Read Siyin Chin Romete 3 Bible Online

Romete 3 - Siyin Chin bible

Romete 3

¹Tua ahile Jew te in Gentile te sangin hamphat zawkna khat po a nei ziam? Tua ahibuale vunteap atna ah bang phat tuamna om ziam?

²Phat tuamna nam tam mama om hi! a masa phitbel in Pathian in a thu a kizaaksak natu in Jew te muang phot hi.

³Ahihang hi thu huvau ah amate sungah thumaan ngawl pawlkhat om le, bang suak tu ziam? Hisia in Pathian thumaan ngawl tu hi cina hi tu ziam?

⁴Tuabang hi ngawl het hi. Mihing sim in leilot kale zong Pathian ahile a thumaan kul veve tu hi. Laithiangtho in hi bangin ci hi. “Na pau ciangin thumaan na hi hunlam kilak tu a, thu hong kisit ciangin a thu na zaw kul hi.”

⁵Ahihang eite thutang ngawl ih hina in Pathian sia thutang ahi hunlam kiciansak ahile eite in bang ih son tuan nawn tu ziam? Pathian in daan hong piak ciangin ama sia thutang ngawl hi ih ci thei ziam? (Tu a teng sia mihing ngeina bangin ka pau hi.)

⁶Hi vet ngawl hi! Pathian thutang ngawl hile bangbangin ama in leitung buppi thukhen thei tu ziam?

⁷Ahihang keima ii thumaan ngawlna in Pathian thumaanna kiciansak zaw kan a, ama ii minthanna suaksak le bangbang hi tu ziam? Tua ahile banghangin kei mawnei hi ci in hong kipuavawk lalai tu ziam?

⁸Tua ahile banghangin “Thupha pianna tu in thusia vawt tawng,” ci ngawl hi ziam? Mihing pawlkhat in tu a ka ci bangin pau hi ci in mawsiatin hong lang hi! Tuabang mihingte in a kiphu bangin puavawkna thuak tu hi.

⁹Tua ahile ei Jew te in Gentile te sangin phazaw ih hi ziam? Hi tuan ngawl hi! Ka sonsa bangma in Jew te le Gentile te sia a kibangin mawna vaangletna nuai ah om siat hi.

¹⁰Laithiangtho in, “A thumaan thutang kuama om ngawl hi.

¹¹A ciim kuama om ngawl a, Pathian a bia kuama om ngawl hi.

¹²Mihingte a vekpi in Pathian sang panin lampial zo a, amate lamkhial siat zo uh hi. A maan na a seam, kuama om ngawl a, khat bebeak zongh om ngawl hi.

¹³A kampau te in thi theina kitheamna thu taw kidim a; a leei uh panin leilot thu pusuak hi, a lauhuai tawnnate ngulnguu bangin a muk uh panin pusuak hi;

¹⁴a kam uh sia longsia khakngal taw kidim hi.

¹⁵Amate in ngual liamsua tu le a thatlum tu in palvang a,

¹⁶a paina theampo ah amate in siatna le lalna piangsak uh hi.

¹⁷Amate in kilemna lampi a he bua uh hi,

¹⁸Pathian thasia natu zongh a sin ngei bua uh hi,” ci hi.

¹⁹Leitung buppi Pathian thukhenna sungah a thet natu le mihingte kam zon theina theampo a bo thei natu in Thukham sungah thu omte theampo in Thukham khutnuai ah a omte atu ahi hunlam ka he uh hi.

²⁰Banghang ziam cile Pathian mai ah Thukham tanna hangin kuama thutang suak zo om ngawl a; Thukham nasepna in mihing khat mawnei ahi hunlam a kiheak natu ahi hi.

²¹Ahihang tu in Pathian ii mihingte thutang a suasakzia hong kipualaak zo hi. Thukham le kamsaangte lai atte in maan hi ci in tetti pang ahitazong, tuasia in thukham taw kisai ngawl hi.

²²Pathian in mihingte sia Jesus Christ a upna uh tungtawnin thutang suaksak hi. Christ a umte theampo tungah Pathian in hi bangin vawt hi, banghang ziam cile kuama a kilamdang tuatuan a om bua uh hi.

²³Mihing theampo maw siat zo a Pathian ii ngum tu in hong ompuina pan kikhuala siat uh hi.

²⁴Ahihang amate a suaktasak Jesus Christ tungtawnin, Pathian ii man piak ngawlin hong piak thuthiamna letsong taw amate thutang kisuaksak hi.

²⁵Ama ii kipumpiak biakpiak natu in hong thina taw amate upna tungtawnin, mihingte mawna kimaisakna a pian natu in, Pathian in ama hong pia hi. Pathian in thutang ahi hunlam hong lak natu in, hi bangin a vawt hi. A bosa hun sungah ama a thin uai a, mihingte mawnate hong tha thong hi; ahihang tu in ama sia, thutang ahi hunlam a kilak natu in, mihingte mawna tungtaang ah na hong seam hi. Hi bangin Pathian in ama sia thutang ahi hunlam le Jesus Christ a um peuma thutang a suasakna thu hong lak hi.

²⁷Tua ahiciang eite kisuantaak natu bang om ziam? Bangma om ngawl hi! Tua hile thutang suana in koisung pan hong piang ziam? Thukham nitna sepna pan ziam? Hi ngawl hi, upna pan bek hi.

²⁸Banghang ziam cile mihing khat sia Pathian mai ah upna tungtawn bek in thutang suak thei bek a, Thukham sawl bang a sepna pan hi ngawl hi ci in ih he hi.

²⁹Tua ahibuale Pathian sia Jew te ii Pathian hi bek ziam? Gentile te Pathian zongh hi ngawl ziam? Hi leilam hi.

³⁰Pathian sia khat hi a, Jew te zongh a upna uh tungtawnin, thutang suaksak a, Gentile te zongh a upna tungtawnin, thutang kisuaksak hi.

³¹Upna in Thukham phiat hi cinopna ahi ziam? Hi ngawl het hi; eite in Thukham ih kipsak zaw hi.