Read Siyin Chin Romete 13 Bible Online

Romete 13 - Siyin Chin bible

Romete 13

¹Mihing khat simin ngam uk thuneite thu na ni vun, banghang ziam cile Pathian oai ngawl po kuama in thuneina nei thei ngawl hi, tua thuneite sia amate sepna san tek ah Pathian ii a koi ahi hi.

²A seam nginge lai thuneite a nalh sia in Pathian thupiak nalh suak hi; tuabangte in amate le amate tungah thukhenna a tungsak suak hi.

³Banghang ziam cile ngamukte sia mihing phate ii kiitak tu hi ngawl a, mihing ngilote ih kiitak tu hi bek hi. Thuneipa kiita ngawlin na om nuam ziam? Tua ahile na pha khat seam in, ama in hong pok tu hi,

⁴banghang ziam cile amate in Pathian naseam hi a, nangma phattuam natu in naseam hi. Ahihang ngitlona na vawt le lauthawng in, banghang ziam cile ama in daan piak theina vaang nei tatak hi. Amate sia Pathian naseam hi a, mihing ngilote tungah Pathian daan tungsak hi.

⁵Hi thu hu in thuneite thu na ni tavun — Pathian ii daan hong piak thei hang bek zongh hi ngawlin noma in khentel theina thin na nei uh hang zongh hi tahen.

⁶Hi thu hu in shia na pia vun, banghang ziam cile, tua thuneite in a kicing takin a sep uh ciangin, amate in Pathian atu seam a suak uh hi.

⁷Amate tungah na batte uh na lo vun, nangma pumpi tung pan ahizong na neisa tung pan ahizong shia cite peuma na pia vun, zatak tute na zakta vun a, upat tute na upat vun.

⁸Ki itna khat simngawl kuama tungah leei na ba heak vun. Hi bangin a ngamta te Thukham zui ahi hi.

⁹Thupiak sungah, “Na kipalngul heak vun; mihing na that heak vun; na nguta heak vun; midangte neisa dungawk thin na nei heak vun,” hite theampo le a dangte sia, “Na innpaamte nangma na ki it bangin na it in,” ci thukham in huam siat hi.

¹⁰Ki itna in a innpaamte tungah, a ngamta khial ngei buatu hi; tua ahikom ki itna in Thukham buppi nitna ahi hi.

¹¹Hisia na vawt uh kul hi, banghang ziam cile, na mutna uh panin, na khanlaw natu a hun cing zo hi, ci in na he uh hi. Ih upciil lai sangin tu in ih kingup natu naizaw zo hi.

¹²Zan hun bo dek zo a, sun hun hong theng dektak zo hi. Khuazing taw a kisai nate ih sepna panin tawp tawng; khuavak sungah kidona ngalvanhte zamh tawng.

¹³Sun khuavak sungah a teangte bangin, eite a kilawmin ih ngamta tu hi — Lawplaina, zukhamna, a maizumhuai ngamtatna, kihauna tua ahibuale ki eennate ih vawt buatu hi.

¹⁴Tuate taangin Topa Jesus Christ ngalhiamte zamhin, cii le sa deina a lungkimsak thei lungngulnate na kheal tavun.