Read Siyin Chin Romete 8 Bible Online

Romete 8 - Siyin Chin bible

Romete 8

¹Tu in Christ taw pumkhat in a nungtate atu in kipuavawkna a om bua hi.

²Banghang ziam cile Jesus Christ taw kop a nuntakna sungah hong then thaa ngeina in mawna le thina ngeinate panin hong suaktasak hi.

³Mihing thaneamna hu a Thukham ii vawt zawk ngawlte Pathian in vawt zo hi. Ama in mihing pianzia sungah mawna a bo cimitsak natu in mihingte mawna pianzia teng ma hong keng a, ama Tapa sia mawna kitat natu in hong pia hi.

⁴Pathian ii hi bangin a sepna in ei, mihing pianzia bangin nungta ngawl a, Thaa ngeina bangin a nungtate in Thukham ii thutang sua natu a deina sia a khuangkhim natu in seam ahi hi.

⁵Mihing pianzia bangin a nungtate thinsung sia cii le sa deina in uk hi. Thaa ii sawl bangin a nungtate thinsung sia Thaa ii deina in uk hi.

⁶Mihing pianzia in na uksak uh le thina piang a; Thaa in na uksak uh le, nuntakna le thinnopna piang hi.

⁷Tua ahiciang mihing khat sia mihing pianzia in a uk le Pathian ngal suak hi; banghang ziam cile ama in Pathian thukham ni ngawl hi, a tatakin ni thei ngawl hi.

⁸Mihing pianzia a zuite in Pathian a lungdamsak thei bua hi.

⁹Ahihang note in mihing pianzia ii hong sawl bangin na nungta bua uh hi; Pathian Thaa note sungah hong nungta takpi ma ahi nale — Thaa ii sawl bangin na nungta uh hi. A kuama po Christ ii Thaa a nei ngawl sia in, Christ ii neisa ahi bua hi.

¹⁰Ahihang Christ note sungah hong teang le Thaa sia no atu in nuntakna ahi hi, banghang ziam cile na pumpi uh mawna hangin thi tu ahitazong note Pathian taw hong kilemzawngsak hi.

¹¹Jesus thina pan a thosak kik Pathian Thaa note sungah hong teang le thina pan Christ a tho kiksak pa in, a Thaa note sungah a om hu in a thithei na pumpi uh nuntakna hong pia tu hi.

¹²Tua ahikom ka suapuite awng, mihing pianzia ii deina bangin ih nuntak ngawl natu in zui tu vaipuak ih nei hi.

¹³Banghang ziam cile mihing pianzia bangin na nungta uh le na thi takpi tu uh hi; ahihang mawna ngamtatnate Thaa taw na thatlum uh le na nungta tu uh hi.

¹⁴Pathian Thaa ii lampuina a nga mihing peuma Pathian ii tate ahi uh hi.

¹⁵Banghang ziam cile Pathian hong piak Thaa in nang sia sila hong suaksak ngawl a, hong kiitasak ngawl hi; tua hizaw ngawlin, Thaa in Pathian ii tate hong suaksak a, Thaa vaangletna taw eite in Pathian tungah “Pa awng, ka Pa awng!” ih ci thei hi.

¹⁶Pathian Thaa in eima thaa taw kikopin, Pathian ii tate ih hina tetti in hong pang khawm hi.

¹⁷A tate ih hi zawk nungsang a mite atu a khealsia thuphate ih lua tu a, Christ atu a Pathian ii a koi nate zongh ih lua tu hi; banghang ziam cile Christ ii thuakna ih thuakpui le a minthanna zongh ih lua tu hi.

¹⁸Tu hun a ih thuakte in hong kilangh pheang tu, a minthanna taw kiteengat thei ngawl hi.

¹⁹A kibitphua sa theampo in Pathian ii tate sia akua bang teng hi tu ziam ci in hong kilaak tu kaal ngakla in om uh hi.

