Read Siyin Chin Romete 15 Bible Online

Romete 15 - Siyin Chin bible

Romete 15

¹Upna sungah a thahat eite in, upna note vanh ngit dawnin ih hu natu ahi hi. Eima nop bek ih zong buatu hi.

²Tua hi ngawlin eite khat simin ih suapuipa phattuam natu le upna sungah ih khantosak natu in, ama diksak tu in ih ngamta tu hi.

³Banghang ziam cile Christ in ama ii nop a kizui bua hi. Tuabang hi ngawlin, laithiangtho ci bangin, “No hong selnote ii hong selnona sia kei tungah hong tu hi,” a ci bangin ngual atu in nungta hi.

⁴Eite thin sauna le hanthotna tungtawn a, upna ih nei natu in, Laithiangtho sungah a ki atte theampo in eite hong hil natu a ki at ahi hi.

⁵Thuak zawkna le hanthotna ii a naak ahi Pathian in, Jesus Christ zia na zuina uh taw note sungah tuabang khua ngaisutna hong piangsak tahen.

⁶Note theampo in aw khat sa in, ih Topa Jesus Christ ii pa ahi Pathian na pok vun.

⁷Pathian minthan natu in Christ ii note hong saan bangma in, note zongh khat le khat na kisaang vun.

⁸Banghang ziam cile Pathian in thumaan a, amate ii pute pate tungah a kamciamte tungsak tu ahikom,

⁹Gentile te ngawngawn zongh in Pathian ii hesuakna a pok thei natu in Christ in Jew te naseampa suak hi kong ci hi. Laithiangtho in, “Tua ahikom Gentile te sung pan ka lungdamna nang tungah kong ko tu a, pokna la ka sa tu hi,” ci hi.

¹⁰Hi bangin ci thua hi, “Gentile te awng, Pathian ii mite taw lungdam vun!”

¹¹A ci kikna panin, “Topa pok vun, Gentile theampo awng; Pok vun, mihing theampo awng!”

¹²Isaiah zongh in, “Jesse suan khat hong piang tu a; ama in Gentile te a uk tu in hong pai tu hi, tuaciangin amate in ama ii tungah, lametna nei tu hi,” ci hi.

¹³Thaa Thiangtho thahatna taw, na lametna sungah na khanto natu in, lametna ii naak ahi Pathian in ama na upna uh hu in, lungdamna le thinnopna taw hong kidimsak tahen.

¹⁴Suapuite awng, note phatna taw kidim tu in kong um a, heakna ci theampo zongh nei in, khat le khat kihil thei tawntung tu in kong um hi.

¹⁵Ahihang kong phawksak ngei thute tungtawnin hi laithak sungah ka hangsan mama hi. Tuabangin ka han ngawpna in banghang ziam cile Pathian in hunpha hong pia a, Gentile te atu a diang tu in,

¹⁶Jesus Christ ii naseampa hong suasak hang ahi hi. Thaa Thiangtho ii a aap Gentile te, Pathian ii saan thamman biakpiakna ahi thei natu in Pathian tung panin hong pai Lungdamna Thupha hil in thiampi khat bangin ka diang hi.

¹⁷Jesus Christ taw pumkhat ka hina hangin Pathian nasep ka sepna huvau ah ka kisuangtaak thei hi.

¹⁸Gentile te ii Pathian thu a nit natu lamhil tu in Christ in kei tungtawnin na hong sepna sa hang bekin hang takin ka pau ngam hi. Tua nasepna sia kammal le ngamtatna taw hong seam zo a,

¹⁹nalamdang lakna le a lamdang nate ii vaangletna le Pathian Thaa ii vaangletna taw hong seam zo hi. Tua ahiciang Jerusalem pan Illyricum ah khualhaw in ka paina ah Christ huvau Lungdamna Thupha a cingin ka thangsak zo hi.

²⁰Ka tup ka sawm sia in, ngualdang khat po ii cian sa phungkawngte tungah inn a sa ka sua ngawl natu in Christ min a kiza ngeingawlna munte bek ah Lungdamna Thupha thansak tawntung tu ahi hi.

²¹Laithiangtho zongh in, “A thu a kihil ngeingawl mite in ama a mu tu hi, tuaciangin a za ngeingawlte in a tel tu uh hi,” ci hi.

²²Hi bangin note kungah kong pai tu tamvei ma hong kikhak zo hi.

²³Ahihang tu in hi ngamkhente sungah ka nasepte ka man zo a, kum tam mama note taw kimu tu in hong pai nuam top ka hi hu in,

²⁴tu in hong pai thei tu in ka kilamen hi. Spain ngam ah ka pai lamin note taw ka kimu nuam a, tawmvei kong taam zawkciangin, tua munah ka pai natu hong hu le uhte ka uk hi.

²⁵Ahitazong, tu laitak Jerusalem ah a om Pathian mite atu seam tu in ka pai tu hi.

²⁶Banghang ziam cile Macedonia le Achaia pawlpite in Jerusalem ah Pathian mi a cimawte huna tu sum pia tu in, amate thu in khensat zo uh hi.

²⁷Hisia amate mama ii khensat ahi hi; ahihang a tatakin ci leang amate in tua mizawngte a hu tu sia a sep tu ahi hi. Jew te in thaa lam sangah thuphate Gentile te a hop bangma, Gentile te zongh in Jew te sia a leitung neisate taw a hu kik kul hi.

²⁸Hi nasep ka man zawkciang amate atu a kikhon sumte a bup in, amate tungah ka aap zawkciang Spain ngam ah ka pai tu a, ka pai lam in kong baang tu hi.

²⁹Kong pai ciangin Christ thupha a kicing taw kong pai tu sia ka he hi.

³⁰Suapuite awng, ih Topa Jesus Christ hang le, Thaa ii hong piak itna hu in, Pathian tungah kei atu in nasia takin thu nong nget pui natu in kong thuum hi.

³¹Judea ngam thu um ngawlte khut sung pan hong kep natu le Jerusalem ah ka nasepna in Pathian ii mihingte atu a kisaang thei ahi natu in thu hong ngetsak tavun.

³²Tua hi a, lungdam in note kungah kong pai tu a, Pathian ii deina ahile, thathak laakna in note kungah kong haw tu hi.

³³Ih thinnopna ii naak ahi, Pathian in note theampo taw hong om tahen. Amen.