Read Siyin Chin Ephesus te 4 Bible Online

Ephesus te 4 - Siyin Chin bible

Ephesus te 4

¹Tua ahiciang Topa ii na ka sep hu in, thongtaak keima in, Pathian ii note hong sap hun laitakin hong koisak bang nuntakna zia taw na nuntak natu in, kong hanthawn hi.

²A tawntungin kiniamkhiak in, cinghkamh in, na thinsausak tavun. Khat le khat kidualna taw itna kilak tavun.

³Na kilemna tungtawn a Thaa ii hong piak, no hong ngawmtua kipumkhatna sia ahi theiza in na keamcing tavun.

⁴Note Pathian ii hong sapna sungah lametna khat a om bangma in, pumpi khat om a, Thaa khat om hi.

⁵Topa khat, upna khat, baptize na khat om hi.

⁶Mihing theampo ii Pathian le Pa khat bek om hi, tua Pathian in mihing theampo ii Topa hi a, ama in mihing theampo tungtawnin naseam a, mihing theampo sungah om hi.

⁷Eite theampo in Christ hong piakna taw kizui in, letsong a tuam khat tek ih nga hi.

⁸Laithiangtho in, “A saang mama na munah a paito lai in, ngalmat tam mama tonpui to hi. Ama in mihingte tungah tel pia hi,” ci hi.

⁹Tu in, “Ama a paito hi,” a ci sia bang ci nuam ziam? A cinopna sia lei a thuk belna ah, paisuk masa zo hi, a cinopna hi.

¹⁰Tua ahikom a paisuk pa sia vaannuai buppi ah a om siat natu in vantungte kalhin, a paitopa ma ahi hi.

¹¹“Mihingte tungah, letsong hong pia sia” ama ahi hi, pawlkhatte sawltak nasep, pawlkhat sia kamsaang nasep, a dangte thupha puak nasep, pawlpi keam le lai hil sya nasep pia hi.

¹²Christ ii pumpi a kisak to natu in Tapidaw nasepna ah sep natu in, ama in hi bangin, Pathian ii mihingte theampo puuakhol natu in vawt hi.

¹³Pathian Tapa ih heakna le ih upna sungah pumkhat ih sua natu in eite theampo ih kingawmkhawm tu hi; mihing puicingte ih suak tu a, Christ ii tun tan le a phakcia ih banto tu hi.

¹⁴Tuaciangin phuatawm thimthel pilna taw ngualtheam a, a thuhilna uh taw ngual a lampialsak thei te hu in vuivak kikheal pawpo le tui kihual pawpo ii a paipui patangte na hi nawn buatu uh hi.

¹⁵Ki itna thinsung nei in thumaan ih sonna taw lutang ahi Christ sangah a nanamin ih khangto zaw tu hi.

¹⁶Ama ii ukna nuai ah pumpi ii a nate theampo kisi linlian a hong kipiasa kipee-awnate in, hong len khawm diimdiam hi. Tua ahikom pumpi sung na a tuatuamte in ahi tu bangin hong sep ciangin pumpi bup hong khang a, ki itna tungtawnin ama le ama hong kisa to hi.

¹⁷Tua ahikom, Topa min taw kidop natu thu kong pia hi: a khua ngaisutna uh a mannung ngawl Pathian he ngawl mihingte bangin na nungta heak vun,

¹⁸amate thinsung sia khuazingcip hi. Pathian piak nuntak ziate sungah amate atu bangma om ngawl hi, banghang ziam cile amate in heakna nei ngawlin a thin uh pui hi.

¹⁹Amate in maizum he vet nawn ngawl hi, amate in ngamtatna pha ngawlte sungah ki aap uh a, a thasiathuai thu tuatuamte sungah cizat nei ngawl uh hi.

²⁰Christ tung pan na sin uhte in tuabang hi ngawl hi!

²¹Ama thu sia na zaak takpi sa uh hi a, note a nungzuite na hina uh taw Jesus sungah thumaan thu note hong kihil hi.

²²Nidang a na nuntakziate uh taw hong nungtasak na milui uh — a maan ngawl duna le deinate ii a lalcipsak na milui uh sia vawkkeak vun.

²³Na thinsung uh le na ngaisutna uh sia a thak sitset na suaksak tavun,

²⁴tuaciangin, Pathian lim bangin kivawt a, a thiangtho, a thutang le nuntakna maan taw ama le ama hong kilak, na mithak suana uh sia na silh tavun.

²⁵Tua ahiciang, leilot thu son nawn heak vun! Mihing sim in a thu uppuite tungah thumaan son tahen, banghang ziam cile eite in Christ ii pumpi sungah nate ih hi khawm siat hi.

²⁶Na thin uh a uuk le, na thin uukna in, mawna sung thensak heak vun, thin uukna taw na nivui heak vun.

²⁷Doaimangpa hunpha na ngasak heak vun.

²⁸Ngual neisa a suttol thei sia in sutolna kheal tahen a, ama nuntak natu a thalaw natu le a zawngte a hu thei natu in, naseam tahen.

²⁹Kamsia pau heak vun, kammal manphate bek pau vun; kitaangsapna sungah a kizangh thei le hong sato thei kammalte pau vun, tua hile hong za po in, phattuamna nga tu hi.

³⁰Pathian ii suatak hong piak tu Ni kipsakna le Pathian neisa na hina hong ciamtee Pathian Thaa Thiangtho khuangaisak heak vun.

³¹Thin natna, thin tomna le thin uukna theampo na vawk vun. Ki oksatna ahibuale kiselnona, ki etsatna a tuatuamte theampo vawk vun.

³²Khat le khat tungah kithuthiam zaw vun a, thinneam tavun, Christ tungtawnin Pathian ii note mawna hong maisak bangma in, note zongh khat le khat mawna kimaisak tavun.