Read Siyin Chin Galatia te 6 Bible Online

Galatia te 6 - Siyin Chin bible

Galatia te 6

¹Ka suapuite awng, tatkhialna nam khat po taw mihing khat a kiman le, thaa taw a nungta note in, ama sia a dinmun maan ah na koi vun; ahihang cikna thiamna na zangh hamtang vun. Tuaciangin note zongh ze etna na thuak ngawl natu noma le noma ki en in kidawm vun.

²Khat le khat vanhngitte na kidawn tavun, tuabangin Christ ii thukham na zui tu uh hi.

³Khat po in ama sia bangma hi ngawl napi, hi a kisa le ama le ama kitheam hi bek hi.

⁴Mihing khat simin ama le ama a ngamtatna kisit hen. A pha in a ngamta khat in ngualdang khat ii ngamtatna taw kiteengat ngawlin, ama ii ngamtat phatna tungah kisuangtaak thei tu hi.

⁵Banghang ziam cile mihing sim in a vanh uh tek a puak kul tu hi.

⁶Tapidaw thu a kihil pasal khat in, ama ii neisa na pha theampo a Syapa taw hawm tahen.

⁷Noma le noma kitheam heak vun; Pathian sia kuama ii theam zawk hi ngawl hi. Mihing khat in a poai bang lianin a at tu hi.

⁸Ama in leitung pumpi deina lo sungah a poai le, tua mun panin thina an kaikhawm tu hi; Thaa ii deina lo sungah a poai le Thaa panin tawntung nuntakna an kaikhawm tu hi.

⁹Tua ahikom na pha sepna sungah toi kisa bua tawng; banghang ziam cile thinkiam in tawp bua po leang ih anlaak tu hun hong theng tu hi.

¹⁰Tua ahikom hunpha ih nga simin mihing theampo tungah a pha ih seam tu a, a tuan in upna sung a ih innkuanpuite tungah ih seam tu hi.

¹¹Keima khut taw laithak kong at ciang, laimal lian taw ka at sia mu tu nu hi!

¹²Note tungah zawthawk thu taw vunteap hong atsak nuamte sia, a puatham thute ah kisa thei a, a kisuangtaakte ahi hi. Ahizong amate ii tuabang a vawtna sia, Jesus ii Thinglamtee hu in amate in vawtsiatna a thuak bua thei tha le ci in a ngaisut uh hang bek ahi hi.

¹³Vunteap at te ngawngawn zongh Thukham a zui bua uh hi; note vunteap hong atsak nopna thu in, pumpi tung a zeksa vawtna sungah na tum uh sia, a kisuantaak thei natu ahi hi.

¹⁴Ahizong kei ka hile ih Topa Jesus Christ ii thinglamtee bekma ka kiphatsak pui tu hi; banghang ziam cile ama ii thinglamtee hangin leitung sia kei atu in a thisa hi a, keima in leitung atu in a thisa ka hi hi.

¹⁵Mihing khat vunteap a ki at le a ki at ngawl sia a phatmawkna mama om ngawl het hi; a pha maw sia in mihing thak suana ahi hi.

¹⁶A nuntakna sungah hi ngeina a zuite tungah thinnopna le hesuakna om tahen a — amate le Pathian mihing theampo tung zongh ah om tahen!

¹⁷Thu khupna ah: kuama in kei tungah ngimna hong pia thuasak nawn heak vun, banghang ziam cile ka pumpi tung a meima pawn omte in kei sia Jesus ii sila ka hina lak hi.

¹⁸Ka suapuite awng, ih Topa Jesus Christ ii thuthiamna sia note theampo tungah hong om tahen. Amen.