Read Siyin Chin 1 Corinth te 12 Bible Online

1 Corinth te 12 - Siyin Chin bible

1 Corinth te 12

¹Tu in Thaa Thiangtho letsong huvau nong at uh teng kong son tu hi. Ka suapuite awng, tuate huvau thumaan thutak sia na heak tu uh ka dei hi.

²Pathian he ngawlte na hi uh lai in, note sia nuntakna a nei ngawl milimte biakna sungah lampialna tam mama taw hong kipaipui ahi sia na heak uh hi.

³Pathian Thaa ii a lampuite kuama in, “Jesus in haamsiat thuak hen,” ci thei ngawl a, tuaciang Thaa Thiangtho ii lamlakna a om ngawl po kuama in, “Jesus in Topa hi,” ci thei ngawl hi ci thu kong hesak nuam hi.

⁴Thaa Thiangtho letsongte sia a nam tuatuam om hi, ahihang a kibang Thaa khat bek in tuate pia hi.

⁵Nasepna a nam tuatuam om hi, ahihang a kibang Topa khat atu kiseam hi.

⁶Sepna sungah thiamna nam tuatuam om hi, ahihang mihing sim atu amate sepna san tek ah thiamna nam tuatuam a pia Pathian sia a kibang hi.

⁷Mihing theampo phattuam natu in mihing khat sim sungah Thaa a om hunlam a nanamin kilak hi.

⁸Thaa in mihing khat tungah ciimna taw kidim thu khat pia a, a dang khat tungah tua Thaa ma in heakna taw kidim thu khat pia hi.

⁹Tua a kibang Thaa khat sia ma in mihing khat tungah upna pia a, a dang khat tungah ciina damsak theina vaang pia hi.

¹⁰Thaa in khat tungah nalamdang lak theina vaang pia a; a dang khat tungah Pathian Thuhil theina letsong pia hi; tuaciang a dang khat tungah, letsongte sia Thaa Thiangtho pan hong pai ahile ahi ngawl khentel theinate pia lai hi. Khat tungah kam tumdang pau theina pia a, a dang khat tungah kam tumdangte pheen theina pia hi.

¹¹Ahihang hite theampo a vawtpa in a kibang Thaa khat bek ahi hi; tuaciangin ama uuk babangin letsong tuatuam mihing khat sim tungah pia hi.

¹²Christ in khen tuatuam tam mama a nei pumpi khat taw kibang hi. Khen tuatuam nei ahihang, pumpi khat hi veve hi.

¹³Tuasia bangma in, eite theampo sia Jew te ih hizong, Gentile te ih hizong, sila le sila ngawlte ih hizong, a kibang Thaa khat in, pumpi khat sungah hong ki baptize a, tuaciangin ih dawn tu in Thaa khat sia ei theampo hong kipia zo hi.

¹⁴Banghang ziam cile pumpi in khen khat bek taw a kivawt bua a, khentuam tam mama taw a kivawt ahi hi.

¹⁵Peang in, “Kei sia khut hi ngawl ka hi ciang pumpi ii neisa ka hi bua hi,” cile zong tua in pumpi ii khen khat a hina a bosak tuan buatu hi.

¹⁶Tuaciangin bil in, “Kei sia mittang hi ngawl ka hi ciang, pumpi neisa ka hi bua hi,” cile zong tua in pumpi ii neisa a hina a bosak tuan buatu hi.

¹⁷Pumpi buppi in mittang khat hile bangbangin khua za thei tu ziam? Tuaciangin bil bek hile bangbangin a ngimnam he thei tu ziam?

¹⁸Ahizong Pathian in pumpi khen tuatuamte sia ama deina sasan tek ah koi hi.

¹⁹A buppi in a khen tuam nam khat bek hile pumpi a om buatu hi!

²⁰A khentuam tam mama om ahihang pumpi khat bek om hi.

²¹Tua ahikom mittang in khut kungah, “Nang kong tulmaw bua hi!” ci thei ngawl tu hi. Lutang in peang munah, “Nang kong tulmaw bua hi!” ci thei ngawl tu hi.

²²Tua hi ngawlin, pumpi sungah a thazawm tuak zaw pumpi khentuamte ngawl taw bangma ih vawt thei bua hi;

²³tuaciangin kimanna tam nei ngawlin ih hen tua khentuamte sia ih thupi vawt tu te hizaw hi; tuaciang pumpi khentuamte sungah a et hoi keak ngawlte ahile ciliapna taw a tuan in ih kep kul a,

²⁴tuabang kep tuam tu sia pumpi sungah a hoi zaw khentuamte in a tulmaw bua hi. Pathian mama in ciliap tu a taangsamh khentuamte a kiciliap thei zawk natu in pumpi sia ngawmtua hi.

²⁵Tuabangin pumpi sungah kikhenna a om bua hi, ahihang ama ii khen tuatuamte khat le khat kithinbotna nei uh hi.

²⁶Pumpi sungah khen tuam khat in, thuakna a nei le, a dang khentuam theampo in thuakpui hi; khentuam khat a kipok le, a dang khentuam teng in lungdam pui tek hi.

²⁷Note theampo in Christ ii pumpi na hi uh a, tuaciang khat sim sia tua ii khentuam khat veu ahi hi.

²⁸Pawlpi sungah Pathian in a vekpi ma a om natu san tek ah koi hi: a masa phit in sawltakte, a niina ah kamsaangte, a thumna ah lai hil syate; tua zawkciangin nalamdang lakna a vawtte, tua zom ah ciidamsakna vaang a kipiate, ngual hu thei ahibuale, lamlak thiamte, tua ahibuale kam tumdang taw a paute ahi uh hi.

²⁹Amate in sawltakte, kamsaangte, lai hil syate hi siat ngawl hi. Mihing khat simin nalamdang lakna vawt thei natu in vaang ahizong,

³⁰ciina damsak theina ahizong, kam tumdang taw pauna le tua kamte pheen theina ahizong, vawt theina vaang a nei kim bua uh hi.

³¹Tua ahikom, letsong a thupizawte deibel in na nei tavun. Ahitazong, a vekpi sung pan a phabel sia in a nuai a bang ahi hi.