Read Siyin Chin Ephesus te 5 Bible Online

Ephesus te 5 - Siyin Chin bible

Ephesus te 5

¹Note sia Pathian ii it a tate na hi uh komin, ama bang na hi natu hanciam vun.

²Christ in hong it a, Pathian diksak ngimnamtui biakpiakna le sangaw biakpiakna bangin, a nuntakna hong piak bangma, itna in na nuntakna uh uksak vun.

³Note in Pathian ii mihingte na hi bangma in, numei le pa paktatna, a thasiathuai nuntakna le duhopnate note sungah son tu in zongh na nei vet heak vun.

⁴Kampauna sungah a kiihuai, a nin kammal le zummawk kammalte na zak tu uh zongh kilawm ngawl a, Pathian tungah lungdamkona kam na pau tu uh hizaw hi.

⁵A kuama po a paktatte, a thasiathuai a, a kithoaite le a duhopte (duhop sia milim biakna nam khat hi) in Pathian le Christ Ngam lua ngeingawl tu hi ci sia pha takin na he uh hi.

⁶Mawmawt kammal taw kuama in theamsak heak vun; hi thute mama hu in, Pathian ii thin uukna sia ama ii thu a ni ngawlte tungah tung tu hi.

⁷Tua ahikom tuabang mihingte taw kizopna nei heak vun.

⁸Noma mama zongh khuazing sungah om ngei na hi uh hang Topa mihingte na sua uh ciangin, khuavak sungah na om uh hi. Tua ahiciang khuavak ii neisa mihingte bangin na nungta tavun,

⁹tua khuavak in na a pha theampo, thutang suana le thumaanna hong puak hi.

¹⁰Topa ii diksak thute sin vun.

¹¹Mihingte ii sep le vawt khuazing taw a kipawl a mannung ngawlte na thutha heak vun a, tua ngamtatnate khuavak sungah then siat zaw tavun.

¹²(Amate ii khuazing sungah a sep a vawt kute sia son tu zongh in maizumhuai lei hi.)

¹³Tuaciang na theampo khuavak sungah hong kipusua tak ciang, amate pianzia babang thiang takin hong kilangh tu hi;

¹⁴banghang ziam cile a thiang takin a kilangh na khat pawpo sia khuavak suak hi. Tua hu in hi bangin kici hi; “A mutthippa awng, khanglo in, tuaciang thina pan tho in, tua hile Christ sia nang tungah hong taang tu hi.”

¹⁵Tua ahikom na nuntakzia kidawm in, heakmeal nei ngawlte bangin na nungta heak vun a, a ciimte bangin na nungta vun.

¹⁶Hunpha na nga simin, a pha in zangh in, banghang ziam cile tu hun in ngitlo hun ahi hi.

¹⁷Tua ahikom mawmaw heak vun a, Topa in nang sia bang vawt le hong oai ziam cisia na heak tu in na hanciam vun.

¹⁸No hong lalsak thei, sapittui na kham heak vun: Thaa taw na kidim zaw tavun.

¹⁹Psalm late, biakna late le la thiangtho te ii kammalte taw khat le khat na kipaupui tavun; biakna late le psalm late sa in, na thinsung theampo taw Topa pok vun.

²⁰Topa Jesus Christ min taw na theampo atu in Pathian ahi Pa tungah a tawntungin lungdam ko tavun.

²¹Christ na thasiana uh taw khat le khat tungah thu kinitna nei tavun.

²²Zite awng, Topa ii thu na nit uh bangin na pasalte ii thu ni tavun.

²³Banghang ziam cile Christ in pawlpi tungah thu a nei bangma in, pasalte in zite tungah thu nei hi: tuaciangin Christ sia a pumpi ahi pawlpi ii Hunpa ahi hi.

²⁴Pawlpi in Christ tungah thunitna a nei bangma in, zite in pasalte tungah a khawng a kheakin thunitna nei tahen.

²⁵Pasalte awng, na zite it vun. Christ in Pawlpi it a, a nuntakna a piak bangin na zite na it vun.

²⁶Pawlpi sia thiangtho a, sit baang ngawl, paubanna om ngawl a, Pathian kammal ahi tui taw a kisilthiang zawkciang Pathian tungah tua pawlpi a ki aap thei natu in pawlpi atu Christ kipia hi.

²⁸Tuabang ma in pasalte in amate pumpi a it bangma in, a zite a it natu ahi hi. Pasal khat a zi a itpa in, ama le ama ki it ahi hi.

²⁹(Kuama in ama ii pumpi a ensan a om bua hi. Christ ii pawlpi tungah a vawt bangma in, mihingte in a pumpi sia anvaak in ou zaw hi;

³⁰banghang ziam cile eite in ama pumpi ii nate ih hi hi.)

³¹Laithiangtho ii, “Hi thu hangin pa khat in a nu le a pa nusia tu a, a zi taw a kop tu hi. Tuaciangin amate nii sia khat suak tu hi,” a ci bangma ahi hi.

³²Laithiangtho sungah a thuk mama thuku khat kipualaak a, tua thu in Christ le pawlpi atu ahi hunlam ka tel hi.

³³Ahihang tuasia in note tung zongh ah kizangh thei hi; pasal khat simin ama le ama a ki it bangin a zi it tu a, zite khat simin a pasal zakta tu uh hi.