Read Siyin Chin Romete 4 Bible Online

Romete 4 - Siyin Chin bible

Romete 4

¹Tua ahile ih pianna pa ahi Abraham thuakna sa tungtaang ah bang ih son tu ziam?

²Ama ii ngamtatna tung panin Pathian in thutang suaksak ahile a kisuantaak natu nei tu hi — ahihang Pathian mai ah ama in bangma kisuantaak natu om ngawl hi.

³Laithiangtho in, “Abraham in Pathian um a, tua a upna hu in Pathian in thutang suaksak hi,” ci hi.

⁴Naseam khat in sep thaman saang hi, tua thaman sia letsong kici thei ngawl hi; a thalaw sa hi ci in kingaisun hi.

⁵Ahihang sepna hi ngawl a upna a nei sia in, mimawte maw ngawl hi a ci Pathian a up hu in, a upna sia Pathian in saang a, thutang suaksak hi.

⁶Hi thu in sepna kihel ngawl Pathian ii thutang hi ci in a saan, mihingte ii lungdamna, David ii son sia ahi hi.

⁷“Tatkhialnate kimaisak a, a mawna pan a kisuatak te bangza in a lungdam ziam!

⁸Topa ii a mawnate sazian in a teptee ngawl tu sia in mihing lungdam ahi hi!”

⁹Hi lungdamna David ii son sia vunteap atte bek atu ahi ziam? Hi ngawl hi! Vunteap at ngawlte atu zongh ahi hi. Banghang ziam cile laithiangtho sungah a ki at bangin ih sonsa hi a, “Abraham in Pathian um a, tua a upna hangin Pathian in ama thutang hi, ci in saang hi.”

¹⁰Hi thu bang hun laitakin piang ziam? Abraham vunteap a at zawkciang ziam? A at ma ziam? A at ma hi a, a at zawk hi ngawl hi.

¹¹Ama sia a khak sang ciangin a vunteap at pheang hi. Vunteap a atna zongh, Abraham in Pathian um ahikom Pathian in ama a vunteap a at ma in thutang hi ci a tepteena lim ahi hi. Tua ahikom Abraham in Pathian um a, thutang hi ci in ama ii a saante theampo, a vunteap at vateal ta buale kuama theampo ii thaa lamsang ah a pa uh ahi hi.

¹²Ama in vunteap atte ii pa zongh hi a, vunteap a at bek dom ngawlin, ih pa Abraham vunteap a at ma a, upna taw a nuntakna sungah ama bangma in a nungta te ii pa zongh ahi hi.

¹³Pathian in Abraham le a suan a paalte munah hi leitung sia amate atu hi ci in kamciam pia hi, hi kamciam in Abraham ii thukham a nit hu hi ngawl a, a up hangin thutang hi ci a, Pathian in a teptee hu ahi hi.

¹⁴Banghang ziam cile Pathian ii kamciam sia Thukham a tangte atu hi thong le mihingte upna sia a lui thawthong suak tu a, Pathian kamciam zongh man nei ngawl hi tu hi.

¹⁵Thukham in Pathian thin uukna piangsak hi; Ahihang thukham om ngawlna munah thukham paltanna om ngawl hi.

¹⁶Pathian kamciam in upna bulphu in nei a, tua ahikom Abraham suan le paal Thukham tangte bek hi ngawlin — Abraham up bangin a umte theampo tungah man nei ngawlin a piak tu in kho takin vawt hi. Banghang ziam cile Abraham in eite theampo ii thaa lam sangah ih pa ahi hi.

¹⁷Laithiangtho in, “Minam tam mama ii pa kong suaksak zo hi,” a ci bangma ahi hi. Tua ahikom a thisa a nungtasak kik thei, a om ngeingawl laite thupiakna taw a piangsak thei, Abraham ii a up Pathian ii a muna ah tua kamciam sia kip hi.

¹⁸Muanmawk lamet natu om ngawl kawm panin Abraham in um a muangmaw ahikom ama sia “minam tam mamate pa” suak hi. Laithiangtho in “Na suan na paal te aksi za in tam tu hi,” ci hi.

¹⁹Tua hun lai in ama kum zakhat pha dektak zo a, a pumpi sia a thithi ma hi zo in, tua bek dom ngawlin Sarah in ta nei thei ngawl ahitazong a upna a thaneam tuan bua hi.

²⁰Ama in a upna thasua ngawl a, Pathian kamciam zongh a muang la bua hi. A upna in ama thahatna taw kidimsak a, ama in Pathian pok hi.

²¹Ama ii a thinsung tawngh pan a upna sia, Pathian in kamciam a piak bangin tungsak tu hi ci in um hi.

²²Tua thu hangin Abraham in upna tungtawnin, “Pathian in thutang hi ci in saang hi.”

²³“Ama sia thutang hi ci in kisaang hi,” ci kammal zongh ama bek atu a kici ahi bua hi.

²⁴Ih Topa Jesus thina pan a tho kiksak ama a um, thutang hi ci in hong kiciamtee ei atu zonghin a ki at kammal ahi hi.

²⁵Jesus sia eite ii mawna hu in a thi tu in ki aap a, Pathian mai ah thutang ih sua natu in nuntakna sungah ama kinungta kiksak hi.