Read Siyin Chin 2 Corinth te 4 Bible Online

2 Corinth te 4 - Siyin Chin bible

2 Corinth te 4

¹Pathian in ama ii hong hesuakna taw hi nasep tu hong pia ahikom ka thin uh a kiam bua hi.

²Thuku theampo le a maizumhuai ngamtat nate theampo ka vawk uh hi; theamna taw na ka seam bua uh a, Pathian ii kammal zongh leilot thu ka suaksak bua uh hi. Pathian muna ah thumaanna ii a kicing khuavak sungah ka nungta uh a, mihing sim ii a pha in a tel thei natu ka hanciam uh hi.

³Banghang ziam cile, kong hil uh lungdamna thu kiseal ahile a mangthangte mun pan bekma in a kiseal ahi hi.

⁴Hi leitung pathian ngilopa in amate thinsung sia khuazing sungah keamcip ahikom um ngawl uh hi. Pathian taw a kibang linlian Christ ii minthanna huvau tua Lungdamna Thupha pan hong pai, amate tungah hong taang khuavak a mu thei ngawl natu in ama in vawt hi.

⁵Banghang ziam cile, kote kong hil thu in koma ii thu ahi bua hi; Jesus Christ sia Topa hi ci in kong hil uh a, Jesus hangin note ii naseamte bang ka hi uh hi.

⁶“Khuazing sung pan khuavak hong taang tu hi!” a ci Pathian sia ma in Christ ii maitang ah a taang Pathian ii vaangletna heak natu in kote thinsung ah a khuavak hong taangsak ahi hi.

⁷Ahitazong vaangletna lianbel sia Pathian neisa hi a, kote aa hi ngawl hi ci sia a kilak natu in thaa thu ah sumngum a nei kote sia tungbeal thawthong taw kibang khu hi.

⁸Kote ngim nga nithi ka hi uh hang, ka lalcip bua uh a, khat vevei lungmang ka hi uh hang, thinkiam ngeingawl khu hi;

⁹ngal tam mama a om hang ngualtamh sel ngeingawl khu hi. Khat vevei nasia takin hong kiliamsua kale hong kisusia zo ngawl hi.

¹⁰Jesus ii nuntakna ka pumpi uh sungah a kimu thei natu in, ama thina sia, a thithei ka pumpi uh sungah ka vom top uh hi.

¹¹Hi a thithei ka pumpi uh pan ama ii nuntakna a kimu thei natu in, ka nuntak sung tawntung, Jesus hangin thi tu launa ka nei tawntung uh hi.

¹²Thina in kote sungah na hong seam hi, ahihang nuntakna in note sungah na hong seam hi, cinopna hi.

¹³Laithiangtho in, “Um ka hikomin ka son hi,” ci hi. Tua upna thin bangma in kote zongh in um ka hi uh hu in, ka son uh hi.

¹⁴Topa Jesus sia nuntakna sungah a thosak kik Pathian in kote zongh Jesus taw hong thotosak tu a, note taw kingawm in ama omna munah hong la khawm tu hi, ci in ka he uh hi.

¹⁵Hite theampo sia note atu hi a; Pathian ii thuthiamna in mihing a tam vaialte tungah a thet ciangin, amate in Pathian minthan natu in lungdamko thungetnate a tamzaw nei tu uh hi.

¹⁶Hi thu hu in kote ka thin uh a kiam ngei bua hi. Ih pumpi cii le sa sia dadam in muamuat ahihang ih thaa nuntakna sia ni khat zawk ni khat hong kithaksua hi.

¹⁷Tuaciang, hi tawmvei hunsung ka thuak uh ngimna tawmnote in, tua ngimna sangin a tamzaw pek, a lian mama tawntung minthanna sungah kote hong then tu hi.

¹⁸A kimu thei nate mitsuan ka hi bua uh a, a kimu thei ngawl nate hizaw hi. A kimu theite sia tawmvei sung bek kikhom a, a kimu thei ngawlte sia a tawntungin kikhom hi.