Read Siyin Chin 1 Corinth te 3 Bible Online

1 Corinth te 3 - Siyin Chin bible

1 Corinth te 3

¹Suapuite awng, a tatakin ci leang, Thaa a nei mihingte tungah ka pau bangin note tungah kong pau thei bua hi; hi leitung ii neisa, Tapidaw upna sungah patang a hite bangin note tungah kong pau kul hi.

²No sia noaitui bek taw kong vaak a, antak kong pia bua hi, banghang ziam cile antak ne thei tu na hi bualai uh hi. Tu ma zonghin antak a ne thei tu hi ngawl lai nu hi,

³banghang ziam cile note in hi leitung mihingte nuntak zia taw ma in na nungta lai uh hi. Note sungah ki eenna om a, khat le khat na kihau uh ciangin, hi thu in note leitung neisa na hi na uh le leitung om zia taw nungta na hina uh hong lak hi ngawl ziam?

⁴Note sung pan khat in, ‘Kei Paul nung ka zui hi,’ a dang khat in, ‘Kei Apollos nung ka zui hi,’ na ci uh ciang leitung mihingte pianzia bangin a ngamta hi ngawl nu ziam?

⁵A tatakin Apollos sia akua ziam? Tuaciang Paul sia akua ziam? Kote in note ii thu na up thei natu uh in hong lampui Pathian naseamte hi bek lel khu hi. Topa ii seam a hong sawl bangin koma khat simin a seam ka hi uh hi.

⁶Kei in thaicii ka poai a, Apollos in a kung tuibuak in, ahihang a khangtosak sia Pathian ahi hi.

⁷A poaipa le tui a buakpa sia a thupi tatak bua hi. A thupi sia in Pathian ahi hi, banghang ziam cile ama in a kung khangsak hi.

⁸A poaipa le tui a buakpa in kilamdanna nei ngawl hi; Pathian in amate sep babangin tel pia tek tu hi.

⁹Banghang ziam cile kote sia Pathian taw kipawlin naseam khawmte ka hi uh a, note in Pathian ii lo na hi uh hi. Note in Pathian inn na hi si uh hi.

¹⁰Pathian hong piak hesuakna thupha zangh in, inn sa thiampa ii nasep teng ka seam a, a tawdap phungkawng ka phasak hi, tuaciangin ngualdang khat in tua ii tungah sa to hi. Ahihang mihing sim in, bangbangin inn kisa ziam, ci in a kidop kul hi.

¹¹Banghang ziam cile Pathian in Jesus Christ sia khat bek ahi tawdap phungkawng tu in pha zo a, a dang tawdap phungkawng a kipha thei nawn buatu hi.

¹²Pawlkhatte in khamh, ahibuale ngunn, ahibuale suangmanpha sia phungkawng tungah inn sakna in zangh tu hi; a dangte in thing, ahibuale lopa, ahibuale taangphaw zangh tu uh hi.

¹³Tuaciang mihing khat sim ii nasepna a phat le a phat ngawl sia Christ Ni in a pholaak ciangin kimu tu hi. Banghang ziam cile tua Ni in meikuang in mihing sim ii nasepna kilanghsak tu hi; meikuang in tua nasepnate sittel tu a, a phatna le a siatna lak thiang tu hi.

¹⁴Phungkawng tungah a kisa sia meikuang in a kaanghsak zo buale, inn sapa in tel nga tu hi.

¹⁵Ahihang khat po ii nasepna sia a kaanghtum le, a nasep teng sumh tu hi; ahihang ama ahile kaanghmei sung pan a suakta khat bangin ngupna nga tu hi.

¹⁶Note in Pathian biakinn na hi uh a, no sungah Pathian Thaa hong teang nginge ahi sia na he takpi uh hi!

¹⁷Tua ahikom khat po in Pathian biakinn a susia le, Pathian in ama susia tu hi. Banghang ziam cile Pathian biakinn sia thiangtho a, note mama in ama biakinn na hi uh hi.

¹⁸Kuama in ama le ama kitheam heak hen. Note sungah khat po in ama le ama sia, leitung paizia taw etna in, ciim a kisa le a ciim takpi ahi natu in a mawmawt phot kul tu hi.

¹⁹Banghang ziam cile hi leitung ii ciimna hi ci in a ngaisutte sia Pathian muna ah luithawthong ahi hi. Laithiangtho in, “Pathian in a ciimte sia amate pilna thaang sungah man hi,” ci hi;

²⁰tuaciang Laithiangtho dangkhat in, “Topa in a ciimte ngaisutna sia mannung ngawl hi, ci in he hi,” ci hi.

²¹Tua ahikom kuama in mihingte vawt thei thute sungah kisuangtaak heak hen. A tatakin na theampo note neisa ahi hi:

²²Paul, Apollos le Peter; hi leitung, nuntakna le thina, tu hun le maisang hun — hite theampo noma aa ahi hi,

²³tuaciangin note sia Christ neisa na hi uh a, Christ sia Pathian neisa ahi hi.