Read Siyin Chin Romete 6 Bible Online

Romete 6 - Siyin Chin bible

Romete 6

¹Tua ahile bang ih son tu ziam? Pathian ii thuthiamna a khanto vaial natu in mawna sungah ih nungta tan lai tu ziam?

²Hi ngawl het hi. Eite in mawna thi san zo ih hi ciang bangbangin mawna sungah nungtata lai tu hi ziam?

³Banghang ziam cile hi thu na heak uh ahi hi. Eite Christ taw kikopkhawm tu in ih ki baptize ciang ama thina sung zongh ah a kikopkhawm tu in a ki baptize ih hi hi.

⁴Tua ahiciang ih ki baptize na taw eite ama taw kivuikhawm a, ama thina ih siim hi. Banghang ziam cile Pa ii minthan thahatna taw Christ sia thina panin a kithawsak kik ciang eite zongh nuntakna thak sungah a nungtate ih sua natu ahi hi.

⁵Banghang ziam cile ama ii a thi bangma in ih thi ciangin ama taw pumkhat suak ih hile, ama a kinuntaksak kik bangma in, eite hong kinuntaksak kikna taw ama taw pumkhat ih suak tu hi.

⁶Tuaciangin hi thu ih he hi, ih nuntakna a lui sia thinglamtee tungah Christ taw ih thisak zo a, mawna silate ih hi nawn ngawl natu, mawna vaangletna a kilalcipsak natu in ih nuntakna lui sia Christ taw ama thinglamtee tungah kithisak zo ci in ih he hi.

⁷Banghang ziam cile mihing khat a thi ciangin mawna tha hatna panin a kisuaktasak ahi hi.

⁸Christ taw thi khawm zo ih hi nungsang, ama taw ih nungta khawm tu hi, ci zonghin ih um hi.

⁹Banghang ziam cile Christ sia thina panin kitho kiksak zo a, bangma hunin a thi kik ngei nawn buatu hi — thina in ama uk ngei nawn ngawl tu hi.

¹⁰Tua ahiciang ama thi ahi hu in, mawna in ama tungah vaang nei nawn ngawl hi; tu in ama nuntakna in Pathian taw kipawlkhawm in nungta ahi hi.

¹¹Tuasia bangma in no zongh mawna taw kipee thute ah a thisa in, na kituat vun a, ahizong, Christ Jesus tungtawnin Pathian taw kipawlkhopna sungah a nungta in na kituat vun.

¹²Na cii le sa deina na zui ngawl natu in, a thithei na pumpi sia mawna in hong uk nawn ngawl tu hi.

¹³Tua bek dom ngawlin, a pha ngawl tupnate sungah a kizangh tu in na pumpi nate khat pawpo aap thei ngawl tu nu hi. Tua hi ngawl zaw in thina pan a kinungtasak kik mihingte bangin na pumpi uh thumaan thutang taw a kizak natu in, Pathian tungah kipia vun.

¹⁴Mawna in hong uk nawn ngawl tu hi; banghang ziam cile note in thukham nuai ah nungta nawn ngawl a, Pathian ii thuthiamna nuai ah a nungta na hi zo uh hi.

¹⁵Tua ahile bang ci tu hi ziam? Thukham khutnuai ah om nawn ngawl a Pathian ii thuthiamna khutnuai ah om zo ih hile mawna ih vawt lai tu ziam? Hi ngawl hi!

¹⁶Mihing khat pawpo ii thu ni tu in noma le noma na ki aap uh ciangin a sila na suak uh sia maan takin na he uh hi — mawna sila na hi uh le thina taw kizom a, tua ahi bua a, thunitna sila na hi uh le Pathian mai ah thutang suana taw kizom hi.

¹⁷Bangpo ahizong Pathian tungah lungdamko tawng! Banghang ziam cile khatvei lai in note in mawna silate na hi uh a, na saansa uh hong kihil thumaan thutakte na thin theampo uh taw na ni zo uh hi.

¹⁸Note mawna panin hong kisuaktasak zo a, thutang ii silate na hi zo uh hi.

¹⁹(A zawngkhal mihing na hi uh hu in na tel thei tu in, ni sim ih zak kammal ol te kong zangh hi.) Khatvei lai in siatna le thiangtho ngawlna sungah a sia tu le a nin tu in noma le noma silate bangin na kipum aap uh bangma in, tu in thutang ii silate bangin tupna thiangtho sungah na kipia tavun.

²⁰Mawna silate na hi uh laitakin thumaan thutang taw na kipeal uh hi.

²¹Maizum huai na saknate na vawt uh ciangin, bang meetna na nga uh ziam? Tuate taw a kizom thu in thina ahi hi!

²²Ahihang tu in note sia mawna panin hong kisuaktasak zo a, Pathian silate na hi uh hi. Na meetna uh sia nuntakna a cialcingin ama tungah na kipum aapna uh hi a, tua taw kizom thu in tawntung nuntakna ahi hi.

²³Banghang ziam cile mawna thaman in thina hi a; ahihang tawntung nuntakna sia, ih Topa Jesus Christ taw ih kikopna hangin a thong a hong piak letsong ahi hi.