Read Siyin Chin 1 Corinth te 15 Bible Online

1 Corinth te 15 - Siyin Chin bible

1 Corinth te 15

¹Ka suapuite awng, na saansa uh le na upna tung kho tak na dinna uh, kong hil Lungdamna Thupha huvau tu in kong phawksak kik nuam hi.

²Tua lungdamna thu sia note tungah kong hil sia ahi hi. A luithawthong in a um na hi buana uh a, pha takin lungdamna thu na kholet uhle tua thupha in note hong ngum tu hi.

³Keima ii ka nga sa teng note tungah kong pia sawn hi, tua thu in thupibel hi: banghang ziam cile Laithiangtho ii at bangma in Christ in eite ii mawna hangin thi hi;

⁴tuaciang ama kiphum a, ni thum zawkciangin Laithiangtho ii at bangma in nuntakna sungah kithosak hi;

⁵ama in Peter kungah kilak a, tua zawkciang sawltak sawm le nii teng kungah kilak hi.

⁶Tua zawkciang ama sia a nungzui 500 vaalte kungah thakhatin kilak a, tuate sung pan pawlkhat thi zo ahihang a tamzaw sia nungta nginge lai hi.

⁷Tuasia zawkciang ama in James kungah kilak a, tua zawkciang sawltakte theampo kungah kilak hi.

⁸Keima in nau a sua tu hunin a suak ngawl khat bang ka hi tazongin — a khakbel in kei tung zongh ah hong kilak hi.

⁹Banghang ziam cile keima in sawltak sung panin a nobel ka hi a — sawltak khat ci in minpu tu zong ka kilawm bua hi, banghang ziam cile Pathian ii pawlpi ka vawtsia ngei hi.

¹⁰Ahihang Pathian ii thuthiamna taw keima sia hi bang ciang ka hi a, ama hong piak thuthiamna sia a luithawthong a suak bua hi. Kei sia sawltak dangte sangin, nasia zaw in na ka seam hi. Tua zongh a tatakin kei ii sep hi ngawlin kei taw a om Pathian ii thuthiamna ii a sep ahi hi.

¹¹Tua ahikom kei tung pan hong pai ahizong, amate tung pan hong pai ahizong, hisia ma ka vekpi in kong hil uh thu hi a, hisia ma in note ii up thu ahi hi.

¹²Tu in kote ii kong hil uh thu in, Christ sia thina panin kitho kiksak hi ci kasap, bangbangin note pawlkhat in a thite nuntakna sungah kithosak ngawl tu hi, ci thei nu ziam?

¹³Tuasia in thumaan ahile Christ kitho kiksak ngawl hi tu hi;

¹⁴tuaciang thina pan Christ tho kik ngawl hile, kote ii hil tu bangma om ngawl tu a, note ii up tu bangma om ngawl tu hi.

¹⁵Tua bek dom ngawlin kote sia Pathian tungtaang ah leilot thu son hong kici tu hi, banghang ziam cile Christ sia thina panin tho kik hi ci khu hi — ahihang mithite a nungta in kithosak ngawl hi takpi ahile, ama in Christ a thosak ngawl hi tu hi.

¹⁶Banghang ziam cile a thite nuntakna sungah tho kik ngawl hile Christ zongh kithosak ngawl hi tu hi.

¹⁷Tuaciangin Christ kithosak ngawl hile, na upna uh sia cithep thu hong suak tu a, note sia noma mawnate sung ma ah a mangthang lai na hi tu uh hi.

¹⁸Christ sungah thu um mi a thite a bocip hi cina zongh ahi hi.

¹⁹Christ sungah ih lametna in, hi nuntakna sung atu bekin kimang a, a dang om ngawl ahile leitung theampo ah a khuangai huai belte ih hi tu hi.

²⁰Ahihang thumaan thu in bang ziam cile, Christ sia thina panin a kithaw kik sakna sia, thina sungah a mute zongh, kitho kiksak tu hi ci in a kip kamciam hong piakna ahi hi.

²¹Banghang ziam cile thina in mihing khat tungtawnin hong pian bangma in, thina panin thawkikna zongh, mihing khat tungtawnin hong piang hi.

²²Adam taw a kipumkhat mihing theampo a thi bangma in Christ taw a kipumkhat theampo nuntakna sungah kitho kiksak tu hi.

²³Ahihang mihing sim amate hun tekin kitho kiksak tu hi: Christ sia a masa phitbelin tho hi; tua zawkciang ama hong pai kik ciang, ama ii mihing teng tho tu hi.

²⁴Tuasia ciang a tawpna hong theng tu hi; Christ in thaa lamsang ah a ukte, thuneite, vaangletna a neite theampo zo tu a, tuaciangin a Kumpi Ngam sia Pa Pathian tungah aap tu hi.

²⁵Banghang ziam cile Pathian in a ngalte theampo zo a, ama peang nuai ah a koisak dong Christ in uk tu hi.

²⁶A khakbel a zaw tu a ngal sia thina ahi hi.

²⁷Banghang ziam cile laithiangtho in, “Pathian in na theampo a peang nuai ah koi hi,” ci hi. A kithiangtel thu in “na theampo” ci ciangin, Christ ii peang nuai ah na theampo a koipa, Pa Pathian a kihel bua hi.

²⁸Ahihang Christ ukna nuai ah na theampo a kikoi zawkciang, Tapa ahi ama mama sia, na theampo ama nuai ah a koi Pathian nuai ah ama le ama kikoi tu hi; tuaciang Pathian in a vekpi in uk siat tu hi.

