Read Siyin Chin 1 Corinth te 8 Bible Online

1 Corinth te 8 - Siyin Chin bible

1 Corinth te 8

¹Tu in milim biakna ah a kizangh an huvau lai nong thaak uhte kong son tu hi. Amate ci bangma in, “Eite theampo in heakna ih nei hi,” ci thu in thumaan ahi hi. Ahizong tuabang heaknate in mihing khat kisatheisak hi; ahihang itna in lemh tawto hi.

²A kuama po he a kisa sia in a heak tu bang tatakin he ngawl ahi hi.

³Ahihang Pathian a it mihing khat sia Pathian in he hi.

⁴Tua ahiciang, milim biakna in a kizangh an neakna huvau ah: milim ih ci sia a om takpi ngawl khat ii taang ahi sia ih he hi; eite in Pathian khat bek om ahi hunlam ih he hi.

⁵Vantung ah ahizong leitung ah ahizong “pathiante” a kicite a om hial zong, tuaciang “pathiante le topate” tam ma om kale zong,

⁶eite atu in Pa ahi Pathian khat bek om hi, ama sia na theampo a Bitphuapa hi a, ama atu in eite a nungta ih hi hi; tuaciangin Topa khat bek ahi Jesus Christ om a, ama tungtawnin na theampo kibitphua a, ama tungtawnin eite ih nungta hi.

⁷Ahihang hi thumaan thutak sia mihing sim in he ngawl hi. Tuni dong ma mihing pawlkhat te in milimte huvau ah kingeinasee zo a, tua a piaksa an a neak uh ciang milim khat ii neisa an ne bangin kingaisun lai uh hi; amate sia thu tel zo ngawl ahikom, tua an in amate ninsak ci in ngaisun uh hi.

⁸Ahizong an in Pathian taw kizopna phatuamsak ngawl tu hi; ih neak ngawl hang bangma ih sumh buatu a, ih neak hang zong bangma kimeet tuan ngawl tu hi.

⁹Ahizong note suakta in na ngamtatna in, upna ah a thaneam mihingte mawna sungah na puksak ngawl natu in na kidawm tavun.

¹⁰Sonteena in hi thu huvau ah “heakna” a ci sia a nei note ii milim biakbuk ah na anneak uh, ngaisutna thazawm mihing khat in hong mu tu ci leang; tuasia in milim biakna ah a kizangh an a neak ngam natu in thapia suak ngawl tu nu ziam?

¹¹Tua ahikom ama atu in Christ a thi, hi a thaneam na suapuipa sia nang ii “heakna” hu in lal tu hi!

¹²Hi bangin, na Tapidaw suapuite tungah na maw uh ciang le amate ii a thazawm ngaisutna na belap uh ciangin Christ tungah a maw na tang uh hi.

¹³Tua ahikom an in ka suapuipa a khialsak le, ka suapuipa sia mawna sungah ka puksak ngawl natu in, sa ka ne kik ngei nawn buatu hi.