Read Siyin Chin 1 Corinth te 16 Bible Online

1 Corinth te 16 - Siyin Chin bible

1 Corinth te 16

¹Judea ngam ah Pathian ii mihingte huna sumkhon natu vai lai nong thaak uh sia taw kisai in kong son tu hi. Galatia ah a om pawlpite tungah ka sawl teng ma note in na vawt uh kul tu hi.

²Nipi ni simin na sum thalaw za uh taw kizui in sum pawlkhat na koituam hamtang vun a, na khol vun. Kong pai ciangin sumkhon a kul ngawl tu in na tawm vun.

³Kong pai zawkciang Jerusalem ah na huna letsong uhte a puak tu in pha na sak uh mihingte sawlin kiheaksakna laite taw ih paisak tu hi.

⁴Keima pai hangin a phatuam tu le, amate taw ka tonkhawm thei tu hi.

⁵Macedonia sang ka manaw zawkciangin, note kungah kong pai tu hi — Banghang ziam cile Macedonia kaantanin kong pai kul tu hi.

⁶No kungah tawmvei hunsung hong taam tu khi hi, phalbi bup hong taam tha tu khi hi. Tuasia ciang ka khualhaw kik natu mun pawpo ah ka paitan thei natu in keima nong hu thei tu uh hi.

⁷Tawmvei sung hong nawkin a kimu nuam bek hi ngawlin, Topa deina a om nale, note taw hun sau mama zak khop tu ka lamen hi.

⁸Pentecost ni dong hi sung Ephesus ah ka taam tu hi.

⁹Hong langpan mihing tam mama om ahihang, a lian le a vawt thamman nasep natu in hunpha tatak khat a om hi.

¹⁰Timothy sia note kungah hong theng le, note sungah nuam a sak thei natu in na vawt vun, banghang ziam cile ama sia keima bangma in Topa atu in a seam khat ahi hi.

¹¹Kuama in ama zawngsak heak vun a, kei kung hong kilee kik thei natu in, ama khual hawna thinnuam takin a zop to thei natu in na hu nanak vun; banghang ziam cile ama sia suapui teng taw hong heak kik tu ka lamen hi.

¹²Tu in suapui Apollos huvau ah, ama sia suapui dangte taw no kung hong haw natu in ka hanthawn hi, ahihang tu hunin hong pai tu sia a thinzo paih ngawl hi. Hun pha a nga ciang ahile, ama hong pai tu hi.

¹³Pilvang in om vun, upna sungah kho takin ding vun, hang vun a thahat vun.

¹⁴Nasepna theampo ah ki itna taw seam vun.

¹⁵Note in Stephanas le a innkuanpuite thu na heak uh hi; amate sia Achaia ah Tapidaw suakciilte hi a, Pathian mite atu nasepna sungah a kipiate ahi uh hi.

¹⁶Suapuite awng, hi bang mihingte ii lampuina le amate taw a diang a seam dang khat pawpo ii a lampuina na zui natu uh kong thuum hi.

¹⁷Stephanas, Fortunatus le Achaicus ii hong pai hu in ka lungdam hi; amate sia hong om thei ngawl note ii luang hi,

¹⁸amate in note hong thinnuamsak a, tuabangin kei zongh hong thinnuamsak hi. Hi bang mihingte sia teptee thamman hi.

¹⁹Asia ngamkhen ah pawlpite in paupuina kam hong thaak hi; Aquila, Priscilla le amate inn ah a kikhawm pawlpi in Tapidaw kideisakna kamthiam taw hong paupui hi.

²⁰Hi sungah suapuite theampo in paupuina kam hong thaak hi. Khat le khat suapui khat hina taw kinamh tavun.

²¹Keima Paul in hi kong paupuina lai sia: keima khut tatak taw kong at hi.

²²Topa a it ngawl po haamsiatna thuak tahen! Maranatha — Ih Topa hong pai tahen!

²³Topa Jesus thuthiamna note taw hong om tahen.

²⁴Christ Jesus sungah a om note theampo tungah kong itna om tahen. Amen.