Read Siyin Chin 1 Corinth te 5 Bible Online

1 Corinth te 5 - Siyin Chin bible

1 Corinth te 5

¹Tu in, Pathian he ngawlte sung zongh ah a om ngeingawl, a patau huai numei le pa paktatna note sungah om hi, ci in kison takpi hi. Pasal khat sia a nu kik taw lumkhawm hi, ci in hong kison hi!

²Tua ahile bangbangin kiphasak thei tu nu ziam? Tua ci thada, na khuangai mama natu uh hi a, tuabang a ngamta pasal sia zongh no kipawlna sung panin na hawlkhiat tu uh ahi hi.

³Ka pumpi sia note taw kikhuala hi kaleng, ka thaa sia note taw omkhawm nginge hi. Note taw keima hong om khawm bang keakin, hi a patau huai mama ngamtatna a neipa tungah Topa Jesus min suangin thukhenna ka pia zo hi. Na kikhop uh ciang kei zongh ka thaa taw kong kingawm a, Topa Jesus vaangletna ei sungah a om sia taw,

⁵Topa Ni ciang a thaa a suatak natu in, a pumpi Satan suksiat natu in tua pa ii pumpi Satan na aap vun.

⁶Note na kiphatsak thei natu bangma om ngawl hi! Kam teptee khat ah “Tol tawmno khat in anvuinoai bup pawmsak hi,” ci hi.

⁷Na thiantho sinsen natu in, mawna tol lui sia na lakeak vun. Tua hile tol saw ngawl anvuinoai thak bang na hi tu a, tuabang takpi ma hi ci in, kong heak bang tatak ma na hi tu uh hi. Banghang ziam cile tu in Christ, ih Paisan Poai tuuno sia sangaw biakpiakna in kinei zo ahikom, ih Paisan Poai sia a kinging sa in om zo hi.

⁸Tua ahikom ih ngitlona le mawna tol lui taw a kivawt anluum taw hi ngawlin tol saw ngawl thumaanna le thianthona anluum taw ih Paisan Poai khaam tawng.

⁹Laithak kong at sa sia sungah mihing paktatte taw na kipawl heak vun ci in kong son zo hi.

¹⁰Tu in doai bia a, mihing paktat a duhop, ahibuale a nguta, ahibuale milim a biate ka cinopna hi ngawl hi. Tuate pial natu sia, leitung pan na pusua siat uh kul tu hi.

¹¹Thu um mi khat ka hi a ci hang a paktat, a duhop, milim bia, ngual a siatson, zukham, a nguta sia taw na kipawl heak vun, ka cinopna ahi hi. Tuabang mihing khat taw ankuang uum khawm tu in na to heak vun.

¹²A tatakin a pua a om mihingte tungah thukhen tu sia kei taw kisai ngawl hi. Pathian in amate tungah thukhen tu hi. Ahihang noma pawl sung na pawlpuite tungah thu na khen tu uh hi ngawl ziam? laithiangtho sungah, “Note sung panin a ngilo mihing pa na heam vun,” a ci bang ahi hi.