Read Siyin Chin 1 Corinth te 1 Bible Online

1 Corinth te 1 - Siyin Chin bible

1 Corinth te 1

¹Pathian ii deina taw Jesus Christ sawltak tu in a kisam Paul le ih suapuipa Sosthenes in —

²Corinth khua ah a om Pathian ii pawlpi tung le Pathian ii mi thiangthote suak tu in a kisam sa, Jesus Christ taw kipumkhatna ah ama ii neisa a suak mi theampo, mun theampo ah amate le eite ii Topa ahi ih Topa Jesus Christ a bia mihing theampo tungah lai kong thaak hi:

³Ih Pa Pathian le Topa Jesus Christ in thuthiamna le thinnopna hong pia tahen.

⁴Jesus Christ tungtawnin note a thuthiamna hong piak hu in, ka Pathian tungah note atu lungdam ka ko tawntung hi.

⁵Banghang ziam cile Christ taw na kipumkhat uh hu in, kampauna le heakna theampo pan kipan na theampo ah a hau na suak zo uh hi.

⁶Christ ii thu sia no sungah kip takin kiphut zo ahikom,

⁷ih Topa Jesus Christ hong kilangh tu ngakin na om laitakin, thupha khat beak zongh na taan bua uh hi.

⁸Topa Jesus Christ ii Ni hong thet ni ciang, na pauban ngawl natu in ama in a tawpna dong kip takin hong keam si tu hi.

⁹Eima ii Topa ahi a Tapa Jesus Christ taw kipawl khawm tu a, note hong sam Pathian sia ih muan tu Pathian ahi hi.

¹⁰Ih Topa Jesus Christ thuneina taw, ka suapui note theampo tungah kong maangkaa hi, note sungah kikhenna a om ngawl natu in, na ci uh po kithukim vadiam vun. Ngaisutna khat le tupna khat bek taw na kipawl siat vun.

¹¹Banghang ziam cile, ka suapuite awng, note sungah kihauna om hi ci in Chloe ii innkuanpui pawlkhat in thiang takin hong son zo hi.

¹²Kong cinopna pan, note khat simin thu tuatuam son nu hi. Khat in “Kei sia Paul ii nungzui ka hi hi,” ci a; a dang khat in, “Kei sia Apollos ii nungzui ka hi hi,” ci a; a dangkhat in, “Kei sia Peter ii nungzui ka hi hi,” ci a; tuaciang a dangkhat in, “Keima sia Christ ii nungzui ka hi hi,” na ci uh hi.

¹³Christ sia pawl tuatuamin kikhentham hi! No atu in thinglamtee tungah a thi sia in Paul hina ziam? Paul nungzui tu in tui na kiphum uh ziam?

¹⁴Crispus le Gaius simngawl, note kuama tui kong phum ngawl hu in, Pathian tungah lungdam ka ko hi.

¹⁵Tua ahikom kuama in note sia kei nungzui suak tu in tui kiphum hi hong ci thei ngawl tu hi.

¹⁶(Oh hi peu hi, Stephanas le a innkuanpuite zongh tuiphum peu khi hi; tua ngawl po kuama dang tui ka phum le ka phum ngawl ciamtee ngawl khi hi.)

¹⁷Christ in tuiphum tu in kei hong sawl bua hi. Ama in Lungdamna Thupha son tu in, hong sawl hi, tuaciang thinglamtee tungah Christ a thina ii vaangletna a bo thong ngawl natu in, mihing ciimna kam zangh ngawlin son tu in hong sawl hi.

¹⁸Banghang ziam cile a mangthang mihingte atu in thinglamtee tungah Christ ii thina thu sia, luithawthong thu ahi hi, ahizong ngupna a nga eite atu in Pathian ii vaangletna ahi hi.

¹⁹Laithiangtho in, “Mihing a ciimte ii ciimna ka lalsak tu a, pilna saang neite ii heakna sia ka hepsak tu hi,” ci hi.

²⁰Tua ahile mihing ciimte, pilna saang neite, ahibuale leitung ah thu kinialna a thiamte sia bang suak tu ziam? Hi leitung ciimna sia mawmawtna hi ci in Pathian in lak zo hi!

²¹Banghang ziam cile Pathian in ama ii ciimna hong zangh a, mihingte in amate ciimna taw Pathian a heak zawk ngawl natu in vawt hi. “Mawmawt” thu hi a ci uh kote thuhilna taw, Pathian in thu umte ngup tu in khensat zaw hi.

²²A up thei natu in Jew te in nalamdang laknate kalhsuut uh a, tuaciang Greek te in ciimna zong uh hi.

²³Ko ka hi uh le thinglamtee tung a kithat Christ thu ka thangsak uh a, tua thu sia Jew te atu in a maktak huai thu le Gentile te atu in a luithawthong thu ahi hi;

²⁴ahizong Pathian ii sapsa Jew te le Gentile te atu in hi thu sia Pathian ii vaangletna le Pathian ii ciimna ahi Christ ahi hi.

²⁵Banghang ziam cile Pathian ii mawmawtna bang ahi sia in mihingte ciimna sangin ciimzaw a, tuaciangin Pathian ii thazawmna bang ahi sia in mihingte thahatna sangin hat zaw hi.

²⁶Suapuite awng, Pathian in note hong sap laitakin, na omzia uh ngaisun vun. Mihingte hong muna ah note sungah a ciim, ahibuale a vaanglian, ahibuale a ci thei tawm bek na om uh hi.

²⁷Pathian in mihing ciimte maizumsak natu in, leitung mite ii lui thawthong a sakte teal a, mihing thahatte a maizumsak natu in, leitung mite ii thazawm a sakte teal luih hi.

²⁸Leitung ii thupi a sakte, a lalsak natu in leitung ii a nomu, a zawnsak le bangma in a hen ngawlte teal hi.

²⁹Tua sia in, Pathian mai ah a kisathei tu kuama a om bua hi, a cinopna hi.

³⁰Ahihang, Pathian in note Christ Jesus taw hong kipumkhatsak zo hi; Pathian in Christ sia eite ii ciimna suaksak zo hi. Ama hangin Pathian mai ah thutang in hong koi hi; eite Pathian ii mi thiangthote suakin, hong suaktasak hi.

³¹Tua ahiciangin laithiangtho in, “A kisuangtaak nuamte in, Topa vawtsate tungah a kisuangtaak kul tu hi,” a ci bangma ahi hi.