Read Siyin Chin 1 Corinth te 10 Bible Online

1 Corinth te 10 - Siyin Chin bible

1 Corinth te 10

¹Suapuite awng, Moses nungzui ih taanghpupite tungah bang piang ziam ci in na phawk kik natu ka dei hi. Amate a vekpi in meeikaai ii dalna nuai ah om a, San Tuipi kaantanin suakta siat uh hi.

²Meeikaai sung le tuipi sungah, amate teng Moses nungzui a hina uh taw ki baptize uh hi.

³A vekpi in thaa anluum a kibangin ne uh a,

⁴thaa tui a kibangin dawn uh hi. Amate taw a tonkhawm thaa suangpi panin tui dawn uh hi; tua suangpi sia Christ ama mama ahi hi.

⁵Tuabang ahibel hang, amate a tamzaw tungah Pathian in diksa ngawl ahikom a luanghawm uh sia sennealngam sungah kithethaang hi.

⁶Tu in hite theampo sia eite atu in, ettee tu lim hi a, amate dei bangin a sia nate ih dei ngawl natu kidopna hong piakna hi,

⁷tua bek hi ngawlin, amate pawlkhat ii milim a biak bangin, ih biak ngawl natu in kidop natu hong piak ahi hi. Laithiangtho ci bangin, “Mihingte in zuneakna le numei le pa maitatna a om poai sungah kihel uh hi”.

⁸Eite sia amate pawlkhat bangin, numei le pa paktatna a vawt uh bangin ih ngamta bua het tu hi — ni khat thu in amate mihing tulkul le tulthum pukin thi uh hi.

⁹Amate pawlkhat bangin Topa ih ze et bua het tu hi — amate ngul in tulum uh hi.

¹⁰Amate pawlkhat bangin ih phuntaal bua het tu hi — Thina ii Vantunglalang in amate lalcipsak hi.

¹¹Hi thupiang theampo sia ngual ii ettee tu lim hi a, eite kidop thei natu in lai sungah a kiciamtee ahi hi. Banghang ziam cile leitung bo kuan hun sungah eite ih om hi.

¹²Kip takin ding a kisa pawpo in, a puk ngawl natu in kidawm tahen.

¹³Ze etna na thuaksa uh theampo sia mihingte tungah a tung bul thute ahi hi. Ahihang Pathian in a kamciam kholet hi, tuaciang ama in a kipin na om thei natu note thuak zawk ngawl tu ze etna hong thuaksak ngawl tu hi; hong kize et ciangin zongh thuak zawk thahatna hong pia tu a, na suatak natu lampi khat hong hon tu hi.

¹⁴Tua ahiciang ka it lawmte awng, milim biakna na pial tavun.

¹⁵Mihing thu tel theite tungah thuson tu bangin note tungah kong son hi; ka sonte sia noma le noma in na khensat tavun.

¹⁶Topa ii Zan An neakna hai hangin Pathian tungah lungdam ih ko hi; tua hai taw ih dawn ciang Christ ii chisan a siim khawmte ih hi hi. Tuaciang anluum ih balneen hi: hi a kibalneen anluum ih neak ciang, Christ ii pumpi a siim khawmte ih hi hi.

¹⁷Banghang ziam cile tua anluum sia khat bek hi a, ei teng tam ih hihang, anluum khat bek nekhawm tek ih hi manin eite pumkhat ih hi hi.

¹⁸Israel mite thu ngaisun vun; sangaw biakpiakna an a nete in, Pathian biaknatau nasepna sungah a kihel uh hi.

¹⁹Tua ahile milim, ahibuale milim biakna ah a kipia ante thupisak ka hi ziam?

²⁰Hi ngawl hi! Ka cinopna in doai biate ii biaknatau tungah sa ngawte sia doaite atu a kipia hi a, Pathian tungah a kipia hi ngawl hi. Tuaciang doaite taw na kipawlkhop tu ka dei bua hi.

²¹Topa hai le doaite hai pan zong, na dawnkhawm thei buatu uh hi; Topa sabuai le doaite sabuai zongh zangh khawmin an na ne thei buatu uh hi.

²²Tua ahibuale Topa sia a eang pa suaksak nuam ih hi ziam? Ama sangin eite hat zaw kisa ih hi ziam?

²³Amate in, “Na theampo vawt thei natu thu ih nei hi,” ci uh hi. Tua thu maan hi, ahihang na theampo pha siat ngawl hi. “Na theampo vawt thei natu thu ih nei hi,” — ahihang na theampo in hong hu thei ngawl hi.

²⁴Kuama in ama phat tuam natu a et tu hi ngawlin, ngualdangte phattuam natu a et thei tu kisamh hi.

²⁵Sa kizuakna munah a kizuak theampo na neak thei natu in suatakna na nei uh a, thinnopmawkna taw bangma dok kul ngawl hi.

²⁶Banghang ziam cile laithiangtho in, “Leitung le a sungah a om na theampo sia Topa ii neisa ahi hi,” ci hi.

²⁷Thu um ngawl khat in an ne tu in hong sam a, pai na sawm le thin nopmawkna taw bangma dongh se ngawlin na mai ah hong kilui po ne in.

²⁸Ahihang khat po in, “Hi an sia milim a kipia an hi,” hong cile, tua an sia hong sonpa le ama ii thinsung ngaisutna na khualna taw ne heak vun —

²⁹tuabang ka ci ciang, noma thinsung ka cina hi ngawlin, hong sonpa thinsung ka cinopna ahi hi. Hi thu tungtaang ah khat po in, “Tua ahile pha hi, ngualdang khat ii ngaisut natu khualna in, ka uk bang ka ngamtat tu, banghangin hong kikhaktan thei tu ziam, ci thei tu hi.

³⁰Ka an atu in, Pathian tungah lungdam ka ko nale, banghangin ngualdang khat in lungdam ka ko sa an huvau sia bangbangin hong sit thei tu ziam,” a ci om tu hi.

³¹Pha hi, bang pawpo na vawt zong, bang pawpo na ne na dawn zong, Pathian minthan natu in na hi vun.

³²Jew te atu ahizong Gentile te atu ahizong, Pathian ii pawlpi atu ahizong, haksatna a piangsak ngawl nuntakzia taw nungta tavun.

³³Keima vawt bangin vawt po vun; ka vawt theampo sungah mihing khat sim ka lungkimsak natu in ka hanciam a, amate ngupna a nga thei natu in, keima phattuam natu ngaisun ngawlin, a vekpi phattuam natu ka ngaisun hi.