak tahen a, ngim ngana sungah thinsau tavun. Tuaciang a tawntungin thungen tavun.

¹³Na neisa uhte na suapui a cimaw na Tapidaw puite hawm vun a, khualmite zindo tavun.

¹⁴Hong vawtsiate thupha a saan natu in Pathian munah thungetsak vun — hi hi, Pathian in haamsiat ngawlin thupha a piak natu ngen vun.

¹⁵A lungdamte taw na lungdam khawm vun a, a kapte taw na kap khawm vun.

¹⁶A kuama theampo atu a kibangin thinbotna na nei vun. Kiphasak heak vun a, nasep a niamte zongh seam thada heak vun. Noma le noma ciim kisa heak vun.

¹⁷A sia in hong vawt a om le a sia taw thuk heak vun. Mihing theampo ii pha hi ci in a ngaisutte sep tu hanciam vun.

¹⁸Mihing theampo taw kilem a na nuntak thei natu in, noma sang panin na vawt thei theampo na vawt vun.

¹⁹Lawmte awng, phu kilam heak vun. Pathian thin uukna ii a sep tu in koi zaw vun. Banghang ziam cile laithiangtho in, “Phu ka lam tu a, ka thuk kik tu hi, Topa in ci hi,” ci hi.

²⁰Laithiangtho ii ci bangma in phulam luangin, “Na ngalpa a ngil a kial le an na vaak in, a dang a ko le a dawn tu khat na pia in, banghang ziam cile hi bangin na sep hu in, a maizumna in meikaang bangin kaangh tu hi.”

²¹Siatna in zosak heak vun; siatna sia phatna taw na zozaw vun.