²⁹Tu in mithite atu ki baptize na a vawtte bangbangin ih ngaisun tu ziam? Amate in bang phattuamna piangsak tu in kimuangmaw ziam? Pawlkhat ci bangin, a thite sia nuntakna sungah kitho kiksak ngawl tu ahile tua mihingte in, banghangin mithite atu ki baptize ziam?

³⁰Kote sia nai simin banghangin launa thuak hi tu khu ziam?

³¹Ka suapuite awng, ni simin thina ka maingat hi! Note hu in, ih Topa Christ Jesus taw kipumkhat a, ih nuntakna hangin note sungah ka nei, hi kiphatsakna in hi bangin hong pausak hi.

³²Ngamsa ngilote taw kido bang phet in, hi Ephesus khua ah ka dian nate sia mihing tupnate bek hile, ka nga tu bang phattuamna om tu ziam? Mithite sia nuntakna sungah kitho kiksak ngawl tu hile, “An ne zu dawn in om tawng, banghang ziam cile zing ciangin ih thi tu hi,” ci kam teptee om bangin ih om lel tu hi.

³³Theamna thuak heak vun. “Kitholpui pha ngawlte in ngamtatna pha lalsak hi.”

³⁴Ahi tu bangin khua hong phawk kik tavun a, na mawnate kheal vun. No pawlkhat in Pathian he ngawl na hi uh kom a maizumhuai na hina uh kong hesak hi.

³⁵Pawlkhat in, “Bangbangin a thisate kitho kiksak tu ziam? Amate in bangbang pumpi nei tu ziam?” ci tu nu hi.

³⁶No mihing mawmaw te! Thaicii khat lei sungah na tu uh ciangin, a thi phot buale a po bua hi.

³⁷Tuaciang, zungtaang ahizong a dang thaicii khat pawpo ahizong, tua na tu uh thaicii sia a khangto tu, a kung po sa hi ngawlin, a thaicii nguak a tu na hi uh hi.

³⁸Pathian in tua thaicii tek sia ama dei bangin a kung pia a; thaicii khat sim atu in a kung pha pia hi.

³⁹Tuaciangin a nungta theampo ii sa sia a kibang sa nam khat bek ahi siat bua hi; Mihing sa in nam khat hi a, nganhingte, vacimte, ngasa te ii sa in a dang nam tuam tek nei hi.

⁴⁰Vantung pumpite le leitung pumpite a om hi; vantung pumpi hoina le leitung pumpi hoina sia kilamdang hi.

⁴¹Ni in hoina a tuam nei a, tha ii hoina, tuaciang aksite hoina a tuam tek ahi hi; aksi tetek sung zongh ah, hoina a tuatuamin om lai hi.

⁴²Mithisate a kinuntak kiksak ciangin, tuabang ma hi tu hi. Pumpi a kiphum ciangin a thithei pumpi ahi hi; a kithawsak ciangin a thi maw pumpi ahi tu hi.

⁴³A kiphum ciangin a meal sia in zawngkhal hi. A kithawsak kik ciangin, a mealhoi in thahat tu hi.

⁴⁴A kiphum ciangin cii le sa pumpi hi a; a kithawsak kik ciangin, thaa pumpi ahi tu hi. Ci le sa pumpi a om bangma in, thaa pumpi zongh a om kul hi.

⁴⁵Banghang ziam cile laithiangtho in “Mihing masabel Adam sia nuntakna a nei mihing in kibitphua hi,” ci hi; ahihang a khakbel Adam sia nuntakna a pia Thaa ahi hi.

⁴⁶Thaa sia pai masa ngawl hi, cii le sa hi phot a, tua zawkciang thaa hi pheang hi.

⁴⁷Adam masa sia lei taw kivawt a, lei panin hong piang hi; Adam niina sia vantung panin hong pai hi.

⁴⁸Leitung ii neisa ahite sia lei taw kivawt khat taw kibang hi; vantung neisate sia vantung pan hong pai pa taw kibang hi.

⁴⁹Lei taw a kivawtpa lim le meal ih puak bangma in, vantung pan hong pai Pa lim le meal ih pua tu hi.

⁵⁰Ka ci nop thu in, suapuite awng, chi le sa taw a kivawt sia in, Pathian ii Ngam lua thei ngawl a, a thithei sia in thithei ngawlna lua thei ngawl hi.

⁵¹Hi a kiseal thumaan thutak sia ngai vun: Eite theampo ih thi siat buatu hi, ahihang lemle khakbel sia a kitum ciang, eite in tawmvei no sungin, ih kikheal tu hi, mitphet khat sung za in manlang tu hi. Banghang ziam cile lemle a kitum ciangin a thisate tho kik in thi kik ngei nawn ngawl tu a, ih vekpi in ih kikheal tu hi.

⁵²

⁵³Banghang ziam cile thina sia thithei ngawlna ah kikheal nanak tu hi; a thi tu sia a thithei ngawlin hong kikheal nanak tu hi.

⁵⁴Hisia hong piang in a thithei sia a thithei ngawlin a kikheal ciang, laithiangtho kammal: “Thina kisucip zo hi; zawna kikhuangkhim zo hi!” a ci sia taangtung tu hi.

⁵⁵“Thina awng na zawna koisung om ziam? Thina awng, na suksiat theina vaang koisung om ziam?”

⁵⁶Thina in, a suksiat theina vaang sia mawna panin nga a, tuaciang mawna in a vaang sia Thukham panin nga hi.

⁵⁷Ahihang Topa Jesus Christ tungtawnin zawna hong pia Pathian tungah lungdam ih ko hi!

⁵⁸Tua ahikom, kong it suapuite awng, kip tak le maan takin om vun. Topa atu na nasep uh peuma a luithawthong suak ngawl het tu hi ci in na heak uh ahiciang Topa atu na nasepna sungah a tawntung komla vun.