Read Siyin Chin 1 Corinth te 7 Bible Online

1 Corinth te 7 - Siyin Chin bible

1 Corinth te 7

¹Tu in, nong laithakna uh thute huvau kong son tu hi. Pasal khat sia zi nei ngawlin om le pha hi.

²Ahihang paktat ngamtatna tam mama ahikom, pasal khat simin zi khat a nei tu hi a, numei khat simin pasal khat a nei tu ahi hi.

³Pasal in a zi tungah a vaipuak zo a, zi in pasal tungah a vaipuak zo in, a kitaangsapna tetek ah kilungkimsak tu hi.

⁴Zi in ama ii pumpi a uk hi ngawl a, a pasal ii uk ahi hi; tuasia bangma in a pasal in ama ii pumpi a uk hi ngawl a, a zi ii uk ahi hi.

⁵Hun khat sung thungetna in hun na zak thei natu uh thukimna nei masa na hi bua na uh le, khat le khat na kinial heak vun; ahihang tua zawkciangin nupa ngeinate zom kik vun. Hi bangin hi le uhte pumpi kitek laakna hangin, a piang Satan ze etna na lel natu uh pan kikeam zo tu nu hi.

⁶Hi bang kong ci ciang thu hong pia hi ngawl a, a zangh nuamte zak thei hi cina ahi hi.

⁷A tatakin ci leang note theampo, keima bangin om thei le uhte kong oai zaw hi; ahitazong, mihing sim in Pathian tel ih saan tuam tek om a, khat atu in hi tel, a dang khat atu in tua tel, ci in om hi.

⁸Tu in zi le pasal nei ngawl laite le meingongte atu in keima bangin, noma nguak ma om suak le uhte phazaw hi ka ci hi.

⁹Ahihang cii le sa deina, na kitek zo bua uh le, zi le pasal nei vangiat tavun — uukna taw ommawk sangin kiteenna in phazaw hi.

¹⁰A kiteang sa mite atu in keima aituam thupiakna hi ngawlin, Topa thupiakna taw thu kong pia hi: zi in a pasal nusia ngawl het tu hi;

¹¹ahihang a nusia le ama nguakin tang om top tu hi, tua ahibuale a pasal taw kilem kikna vawt tu hi; tuaciang pasal khat in a zi khul thei ngawl tu hi.

¹²A dangte tungah (Topa ci hi ngawl a, keima ci hi): Christ mihing khat in thu um ngawl zi a nei a, tua nu in ama taw a teang tan tu in a thukim le, ama in a zi khul thei ngawl tu hi.

¹³Tuaciangin Tapidaw numei khat ii pasal sia thu um ngawl khat hi a, ahihang a zi taw a teang tan tu in a thukim le a zi in khul thei ngawl tu hi.

¹⁴Banghang ziam cile a zi taw a kingawmna hangin thu um ngawl pasal khat sia Pathian in saang thei hi, tuaciang thu um ngawl zi khat sia Tapidaw pasal khat taw a kingawm uh hu in Pathian in saang thei hi. Hi bang hi ngawl hi thong le a tate sia doai biate tanote taw kibang tu uh hi; ahihang tu a bangin, Pathian in tua tate saang thei hi.

¹⁵Ahizong thu um ngawl sia in, a teenpui Tapidaw sia a nusia nuam le, nusia thei hi. Tuabang thute sungah Tapidaw ahi zaw sia in, zi ahizong, pasal ahizong, ama uuk bangin ngamta thei hi. Pathian in thinnopna sungah nungta tu in nang hong sam zo hi.

¹⁶Tapidaw zi khat in a pasal ngupna a ngasak zawk tu le a ngasak zawk ngawl tu ahizong, Tapidaw pasal khat in a zi ngupna a ngasak zawk tu le a ngasak zawk ngawl tu sia, he natu ziam?

¹⁷Note khat simin Topa ii tel hong piak bang le Pathian ii hong sap lai na om uh bangin nungta suak tavun. Hisia in pawlpi theampo tungah zui tu ka hil thu ahi hi.

¹⁸Vunteap ki at sa khat in Pathian sapna a saang le ama in vunteap at kitepteenate vawk tu hanciam kul ngawl hi. Vunteap a ki at ngawl khat in, Pathian sapna a saang le, vunteap at kul ngawl hi.

¹⁹Banghang ziam cile pasal khat vunteap at le at ngawl sia bangma thupi ngawl hi; Pathian thupiakte zui tu sia a thupi ahi hi.

²⁰Pathian ii sapna a saan hun lai a, a omzia babangin, mihing khat simin om tahen.

