Read Siyin Chin Galatia te 1 Bible Online

Galatia te 1 - Siyin Chin bible

Galatia te 1

¹Mihingte kung pan hi ngawl, mihingte ii piansak thu zongh hi ngawl, thina pan Jesus a tho kiksak Pa Pathian le Jesus Christ kung pan sapna a nga sawltak ahi keima Paul ii tung pan laithak ahi hi.

²Hi sungah a om suapuite theampo in Galatia ngam pawlpite tungah kimuana kam kong thaak khawm uh hi:

³Ih Pa Pathian le Topa Jesus Christ in thuthiamna le thinnopna hong pia tahen.

⁴Tu a hunpha ngawl sia panin ih suatak natu in ih Pa Pathian ii deina a zuina taw, Christ in eite ii mawna hangin ama le ama hong kipia hi.

⁵Pathian tungah minthanna a tawntung a tawntungin om tahen! Amen.

⁶Note lamdang kong sa hi! Christ ii thuthiamna taw note hong sam pa, tawmvei no sungin na taisan uh a, tuaciang lungdamna thu a dang khat na saang uh hi.

⁷A tatakin, “lungdamna thu a dang” om tuan ngawl hi, ahihang hi bang a kong ci theina in mihing pawlkhat in Christ ii lungdamna thu laih tu in hanciam uh a, na thin uh hong nawngkaisak hi.

⁸Ahihang kote ka hi uh zong, ahibuale vantunglalang khat keak ahihialzong, note tungah kong hil sa lungdamna thu taw a kitumdangin hong hil a om le tua mi sia hell khuk sungah kivawk tahen!

⁹Tu masia zonghin kong ci zo uh hi, tu zonghin kong ci kik hi. Khat po in na saansa uh lungdamna thu sia taw a kitumdang khat hong hil le tua pa sia hell khuk sungah kivawk tahen!

¹⁰Hi bang a ka awsua sia mihingte ii diksak tu hi na sa uh ziam? Hi ngawl het hi! Pathian ii diksak tu bek ka deina hi! Mihingte maipha nga nuamin a hanciam ka hi ziam? Tuabangin hanciam lai ka hile Christ ii naseam khat ka hi buatu hi.

¹¹Ka suapuite awng, ka hil lungdamna thu in mihing tung pan a piang thu hi ngawl hi ci sia kong son nuam hi.

¹²Mihing khat pawpo tung panin ka nga hi ngawl hi, kuama ii hong hil zongh ahi bua hi. Kei tungah hong pualaak sia Jesus Christ ama mama ahi hi.

¹³Jew te biakna sungah ka kipiak laitakin, kei sia bangbangin a nungta mi hi a, bangbangin Pathian ii pawlpi hesuakna nei ngawlin vawtsia a, a siasak tu in ka hi thei za in hanciam khi ziam, ci teng sia no tung ah hong kisonsa ahi hi.

¹⁴Jew te biakna ka zui sung teng in ka khanngualte a tamzaw mai ah ka madawk a, ih pute ii taangh ngeinate sungah amate sangin a nasia zawin a kipia pa ka hi hi.

¹⁵Ahihang, Pathian in ka pian ma ngawngawnin a thuthiamna taw hong teal a, ama ii na a seam tu in hong sam hi. Ama ii a khensat hun hong cing a,

¹⁶Gentile te tungah ama huvau Lungdamna Thupha ka hil thei natu in a Tapa kei tungah hong pualaak ciang, ngaisutna pha ngenin kuama kungah ka pai bua a,

¹⁷kei mai a, sawltak a seamte taw kimu tu zonghin Jerusalem ah ka pai bua hi. Tua taangin, Arabia ah thakhatin ka pai a, tua zawkciang Damascus ah ka heak kik hi.

¹⁸Tua zawk kum thum ciangin Peter tung pan thu za tu in Jerusalem ah ka pai a, nipi nii sung, ama kungah ka taam hi.

¹⁹Topa ii suapuipa James simngawl sawltak dangte ka mu bua hi.

²⁰Kong at teng thumaan hi. Leilot ngawl ka hi sia Pathian in hong he hi!

²¹Tua zawkciangin Syria le Cilicia ngamsung mun tuatuam ah ka pai hi.

²²Tua hun laitakin Judea pawlpite sungah a om pawlpi mite in kei hong he tatak bua uh hi.

²³Midangte ii hi bang a, a pau teng bekma a he uh hi: “Eite hong vawtsia ngei mipa in khatvei lai a lalsak tu in a hanciamh upna sia, tu in thuhilna in nei hi.”

²⁴Tuabangin amate in kei hu in Pathian pok uh hi.