Read Siyin Chin 1 Corinth te 11 Bible Online

1 Corinth te 11 - Siyin Chin bible

1 Corinth te 11

¹Christ ii zia le tong ka zui bangin, kei ii zia le tong hong zui tavun.

²Nong phaw tawntung uh hu le note tungah kong piak hilciannate na zui uh hu in kong pok hi.

³Ahihang na tel tu uh ka dei thu pan, Christ in mihing theampo tungsia ah a lianbel hi a, pasal in zi tungsia ah a lianbel hi, Pathian in Christ tungsia ah a lianbel ahi hi.

⁴Tua ahikom pasal khat in, mihon sungah a thunget ciang ahizong, Pathian thu a thansak ciang ahizong, a lu tungah khuk khat a nei le, Christ mindaisak suak hi.

⁵Tuaciang numei khat pawpo in mihon sungah thu a nget ciang ahizong, Pathian thu a thansak ciang ahizong, a lu tungah bangma a om buale, a pasal mindaisak suak a; a lu a meettol numei dangkhat taw, kilamdanna nei ngawl hi.

⁶Tua nu in a lu tungah khuk khat a nei buale, a sam zongh a meet vet tu ahi hi. Tuaciang khat in a lu a tol in meet tu ahibuale a sam a tan tu sia maizumhuai thu ahi bangma a lu tungah tuamna khat nei le pha hi.

⁷Pasal khat in a lu seal kul ngawl hi, banghang ziam cile ama in Pathian lim le vaangletnate, ama tung panin kilanghsak hi. Ahihang numei in pasal vaangletna a kilanghsak hi;

⁸banghang ziam cile pa sia numei sung panin kibitphua ngawlin, numei sia pa sung pan kibitphua hi.

⁹Pa in numei atu kibitphua hi ngawl a, ahihang numei in pa atu in a kibitphua hi.

¹⁰Tua ahiciang vantunglalangte hangin, numei in a pasal ii thuneina nuai ah om hi, ci in lak natu in a lu tuamna khat nei tu hi.

¹¹Ahihang Topa sung ih nuntakna ah, numei in pasal ngawl taw tuam din thei ngawl a, pasal zongh numei ngawl taw tuam din thei ngawl hi.

¹²Banghang ziam cile numei sia pasal panin a kivawt bangma in, pasal zongh numei sung pan a suak ahi hi; tuaciangin na theampo a piangsak sia Pathian ahi hi.

¹³A lu tungah bangma a om ngawl numei khat sia mihon biak piakna sungah Pathian tung thu a nget tu sia a kilawm le a kilawm ngawl noma in khensat tavun.

¹⁴Banghang ziam, leitung pianzia mama zongh in pasal khat sam a sau in a hoai le a maizumhuai hi a,

¹⁵ahihang numeite tungah tuasia in hoina khat hi ci in hong hil hi. Numei samsau sia ama a kituam natu in, a kipia ahi hi.

¹⁶Ahihang khat po in hi thu a nial nuam tha le, eite ih hi zong, Pathian ii pawlpite ahizong, biakpiakna ah ngeina dang kinei ngawl hi ci sia bekma son tu ka nei hi.

¹⁷Hi a nuai ah ngamtatzia tu hilnate sungah ahile no kong pok bua hi, banghang ziam cile biak kikhopna ah a tatakin phatna sangin siatna piang zaw hi.

¹⁸A masa phitbel in na kikhopna uh sungah a kilangpan pawl tuatuamte om hi ci in hong kison hi; hisia in a maan na mun om tu ka um hi.

¹⁹(No sungah thutangzaw sia a kimu thiang natu in kikhennate ahile a om kul hi.)

²⁰A pawl in na kikhop uh ciang, na neak uh sia Topa ii Zan An hi ngawl hi.

²¹Banghang ziam cile na neak uh ciang mihing khat sim in, noma an tek ma leap papaih na hi uh kom pawlkhat sia ngilkial in na om uh a, a dang teng sia zukham in om hi.

²²Tuabangin na neak na dawn natu uh, inn tek nei hi ngawl nu ziam? Tua ahibuale Pathian ii pawlpi zawngsakin, a nei ngawlte na maizumsak nopna uh ziam? Hi thu huvau ah bang son tu in nong muangmaw uh ziam? No hong pok tu khi ziam? Hong pok ngawl het tu khi hi!

²³Banghang ziam cile Topa ii hilcianna ama ii tung pan ka saante sia note tungah kong pia sawn hi: a thu in Topa Jesus a kileeheak tu nitakin, ama in anluum la a,

²⁴Pathian munah lungdam a ko zawkciang anluum balneen a, “Hisia in note atu in a kipia ka pumpi ahi hi. Kei nong phawna in hi bangin vawt vun,” ci hi.

²⁵Tuasia bangma zan an a neak zawkciang ama in hai la in, “Hi hai in ka chi taw a kikipsak Pathian ii thuciamna thak ahi hi. Na dawn uh simin, kei nong phawna in na dawn vun,” ci hi.

²⁶Hisia ii khiakna sia, hi anluum na neak uh sim le, hi hai panin na dawn uh simin ama hong pai kik dongin, Topa ii thina thu a thangsak na hi uh hi.

²⁷Hi thu taw kipee in khat po in, ama zatak ngawlna taw Topa ii anluum ne a, hai a dawn le, tua mi in Topa ii pumpi tung le a chi tungah a maw ahi hi.

²⁸Tua ahikom mihing sim in, ama le ama kisittel phot tu a, tua zawkciang anluum ne in, hai panin dawn tu hi.

²⁹Banghang ziam cile anluum a neak ciang le hai panin a dawn ciangin, Topa ii pumpi ii a khiakna a tel buale, a neak a dawn hu in ama le ama tungah thukhenna a tungsak suak hi.

³⁰Tua hu in note sungah mihing tam mama thazawmin a ciina a, tam ma na thi zo uh hi.

³¹Eima le eima kisittel phot in hi leang, Pathian thukhenna sungah ih theng buatu hi.

³²Ahihang eite sia leitung bup taw hong kimawsak ngawl natu in, Topa in thu hong khen a, daan hong pia ahi hi.

³³Suapuite awng, tua ahikom, Topa ii Zan An ne tu in, na kikhoptua uh ciangin, khat le khat na kingak vun.

³⁴Tuaciang na kikhop uh ciangin a ngilkial khat po a om le, Pathian ii thukhenna nuai ah na tum ngawl natu in inn ah an ne tahen. Thudangte sia, kong pai ciangin ih son tu hi.