Read Siyin Chin Romete 9 Bible Online

Romete 9 - Siyin Chin bible

Romete 9

¹Thumaan ka son hi; Christ neisa ka hi a, ka leilot bua hi. Thaa Thiangtho ii a uk ka thinsung zongh in leilot ngawl ka hina hong telthiangsak hi.

²Ka chi ka sa ahi ka mite atu in bangza in khuangai khi ziam! A kizom tan in bangza in lainat law khi ziam,

³a phattuamna om tu hi thong le amate atu in Pathian haamsiatna thuak leng a, Christ taw zong kikhen law leng zong ka uk hi.

⁴Amate in Pathian ii mihingte hi uh a; ama in amate sia a tapate suaksak in, a minthanna kilanghsak hi; amate taw kamciamna vawtin Thukham pia hi; amate in a maan biakpiakna nei uh hi; amate in Pathian kamciam saang uh hi.

⁵Amate in khanglui Hebrew minthangte ii suan le paal te hi uh a, Christ ii mihing a hina taw amate ii minampui ahi hi. Na theampo a uk Pathian sia a tawntungin kipok tahen! Amen.

⁶Pathian kamciam taangtung ngawl hi ci ngawl khi hi; banghang ziam cile Israel mi theampo Pathian tealsa hi siat ngawl hi.

⁷Abraham ii suan theampo zongh Pathian ii tate hi siat ngawl hi. Pathian in Abraham tungah “Nang kong kamciamna panin na suan le na paalte Isaac tungtawnin na nei tu hi,” ci hi.

⁸Hisia a khiakna in mihing pian ngei bangin a piang thawthongte sia Pathian ii tate hi ngawl a, Pathian kamciam panin a piangte bek a suan le a paal tatakin kingaisun hi.

⁹Banghang ziam cile Pathian kamciam sia, hi kammalte bangin kipia hi. “A hun ciangin kong pai kik tu a, Sarah in tapa khat hing tu hi.”

¹⁰Hisia bek hi ngawl hi, banghang ziam cile Rebecca in ih pu Isaac ahi a pasal taw tapa nii nei hi.

¹¹Ahihang tapa khat tealtuam tu sia Pathian ii deina vingveng ahi natu thu huvau in, Pathian in a nu munah, “A u zaw in a nau zaw ii na sepsak tu hi,” ci hi. Ama in hi thu a pau laitakin amate ngeal sia piang ngawl lai a, a sia a pha bangma vawt a nei bualai hi. Tua ahikom Pathian tealna in ama sapna tung pan hi a, amate sepna tung pan hi ngawl hi.

¹³Laithiangtho in, “Jacob ka it a, Esau ka ensan hi,” ci in a ki at bang ahi hi.

¹⁴Tua ahile bang ih ci tu ziam? Pathian in a kilawm tu bang a thukhen ngawl hi ih ci tu ziam? Kici thei ngawl hi.

¹⁵Banghang ziam cile Moses tungah, “Ka hesuak nopte ka hesuak tu a; ka mulkim nopte ka mulkim tu hi,” ci hi.

¹⁶Tua ahikom mihing deina le sepna thu hi ngawlin, Pathian ii hesuakna tungah thu om zaw hi.

¹⁷Banghang ziam cile Laithiangtho in Egypt kumpipa tungah a cina pan, “Hi tupna hang le ka vaangletna lak in, leitung theampo ah ka min a kiheak natu in, kumpi kong suaksak a nang kong zangh hi,” ci hi.

¹⁸Tua ahikom Pathian in a hesuak nopte tungah hesuak a, thin sahna a piak nopte tungah thin sahna pia hi.

¹⁹Note sung pan khat po in hong ci tu nu hi. “Hi bang ahile Pathian in mihing khat po tungah mawsakna pia thei tu ziam? Pathian ii deina akua in nial thei tu ziam?

²⁰Ahihang lawmpa awng, Pathian kam a zo kik tu in nang akua na hi ziam? Tungbeal khat in a vawtpa munah, “Banghangin kei hi bangin hong vawt ni ziam?” ci in a dongh thei bua hi.

²¹A tatak ci leang bealte a vawtpa in tungmante a dei babangin a zak thei natu thunei a, tungman lom khat panin beal nii vawtin, khat sia hun thupi sung a zak tu, a khat sia hun thawthong sung a zak tu in vawt theina thunei hi.

²²Pathian nasepna zongh tuasia bangma ahi hi. Ama in a thin uukna lak nuam a, a vaangletna kihesak nuam hi. Ama a thin a uuksak, lalcipna sung a theng tu mihingte thinsauna tatak taw thuak hi.

²³A kicing ama ii vaangletna zongh hong pualaak nuam a, a minthanna a nga tu in hong vawt sa eite a hesuakna a saang tu mihingte tungah tua a vaangletna hong buak hi.

²⁴Banghang ziam cile eite sia Jew te sung pan bek hi ngawlin, Gentile te sung pan zong hong sap a minamte ih hi hi.

²⁵Hi thu in Hosea laibu sungah a son teng ahi hi, “Ka mihing ahi ngawlte ‘keima ii mihing’ ka ci tu hi. Ka it ngawl minamte sia ‘ka itte’ awng ka ci tu hi.

²⁶“Tuaciangin, note sia ka mihing hi ngawl nu hi,” a kicina mun mama ah amate sia a nungta Pathian ii tate kici tu hi.”

²⁷Tuaciangin Israel mite huvau Isaiah in hi bangin ci hi: “Israel mite tuipi hui ah senvui za in a tam hial zong, amate sung panin tawm bek kingum tu hi;

²⁸banghang ziam cile Topa in leitung bup ah hai ngawlin a vai theampo thiangsak tu hi.”

²⁹Isaiah in a masa in hi bangin ci hi. “Vaanglianbelpa Topa in suan le paal tawm hong kheetsak ngawl hi kapo le, eite Sodom bang ih hi tu a, Gomorrah bang ih suak tu hi.”

³⁰Pathian mai ah thutang sua natu a hanciam ngeingawl Gentile te sia a upna tungtawnin thutang suak uh hi, ih ci hi;

³¹Tua laitakin Pathian ii mihingte in Pathian mai ah thutang suana tu in thukham khat zong uh a, a mu bua uh hi.

³²Banghangin mu ngawl ziam? Banghang ziam cile amate in upna bulphu ngawl a, sepna bulphu uh hi. Amate in laithiangtho sungah a kison “Lutuna Suang” tungah lutu uh hi:

³³“En vun, Zion ah suang khat ka koi a, tua in mihingte lutusak hi, amate a puksak tu suangpi ahi hi. Ahihang ama a umte a thin a kiam buatu hi.”