Read Siyin Chin 2 Corinth te 9 Bible Online

2 Corinth te 9 - Siyin Chin bible

2 Corinth te 9

¹Judea ngam ah Pathian ii mihingte atu huna a kipuak huvau in, lai kong at sia a kul vateal hi ngawl hi.

²Note sia ngual hu nuamte hi ci in kong he hi, tuasia bangma in Macedonia mite tungah note kong kisuantaakpui hi. “Achaia a om suapuite in, ningkum panin huna pia nuam zo hi,” ci in ka na son hi. Noma lawpna in amate a tamzaw thawn zo hi.

³Hi thu huvau note kong kiphatsak pui nate a luithawthong a sua ngawl natu in hi suapuite tu in kong paisak hi. Ahihang kong ci sa bangma in, amate na hu natu uh taw na kingingta khol vun.

⁴Ahizong, note tungah ta za muanna hong kinei napi keima taw Macedonia pan mihingte kong pai uh ciangin, huna taw a kinging sa in om bua le uhte, note maizum tu bek son ngawlin, kote atu zongh bangza in maizumhuai tu ziam!

⁵Tua ahikomin, piak tu na kamciamsa letsongte a kinging kholsa in a om natu in, keima kong pai ma, hi suapuite hong paikhol tu sia hanthot tu kul ka sa hi. Tua hile kei kong thet ciang, kingin sa suak tu a, tuaciang piak tu a kul hang hi ngawlin, thinzawna taw a pia nuam ka hina uh hong kilangh tu hi.

⁶Thaicii tawm a poaipa in an tawm bek at tu a; tam a poaipa in an tam mama a at tu hi, ci in na phawk tavun.

⁷Tua hi a, mihing sim in ama khensat sa om bangin pia tu a, thinnop ngawlna taw, ahibuale piak nanak kul tu bangin ngaisutna taw pia ngawl tu hi; banghang ziam cile lungdam thinzo takin a pia sia Pathian in diksa hi.

⁸Tuaciang noma atu in na kitaangsap theampo na nei tawntung natu le, thupha vawt natu theampo ah a kicing za sangin a tamzaw na nei natu in, Pathian in na kitaangsap za sangin a tamzaw hong pia thei hi.

⁹Laithiangtho in: “Ama in a kitaangsamhte tungah ngo takin pia a; ama dikna sia a tawntungin a kikhomsuan hi,” ci hi.

¹⁰Poai tu ancii le neak tu an hong pia Pathian in na kisap thaicii theampo zongh hong pia tu a, tuate po in, anlaak ciang nangma ii ngo tak a na piakna tung panin an na hau tu hi.

¹¹Pathian in ngo takin a pia thei tawntung tu in, a khom in hong hausak tawntung tu hi; tuabangin letsong na piak uhte ko tung pan a nga uh ciang mihing tam mama in Pathian pok tu uh hi.

¹²Banghang ziam cile hi piakna, nasepna in Pathian ii mihingte kitaangsapna bek a hu hi ngawlin, Pathian tungah nasia tak lungdamko honna piangsak hi.

¹³Tuaciangin hi nasepna tungtawnin a kimu thei thute hang in, na up uh Christ lungdamna thu tungah na thumaanna uh hu ahizong, amate le ngualdang theampo taw ngo tak a na kihopna uh hu ahizong, mihing tam mama te in Pathian minthangsak tu uh hi.

¹⁴Tuaciang in note tungah Pathian ii thuthiamna a lamdangin hong piak hu in, note atu amate in ki itna a thuk tatak taw thu hong ngetsak tu hi.

¹⁵A manh a kisep zo ngawl letsong hong piak hu in Pathian tungah lungdamko tawng!