Read Siyin Chin 2 Corinth te 7 Bible Online

2 Corinth te 7 - Siyin Chin bible

2 Corinth te 7

¹Ka it ka lawmte awng, hi kamciamte theampo sia eite tungah hong kipia hi. Tua ahiciang pumpi le thinsung a ninsak thei nate theampo panin kithiansua in, Pathian ih thasiana taw a thiangtho sinsen suak tawng.

²Kote na thinsung uh ah hong saang tavun. Kote kuama tungah khial ngawl khu hi; kuama siatsua ngawl, kuama tungah hamphatna la ngeingawl khu hi.

³Noma hong mawsak nuam a, tuabangin kong ci hi ngawl hi; banghang ziam cile tu masia a kong ci sa bangma in note sia kote atu in ithuai mama na hi uh hang in, ih thi zong ih nung zong, a omkhawm tawntung ih hi hi.

⁴Note kong muang mama hi; note hangin ka kisuangtaak hi! Thinngimna theampo sungah thin letna taw ka kidim lai hi; lungnopna taw ka kidim leet hi.

⁵Macedonia ka thet zawk uh ciang zong tawlngak hun ka nei bua uh hi. Haksatna sia mun theampo ah om a, ngual taw kihauna, thinsung patauna taw ka om uh hi.

⁶Ahihang a thinkiamte a han sua Pathian in Titus hong paina taw kote hong hanthawn hi.

⁷Ama hong pai hu bek hi ngawlin, noma ii ama na hanthotnate zongh hong ko hu in hong lungdamsak hi. Kei nong mu nop mama na thu, na khuangai mama na uh le kei nong huuk natu in a kinging sa in na omnate uh hong ko hi; tua ahikom tu in ka lungdam seseam hi.

⁸Tua kong laithak sia in note hong khuangaisak ahile zong, tua ka at sia ka hee tuan bua hi. Tuasia in tawmvei sung teng hong khuangaisak sia ka heak ciangin, khuangai nuam leng khuangai thei tu khi hi.

⁹Ahihang tu in ka lungdam hi — kong heesak hang hi ngawlin, na heena uh sia in no hong kikhealsak ahi hu in ka lungdam hi. Tua heena sia Pathian in zangh a, tua ahikom note atu in, bangma siatna kong piangsak bua uh hi.

¹⁰Banghang ziam cile Pathian ih zak heena in ngupna nga natu in thin kikhealna piangsak hi — tua ii sungah bangma kisii natu om ngawl hi! Ahihang mihing ii heena lel bek in thina piangsak hi.

¹¹Na heena uh sia Pathian in bangbang hi ziam ci sia en vun: tuasia in bangzata in nang hong lawpsak a, na maw ngawlna ah bangza in hong panpui nuam ziam! Tuabang thin uukna, patauna, thinsung phaw theinate, thangaina, a khialte daan piak nopna cite piangsak hi! Hi thu theampo ah note pau baang ngawl ci in noma le noma kilak zo nu hi.

¹²Tua ahikom tua laithak kong at hang, a khialpa, ahibuale a thuakpa ngaisutna taw hong at hizaw ngawlin Pathian ii muna ah ko thu bangza in hong ni ci sia a kiheak natu hong at ka hizaw hi.

¹³Tua ahikom tha ka nga mama uh hi. Tha ka nga uh bek dom ngawl hi; thinnopna a nga natu in note theampo in tha na piakna uh Titus ii lungdam hu in, ka lung uh hong damsak hi!

¹⁴Titus mai ah note hangin ka kisuangtaak a, kei nong thinkiamsak bua uh hi. Note tungah thumaan kong son tawntung bangma in Titus mai a ka kisuantaakna uh sia a maan ahi hi.

¹⁵Note theampo in bangbangin ama thupiakte ni nuam a, bangbangin liinna le launa taw ama zindo cisia a phaw ciang ama in note hong itna khang seseam hi.

¹⁶Na theampo ah note kong suan thei manin ka lungdam mama hi!