Read Siyin Chin Galatia te 4 Bible Online

Galatia te 4 - Siyin Chin bible

Galatia te 4

¹Ahihang tu in zomto suak leang — Pa ii ngamh a lua tu tapa in na theampo ama ii neisa ahihang, a khanmoi lai in sila bangin kivawt hi.

²Ama a khanmoi laitakin a pa ii a hun ciam dong a vai teng a hawmsak tu le ama a en tu in pasal pawlkhat om hi.

³Tuasia bangma in eite zongh thaa lamsang ah ih khanthin matengin vaannuai bup a uk thaa te ii sila in ih om hi.

⁴Ahihang a hun hong cin pepeet ciang, Pathian in a Tapa hong paisak hi. Ama sia mihing ahi leitung nu khat ii tapa bangin hong pai a, Jew te Thukham nuai ah nungta hi,

⁵Pathian ii tapate tanute ih sua natu in thukham khutnuai ah a omte a tat natu in tuabangin hong piang hi.

⁶Note sia ama ii tapa tanute na hina uh a lak natu in, Pathian in a Tapa ii Thaa “Pa awng, Ka Pa awng!” ci in a au Thaa sia ih thin sungah hong puak hi.

⁷Tua ahikom nang sila hi nawn ngawlin tapa khat na hi hi. Tuaciangin ama tapa hi zo na hikom, Pathian in a tapate a tanute atu, a nei theampo nangma hong pia tu hi.

⁸Hun bosa sungah note in Pathian na he bua uh hi, tua hu in a maan ngawl pathiante ii sila in na om uh hi.

⁹Ahihang tu in Pathian na heak zawk uh ciang — tua ahibuale Pathian ii no hong heak zawkciang ci leang — banghangin tua a zawngkhal, a khuangai huai ukna nei thaate kung zuan kik thei nu ziam? Banghangin amate sila suak kik nuam nu ziam?

¹⁰Nite, thate, khuahunte le kumte na thupi laak uh hi.

¹¹No huvau in ka thinngim hi! No atu ka sep sa teng bangma a kimang thei ngawl a suak bua natu ziam?

¹²Ka suapuite awng, hong ngen khi hi, keima bang hong hi tavun. Ahi tatakin ci leang kei zongh noma bangma ka hi hi. Kei tungah no ii nong khialna uh bangma om ngawl hi.

¹³Lungdamna thu note kong hil maksakna ahang sia na he lai uh hi; ka ciinat hu a hong hil ka hi hi.

¹⁴Ka pumpi omzia sia note atu in thinngimpi khat ahitazong, nong zawngsak bua uh a nong nial bua uh hi. Vantunglalang khat na saan tu uh bangin nong saang zaw uh hi; Christ Jesus na saan tu uh bangin, kei nong saang uh hi.

¹⁵Tualai in lungdam mama nu hi! Ahitazong bang teng piang man ziam? Na mittang uh khelkeak in kei hong pia thei le uhte hong pia nuam liangin om nu hi, ci in keima tatak ma in ka son thei hi.

¹⁶Tua ahile, tu in thumaan thutak sia kong son hu in na ngalpa suak zo ka hi ziam?

¹⁷Tua midangte in note nasia takin hong thinnuammaw hi, ahihang amate tupna le sawmnate pha ngawl hi. Amate ii no hong kin bangin no zongh amate na kin thei natu in, no le kei hong khen nuam ahi hi.

¹⁸Tu in tuabang a kithin nopmawkna tatakte sia tupna le sawmna pha hithong le — hisia in note taw kong omkhop ciang bek hi ngawlin, a tawntung atu in pha hi.

¹⁹Ka it tanote awng, Christ pianzia note sungah hong pian mateng in, numeite nausuak tu a tut ciangin a bot bangma in ka thuak hi.

²⁰Tu laitakin note taw kong omkhawm thei nuam hi, tua hile kong ngaisut zia kikheal thei tu hi. Note atu in ka thinngim mama hi!

²¹Thukham khutnuai ah a om nuamte, thu khat kong dongh tu hi. Thukham ii cina sia za ngawl nu ziam?

²²Abraham in tapa nii nei a, khat sia sila numei taw a hin hi a, a dang khat sia sila ahi ngawl a suakta numei taw a hin ahi hi.

²³Sila numei taw a hin tapa sia mihing pian ngei bang a, piang hi. Ahihang a suakta numei taw a hin sia in Pathian kamciamna pan piang hi, ci hi.

²⁴Hi te sia limlakna khat bangin kihe thei hi. Numei nii sia thuciamna nam nii hi. Sila in a piang tate a hing sia Hagar hi, tuaciang ama in Sinai mual ah a kivawt thuciamna ii lim ahi hi.

²⁵Hagar sia Arabia ngam Sinai Mual ii lim hi a, a mihingte theampo taw sila kaai in a om lai hun Jerusalem khuapi ii lim ahi hi.

²⁶Ahihang vantung Jerusalem sia a suakta hi a, ama sia eite ii nu ahi hi.

²⁷Banghang ziam cile laithiangtho in, “Tasel numei awng, lungdam in! lungdamna taw aukeak in! Nang nautut nat a he ngeingawl nu awng! Banghang ziam cile, a kitaisan numei in, a pasal ii a nusiat ngeingawl numei sia sangin, ta tam a nei zaw tu hi,” ci hi.

²⁸Isaac sia kamciamna panin piang ahi bangma tu in no, ka suapuite awng, kamciamna pan a piang tate na hi uh hi.

²⁹Tua hunlai in a pian ngei bangin a piang tapa in Pathian Thaa taw a piang tapa sia vawtsia hi; tu in zongh tuabang ma ahi hi.

³⁰Ahihang laithiangtho in bang na ci ziam? “Sila numei le a tapa paikhiasak vun; banghang ziam cile sila numei ii tapa in a suakta numei ii tapa taw a pa lamhsa a lua khawm buatu hi,” ci hi.

³¹Tua ahikom ka suapuite awng, eite sia sila numei ii tate ih hi bua a, a suakta numei ii tate ih hi hi.