Read Siyin Chin 2 Corinth te 2 Bible Online

2 Corinth te 2 - Siyin Chin bible

2 Corinth te 2

¹Tua ahikom note kong heesak ngawl natu in note kungah pai kik ngawl tu in ka khensat zo hi.

²Banghang ziam cile note hong heesak thong leng kei hong lungdamsak tu akua om nawn tu ziam? Keima ii kong heesak te ma om bek tu hi.

³Tua hu in no tungah tua laithak kong at ahi hi — Keima hong lungdamsak tute ma in hong heesak tu ahiciang, no kungah pai tu ka uuk bua hi. Banghang ziam cile keima ka lung a dam le, note zongh lungdam ci in ka um hi.

⁴Lai kong thaak lai in thinsung buaingawpna le khuangaina taw thitui taakin lai kong at hi; ka tupna sia note kong heesak nopna hi ngawl a, bangza in note hong it khi ziam, ci in kong telsak nopna ahi hi.

⁵Tu in mi khat pawpo in, mihing khat a khuangaisak le kei bek hong heesak hi ngawlin, a nobelin ci leang — note theampo hong heesak ahi hi. (Hi bangin ka ci sia ama tungah a nasia kamkhal ka pau nop ngawl hang ahi hi.)

⁶Note a tamzaw in hisia pa sia tu a bangma in daan pia zo na hi uh ciangin, pha zo hi.

⁷Tu in bang po ahizong ama mawna maisak tavun a, hee leilam in a thin a lal ngawl natu in na hanthawn vun.

⁸Tua ahikom ama na it takpi na uh na telsak natu in kong thuum hi.

⁹Tua lai kong thaak sia banghang ziam cile ze etna sia bangbangin do zo a, tuaciangin kei ii hilna bangza dongin ni nu ziam ci in kong heak nop hang ahi hi.

¹⁰Khat po ii a ngamtatna tungtaang ah mawna na maisak uh ciang, kei zongh in ama ka maisak hi. Banghang ziam cile maw ka maisak ciangin — tuabang a kul takpi ma ahile — Christ ii hong ompuina taw in note hang in mawmaisak ka hi hi;

¹¹Satan ngealnate he ka hikom in; ama hong nopzaw ngawl natu in ka maisak ahi hi.

¹²Christ huvau Lungdamna Thupha hil tu in Troas khua ka thet ciang tua munah Topa in nasep natu lampi hon sa in a koi ka mu hi.

¹³Ahihang tualai ah ih suapuipa Titus mu zo ngawl ka hikom nasia takin ka thinngim hi. Tua ahikom tua munah a om mihingte mangpha thaak in Macedonia ah ka pai suak hi.

¹⁴Ahihang Pathian tungah lungdamnate kiko tahen! Banghang ziam cile Christ taw kipumkhatna hu in, Pathian in Christ ii ngalzawna sungah a mat sate bangin Pathian in eite lam hong pui tawntung hi. Christ thu heakna sia mun theampo ah paaknamtui bangin a kizel natu in Pathian in eite hong zangh hi.

¹⁵Banghang ziam cile eite sia Christ ii Pathian tungah a piak paaknamtui taw ih kibang a, ngupna a ngate le a mangthangte sungah ih kizel hi.

¹⁶A mangthangte atu in tuasia in ngual a thisak thei a ui mama thina ngim hi a; ahihang ngupna a ngate atu in nuntakna a pia ngimnamtui ahi hi. Tua ahile tuabang nasepte a seam zo tu akua om ziam?

¹⁷Kote sia Pathian thu takpi vanh ngina ngawl te zuak bangin a son midang tam mama te taw ka kibang bua uh hi; ahihang Pathian in hong sawl ahikom, thinsung maan tak taw ama mai ah Christ ii naseamte bangin thu ka son uh hi.