²¹Pathian hong sam laitakin sila khat na hi ziam? Phamaw ngawl hi; ahihang a suakta khat na sua thei natu hunpha na nga le tuasia zangh in.

²²Banghang ziam cile Topa ii a sapsa sila khat sia Topa atu a suakta ahi hi; tuasia bangma in, Christ ii a sapsa a suakta mihing khat sia Christ ii sila ahi hi.

²³Pathian in man pia in hong leisa na hi uh hi; tua ahikom mihingte sila na suak heak vun.

²⁴Ka suapuite awng, note khat simin hong kisap lai hun a na omzia uh bangin, Pathian taw kithawlin na om top tu uh ahi hi.

²⁵Tu in zi nei ngawl pasal nei ngawlte huvau nong dokna taw kisai in: Topa tung panin thupiakna nga ngawl khi hi. Ahihang Topa hesuakna taw a muan taak khat bangin keima ngaisutna kong pia hi.

²⁶Tu a thinngimna a om sia ngaisun leang, pa khat in ama om babangin a om po tu sia phazaw ka sa hi.

²⁷Zi na nei zo ziam? Tuabang na nei zo le kikhen tu sawm heak in. Zi nei ngawl lai ni ziam? Tua ahile zi zong heak in.

²⁸Ahihang zi na nei le mawna khat a vawt na hi bua hi; pasal nei ngawl numei khat in, pasal a nei le ama in mawna vawt ahi bua hi. Ahihang a kiteang mihingte ii ni simin a thuak thei ngimnate taw kipeal le uhte hong oai ka hi hi.

²⁹Ka suapuite awng, ka ci nop sia in hisia ahi hi: hun tam om nawn ngawl ahiciang, tu pan kipan zi nei pasal neite in a nei ngawl bangin om tu uh hi;

³⁰a kapte, a hee ngawl bang; a nuite, a lungdam ngawl bang; na a leite, a leisa nate a nei ngawl bang,

³¹leitung thil le vanhte taw kisai in nasep neite in tuate taw hunbit a komla ngawl bangin a om uh kul tu hi. Banghang ziam cile hi leitung in tu a bang ahile, ngei kip nawn ngawl tu hi.

³²Thinngimna pan na suatak tu sia kong deisak hi. Zi nei ngawl khat in Topa nasepna thinbot hi, banghang ziam cile ama in Topa lungkim natu hanciam hi.

³³Ahihang zi nei khat in leitung nate thinbot hi, banghang ziam cile, a zi lungkimsak nuam hi;

³⁴tua ahikom ama sia a lang le a lang mun nii panin kikai hi. Pasal nei ngawl numei ahibuale ngaknu thiangtho khat in Topa ii nasepna thinbot hi, banghang ziam cile ama in a pumpi le a thaa kipum aap nuam hi; ahihang pasal nei numei khat in leitung nate thinbot hi, banghang ziam cile ama in a pasal lungkimsak nuam hi.

³⁵Hi bang teng kong sonna in, noma kong hu nopna hang ahi hi. Note tungah kikhaatnate hong pia nuam hi ngawl khi hi. Tua hizaw ngawlin, a maan le ahi tu bangin seamin, Topa ii na, na sepna sungah kheet nei ngawlin noma le noma na kibuppiak tu ka deina ahi hi.

³⁶Nupa kop tu in a kilungkim sa, a teang ngawl tu in a khensatte thu huvau: a pa sia in a teenpui buale numei tungah a kilawm bangin ngamta ngawl kisa a, tuaciangin cii le sa uukna nasia mama ahikom a kiteen ngawlin phamaw hi ci in a ngaisun kik le, ama uuk bangma in amate kiteang tahen. Hisia sungah khialna mawna om ngawl hi.

³⁷Ahihang pa khat sia zawthawk thu taw hi ngawlin, kiteang ngawl tu in a thin a khensat le, tuaciang ama deina ki uk takpi zo a, a vawt tu sia khensat zo ahi nale, tua numei a teenpui buale a pha in ngamta ahi hi.

³⁸Tua ahikom zi nei sia zongh thupha seam hi a, ahihang zi nei ngawl pasal sia in thupha seam zaw lai ahi hi.

³⁹Pasal nei numei khat in a pasal nuntak laiteng a suakta bua hi; ahihang a pasal a thi le a teenpui nop pawpo taw a kiteen thei natu in suakta hi, ahizong Tapidaw khat ahile bek teenpui thei tu hi.

⁴⁰Ahihang ama ii om ngei in om pole pasal a nei kik sangin a lungdam zaw tu hi. Tua in keima ngaisutna hi a, tuaciang keima zongh Pathian ii Thaa nei in ka kingaisun hi.