Read Siyin Chin Romete 16 Bible Online

Romete 16 - Siyin Chin bible

Romete 16

¹Cenchreae pawlpi ah a seam ih suapuinu Phoebe sia note tungah ka pokna kam kong thaak hi.

²Pathian ii mihingte ngamtat tu bangin Topa min taw ama na saang vun a, tuaciangin huna zongh note tung panin a kisap babang na pia vun; banghang ziam cile ama in mihing tam ma ii lawm pha hi a, kei atu zong lawm pha khat ahi hi.

³Jesus Christ sungah ka naseppui Priscilla le Aquila tungah paupuina kam ka thaak hi;

⁴Amate in kei atu in a nuntakna aitaa ngam hi; amate tungah ka lungdam hi — kei nguak bek zongh hi ngawlin, Gentile pawlpi mite theampo zongh a lungdam uh hi.

⁵Amate inn ah a kikhawm pawlpi tung zongh ah paupuina kam ka thaak hi. Asia ngamkhen pan Christ a um phitbelpa, ka it ka lawm Epaenetus tung zongh ah paupuina kam ka thaak hi.

⁶Note atu in nasia takin na a seam Mary ka paupui hi.

⁷Ka Jew mipui, kei taw thongtaak khawm Andronicus le Junia tungah paupuina kam ka thaak hi; amate sia sawltakte in pha takin a heak uh hi a, kei sangin Tapidaw a suak masazawte ahi uh hi.

⁸Topa kipawlna sungah ih seppui Ampliatus ka it ka lawm zongh ka paupui hi.

⁹Christ nasepna sungah ih seppui Urbanus le Stachys ka it ka lawmte zongh ka paupui hi.

¹⁰Apelles ka paupui hi, ama ii Christ tungah a thumaanna sia sit natu om ngawl hi. Aristobulus innkuanpuite tungah paupuina kam ka thaak hi.

¹¹Ka Jew mipui Herodion le Narcissus innkuanpuite sung Tapidaw suapuite ka paupui hi.

¹²Topa nasepna sungah a seam Tryphaena le Tryphosa luangin, Topa nasepna sungah nasia takin a seam ka it ka lawm Persis ka paupui hi.

¹³Topa nasepna sungah a kician tuamin a seam Rufus le a tapa bang tatak a hong vawt, a nu tungah paupuina kam ka thaak hi.

¹⁴Ka paupuina kam Asyncritus, Phlegon, Hermes, Patrobas le Hermas le a dang amate taw a om Christ mite ka thaak hi.

¹⁵Philologus le Julia, Nereus le a suapuinu le Olympas le amate taw a om Pathian mite theampo ka paupui siat hi.

¹⁶Khat le khat unau ki itna taw kipaupui in na kinamh vun. Christ pawlpite theampo in no hong paupui hi.

¹⁷Suapuite awng: pawl khenna piangsak a, mihingte upna a lumlette, tuaciang na saansa kihilnate a langpante encik tavun a, amate kung pan na kikeam tavun.

¹⁸Banghang ziam cile tuabangin a ngamtate in ih Topa Christ atu in a seamte hi ngawl a, amate ngilpi atu in a seamte ahi uh hi. Amate in kamneal le kisialpoknate taw bangma a he ngawl mihing pawlkhat a theam uh hi.

¹⁹Lungdamna thu tungah na thumaan uh sia a kuama po in hong he a, tua hu in note huvau in ka lungdam hi. A pha nate ah na ciim tavun a, a sia tungtaang ah na paubaang heak vun.

²⁰Tuaciang ih thinnopna ii naak ahi Pathian in Satan sia hai ngawlin na peang nuai ah siiktham tu hi. Ih Topa Jesus thuthiamna in note taw hong om tahen.

²¹Ka naseppui Timothy in hong paupui hi; tuasia bangma Lucius, Jason le Sosipater, ka Jew minampuite zongh in hong paupui hi.

²²Hi lai a atpa keima, Tertius in Tapidaw kipaupuina lai kong thaak hi.

²³A inn sia pawlpi kikhopna in a kizangh ka zintunna pa Gaius zongh in hong paupui hi; khuapi sumkeampa Erastus le ih suapui Quartus in hong paupui hi.

²⁴Ih Topa Jesus Christ ii thuthiamna note theampo taw hong om tahen.

²⁵Eite in Pathian tungah minthanna pia tawng. Jesus Christ huvau Lungdamna Thupha ka hilna bang le a bosa hun sau mama sungah a kiseal thumaan thutak hong kilak bangin Ama in na upna uh sungah kip takin na din thei natu in vawt thei hi.

²⁶Tu in ahile kamsaangte lai atna sung panin tua thumaan thutak sia a kilanghtakna ah kikoi zo hi; tuaciangin a nungta tawntung Pathian sawlna taw minam theampo in um a, a nit thei natu in amate tungah kihesak zo hi.

²⁷Ciimna namcin a nei, khatbek ahi Pathian tungah Jesus Christ tungtawnin minthanna kip tawntung tahen! Amen.