Read Siyin Chin Romete 14 Bible Online

Romete 14 - Siyin Chin bible

Romete 14

¹Note sungah upna zawngkhalte na saang vun. Ahihang amate ii aituam ngaisutnate tungtaang ah na kinial heak vun.

²Mihing khat in a upna hu in, neak thei theampo a ne hi, ahihang upna zawngkhal khat in nga le tee bek ne hi.

³Neak thei theampo a nepa in, tuabangin a ne ngawl pa zawngsak heak hen; tuabang ma in nga le tee te bek a nepa in a sik theampo a nepa sit heak hen, banghang ziam cile Pathian in ama zongh saang zo hi.

⁴Ngualdang khat ii naseamte a sit tu in nang in bang thu nei ni ziam? Amate nasepna a zaw le a lel huvau a sit tu in a Topa om hi. Amate in zo tu hi, banghang ziam cile Topa in amate zosak tu hi.

⁵Mihing khat in ni tuam khat sia a dang nite sangin thupi zaw in ngaisun hi, tua laitakin mihing dang khat in ni theampo a kibangin ngaisun hi. Amate khat simin a thinsung uh khensat tahen.

⁶Ni tuam khat a thupi tuamin a ngaisun sia in Topa upatna taw ngaisun ahi hi; bang khat po a ne khat in Topa upatna taw ne ahi hi; banghang ziam cile ama in Pathian ii a piak an atu in lungdamko hi. Bang khat po neak tu a ten sia zongh in Topa upatna taw a ten hi a, ama zongh in Pathian tungah lungdamko hi.

⁷Eite sungah khat zongh in ama nguak atu in a nungta ih om bua a — ama nguak atu in a thi zongh ih om bua hi.

⁸Ih nungta le Topa atu a nungta ih hi a, ih thi le zong Topa atu a thi ih hi hi. Tua ahikom ih thi a ih nungta zong Topa ii neisa ih hi hi.

⁹Banghang ziam cile a thite le a nungtate ii Topa ahi natu in Christ thi a nuntakna sungah tho hi.

¹⁰Tua ahile note antee bek a nete in — na suapuite tungah banghangin thusit nu ziam — Banghangin no na theampo a nete in na suapuite zawngsak nu ziam? Eite theampo thusitna thuak tu in, Pathian mai ah ih ding tu hi.

¹¹Banghang ziam cile laithiangtho in, “A nungta Pathian ka hi bangma in, mihing theampo ka mai ah khupdin tu a, tuaciangin mihing theampo in kei sia Pathian ka hina pualaak tu uh hi, Topa in ci hi,” ci hi.

¹²Tua ahikom eite khat simin ih hi babang Pathian tungah ih pualaak tu hi.

¹³Tua ahikom khat le khat, thu ih kikhen buatu hi. Tua hi ngawl zaw in na khensat tu uh sia in hisia ahi hi. Na suapuipa lutu natu ahizong, mawna sung a pu natu ahizong bangma vawt heak vun.

¹⁴Topa Jesus taw ka kikopna panin ka heak thu khat in bang ziam cile an khat pawpo in ama nguakin a nin om ngawl hi; ahihang mihing khat in an khat nin hi ci in a um le ama atu in tua an sia nin hi.

¹⁵Bang khat po na neak uh sia in na suapuipa thin nop ngawlna a piangsak le ki itna taw ngamtatna hi nawn ngawl hi. Na neakna uh taw Christ ii thina taw a tat sa mihing khat na lalsak heak vun.

¹⁶Pha hi ci in na ngaisutte uh na zangh khial heak vun.

¹⁷Banghang ziam cile Pathian Ngam in neakna le dawnna thu hi ngawl a, Thaa Thiangtho ii piak thutang suana, thinnopna le lungdamna thu ahi hi.

¹⁸A kua po ahizong hi bang a, Christ atu nasep a seamte in Pathian lungdamsak a, mihingte in lungkim pui hi.

¹⁹Tua ahikom khat le khat atu in thinnopna le kithahatsak nate a piangsak nate na ngiim tawntung tu uh hi.

²⁰Anneak huvau taw Pathian nasepna lalsak heak vun. An theampo neak thei ahihang, mihing khat po mawna sungah a puksak tu an ne heak vun.

²¹Na suapuipa a puk natu a piangsak thei sa ahizong, sapittui ahizong, ngamtatna khat pawpo ahizong, tang le uhte ngamtatna maanbel ahi hi.

²²Hite huvau ah na upnate in nangma le Pathian kilaklaw thu ahikom na thinsung ah keam po tavun. Maan a sakte a sep ciangin a kithasung ngawl pa sia a lungdampa ahi hi.

²³Ahihang ama in a neak a dawnte tungah thinnop ngawlna a nei le, tuate a neak laitak mama in, Pathian in ama mawsak hi, banghang ziam cile ama ngamtatna in upna tungah a kibulphu bua hi. Upna a kibulphu ngawl na khat pawpo in mawna ahi hi.