²⁰Banghang ziam cile bitphua sate sia amate ii tupna le sawmnate a taan natu in, amate ii uuk thu hi ngawlin Pathian ii deina taw puavawkna a thuak uh hi. Ahitazong lametna om lai hi,

²¹bitphua sate in ni khat ni ciangin a muatcip theina sungah sila a tanna sung panin kisuaktasak tu a Pathian ii tate in suatak minthanna nga khawm tu uh hi.

²²Banghang ziam cile nausuak tun a nat bangin tu hun dong ma bitphuasa theampo in na a sakna taw tau in om hi ci ih he hi.

²³Ahihang bitphua sate bek hi ngawlin Pathian ii a leap a letsong hong piak ahi ei Thaa a neite zongh in, Pathian ii tate hong suaksak a, ih nuntakna buppi hong suataksak tu ngakin ih sung sangah ih tau tek hi.

²⁴Banghang ziam cile eite sia lametna hangin hong hun a; ahizong ih lametna sia ih mukhol thei le tuasia in lametna kici thei ngawl tu hi. A mu, nate a muangmaw lai akua om ngei nu ziam?

²⁵Ahihang ih mu ngawl lai khat muangmaw ih hile, thinsauna taw ih ngak hi.

²⁶Tua bangma in eite in bangza in tha zawngkhal hi ka leang, eite hong hu tu in Thaa hong pai hi. Banghang ziam cile eite in thu ih ngetzia tu ih he bua hi; kammal taw a kilo thei ngawlte tauna taw Pathian tungah Thaa in hong maangkaasak hi.

²⁷Tuaciangin mihingte thinsung a mu thei Pathian in Thaa ii khua ngaisutnate he hi; banghang ziam cile Thaa in Pathian tungah a mite atu in ama dei babangin maangkaasak hi.

²⁸Pathian ii tupna taw a sam sa ahi ama a itte atu in na theampo Pathian in a phabel in piangsak hi.

²⁹Pathian teal sate a Tapa taw a kiban natu in, doituam a, tua hu in a Tapa in unau tam mama sung panin ta upabel suaksak hi.

³⁰Tua ahikom Pathian in a tuamin a koi sate sam a, a samte thutang suaksak hi, tua thutang a suasakte ama ii minthanna hawm hi.

³¹Hi teng zawkciangin ih son tu, bang om lai tu ziam? Pathian ei sangah hong pang le akua in eite hong langpan thei tu ziam?

³²Pathian in hong langpan ngawl het tu hi. Ama in a Tapa takpi khoaikhe ngawlin, ei atu in hong pia hi! A Tapa ngawngawn hong pia ahile — na theampo a thongin hong pia ngawl tu ziam?

³³Pathian tealsa mihingte tungah akua in, mawna zong thei tu ziam? Pathian mama in amate mawnei ngawl a suasakte ahi hi!

³⁴Tua ahile amate akua in maw pusak thei tu ziam? Thina thuak a, a kinungtasak kik pa, Pathianziatsang ah to a, Pathian tungah ei atu in hong ngetsakpa Christ Jesus in hong mawsak ngawl tu hi.

³⁵Tua ahile Christ ii eite hong itna panin, akua in hong khen thei tu ziam? Ngimna, haksatna, vawtsiatna, ngilkialna, zawnna, lau huaina, thinate khat pawpo in, hong khen thei tu ziam?

³⁶Laithiangtho in hi bangin a ci bangma “Nang hu in kote thina ii lauhuaina sungah a ni bup in ka om uh hi; kote sia a kingolum tu tuute bangin hong kivawt hi,”

³⁷Hong itpa tungtawnin eite in hi thute theampo sungah zawna kicing ih nga hi!

³⁸Banghang ziam cile ama hong itna panin, bangma in hong khen thei ngawl tu hi ci in maan takin ka mu hi: thina ahizong nuntakna ahizong, vantunglalangte ahizong, vantung ukna le thahatna nei dangte ahizong, tu hun hikale mailam hikale,

³⁹leitung a saangbelna mun ahizong, leinuai a thuk belna mun ahizong, bitphua sa a minpiang bangma in ih Topa Jesus Christ sungah ih neisa ahi Pathian hong itna taw hong khen zo a om buatu hi.