Read Siyin Chin 2 Corinth te 5 Bible Online

2 Corinth te 5 - Siyin Chin bible

2 Corinth te 5

¹Banghang ziam cile, hi ih teenna buk — hisung leitung ah ih pumpi kisia le — a tawntungin a kikhomsuan tu, eite teen natu Pathian in vantung ah inn khat nei tu hi ci in ih he hi.

²Vantung pan hong pai ih inn sia eite tungah hong kikhu natu ih thangaina sia, tu in nasia mama ahikom ih vuisa hi;

³tuabangin tuasia hong kisilhsak ciangin eite sia pumpi nei ngawlin ih om buatu hi.

⁴Hi leitung buk sungah ih teen laiteng in, hong kizothaw kisa in ih tau hi; tuabang ih ci ciang hi leitung pumpi suut nuam ih hi bua a, thi theina sia nuntakna taw hong kikheal natu in vantung pumpi sia ei tungah hong silhsak tu in ih deina ahi hi.

⁵Pathian in hi kikheal natu in, eite hong puuakhol a, ei atu hong kholsakte theampo hong kipsakna in ama ii Thaa hong pia hi.

⁶Tua ahikom eite in thin letna taw ih kidim tawntung hi. Ih pumpi inn sungah ih om lai tengin, eite in Topa inn taw a kikhuala ih hi hi.

⁷Banghang ziam cile eite in upna taw ih nungta a, muna taw ahi bua hi.

⁸Eite in thinletna taw ih kidim a, hi ih pumpi inn nusia in Topa taw om tu sia ih uuk zaw hi.

⁹Tua ahikom hi sung inn ah ahizong, tuasung inn ah ahizong thudang theampo sangin Ama ih lungkimsak tu sia ih deibel ahi hi.

¹⁰Banghang ziam cile eite theampo thukhenna thuak tu in Christ mai ah ih ding nanak tu hi. Mihing khat simin a leitung pumpi nuntak sungah ama ii sepna a pha a sia taw a kiphu a kilawm in nga tek tu uh hi.

¹¹Topa kiitakna ii a cinopna ka he uh a, tua hu in, ngual zongh, tuabang ahithei natu in ka hanthawn uh hi. Pathian in kote sia a khawng a kheakin hong heak bangma in na thinsung uh ah, keima zongh hong he tu in kong muangmaw hi.

¹²Note tungah ko le ko a kiphatson tu in a hanciam kik ka hi bua uh hi. Mihingte ngamtatna en ngawl a, a meal a sa en in a kisuangtaakte na zo kik thei natu in kote nong kiphatsak pui natu ahang sia hong lak nuam ka hizaw uh hi.

¹³A thin amh tatak ka hi uh ziam? Thin amh ka hi uh le Pathian atu hi a, tua ahibuale thinciim ka hi uh ziam? Tua ahile zong note atu hi.

¹⁴Christ hong itna in kote hong uk hi, tu in ahile mihing khat in mihing theampo atu thi hi ci in ka tel uh hi, tua in amate theampo sia ama thina sungah thi khawm hi a cinopna ahi hi.

¹⁵A nungtate in amate atu nungta nawn ngawlin amate atu thi a, ahihang amate atu in nuntakna sungah a kithosak kik pa atu a nungta ahithei natu in ama in mihing theampo atu in thi hi.

¹⁶Tua ahiciang, mihingte munate taw kuama tungah thu ka khen nawn bua uh hi. Khatvei lai in Christ sia mihing munate taw thukhen ngei ka hita uh zong tu in tuabangin ka khen nawn bua uh hi.

¹⁷Mihing khat pawpo in Christ taw a kizom le ama in mihing thak ahi hi; a nuntakna lui sia bo in a thak hong piang zo hi.

¹⁸Hiteng theampo Pathian nasepna hi a, ama in Christ tungtawnin, a ngalte ih hina panin a lawmte hong suaksak zo a, ngualdangte zongh a lawmte ih suasak natu in, eite tungah vaipuak hong pia hi.

¹⁹Ka thupuak uh sia in Christ tungtawnin Pathian in mihing nam theampo ama lawmte hong suaksak hi, ci thu ahi hi. Pathian in amate mawna sazian keam ngawl a, tuaciang bangbangin ama in a lawmte suaksak cina thu ko hong hil hi.

²⁰Tua ahiciang hi sungah kote Pathian ma in kote tungtawnin note tungah hong thuum bangma in Christ atu in thuson ka hi uh hi. Christ ii taangin kong thuum uh hi: Pathian in a ngalte na hina uh pan, a lawmte hong suaksak tahen!

²¹Ama taw ih kipumkhatna hangin Pathian bang a, thumaan thutang ih sua thei natu in, mawnei ngawl Christ sia Pathian in eite taangin mawnei suaksak hi.