Read Siyin Chin Ephesus te 6 Bible Online

Ephesus te 6 - Siyin Chin bible

Ephesus te 6

¹Tate awng, nute pate thu na nit tu uh sia na Tapidaw vaipuak hi a, hisia in a maan sep tu sia ahi hi.

²“Na nu le na pa zakta in,” a ci sia kamciam taw a kizui thupiak masabel ahi hi:

³“Tua hile na theampo sungah na khangto tu a, leitung ah na khansau tu hi,” ci hi.

⁴Nute pate awng, na tate thin uuk natu in vawt heak vun. Tapidawte kitekna le kihilna taw khangtosak zaw vun.

⁵Silate awng, na leitung tote sia kiitakna le liinna taw a thu ni vun; tuabangin na hi uh ciang, Christ atu a seam bangma in thinsung takpi taw seam vun.

⁶Hong kipok tu thangaina taw amate hong mu sung teng bekin, tuabangin ngamta heak vun a; Christ ii sila bangin, Pathian dei sia na thin theampo taw seam vun.

⁷Sila na hina uh taw na na sep uh ciangin, mihingte bek atu seam hi ngawlin Topa atu a seam bangin maitai takin naseam vun.

⁸Topa in sila hikale sila ngawl hikale mihing sim ii a sep nasep pha tungtaang ah thaman pia tu ci in na phawk tavun.

⁹To ahite awng, silate tungah tuabang ma in na ngamta vun a, tawnna kam na zangh nawn heak vun. Note le na silate in vantung ah Topa khat nei khawm a, tua pa in a kikhaikim in mihing khat sim tungah thu hong khen tu hi ci in phawk tavun.

¹⁰A khakbel in, Topa taw kikopna pan le ama ii vaangletna lianpi taw na thahat tavun.

¹¹Doaimangpa ngitlo theamnate na nalh zawk natu in, Pathian hong piak ngalvanhte theampo na silh vun.

¹²Banghang ziam cile eite in mihing ngal ih do bua a, vantung a thaa ngilote hatna, a ukte, thuneite, hi khuazing hun sungah vaangletna neite ih do hi.

¹³Tua ahiciang tu in Pathian ngalvanhte silh vun! Tua hile hun ngilo ni hong thet ciangin ngalte ii hong simna te na nalh zo tu uh a, a tawp dongin na sim zawk uh ciang na dinmun kip lai tu hi.

¹⁴Tua ahiciang, thumaan thutak sia na kawng ah kawngkhau bang, thutang suana sia awmdalna bang,

¹⁵Lungdamna Thupha thansak tu kinginna sia peangdap bangin zanghin, a kithoaisa in om vun.

¹⁶Hun theampo sungah upna sia lum bangin toai vun; banghang ziam cile tua taw Ngilopa hong kaapna thaltang kuangte theampo na tulmit thei tu uh hi.

¹⁷Ngupna sia thik lukhu bangin na saang vun a, tuaciangin Pathian kammal sia Thaa ii hong piak namsau bangin na zangh vun.

¹⁸Hite theampo thungetna taw seam vun a, Pathian munah huna na ngen vun. Thaa ii hong lampui bangin, hun theampo sungah thu na ngen vun. Hi thu hu in pilvangin, thinkiam ngei heak vun; Pathian ii mihingte theampo atu thu na ngen tawntung vun.

¹⁹Lungdamna thuku sia hangsan tak le ngual ii tel tu ka son thei natu in, son tu ka kithoai ciang, Pathian ii ka son tu thu hong hil natu kei atu zongh thu hong ngetsak tavun.

²⁰Tu laitakin, thonginn sungah om ka hi hang, hi lungdamna thu atu in, keima sia tongciin ka hi hi. Lungdamna thu ka son tu bang a, hangsan takin ka son ngam natu thu hong ngetsak tavun.

²¹Bangbangin om khi ziam ci in na heak thei natu in, Topa nasepna sungah thumaan naseam ih suapuipa Tychicus in kei huvau thu thakte hong son tu hi.

²²Tuasia hu in, kote ka vekpi in bangbangin om khu ziam ci thu hong son tu le, note hong hanthawn tu in — ama note kungah kong paisak laitak ahi hi.

²³Pa Pathian le Topa Jesus Christ in Tapidaw suapui theampo tungah thinnopna le ki itna, upna taw hong pia khawm tahen.

²⁴A thi ngei ngawl itna taw ih Topa Jesus Christ a it te theampo tungah Pathian ii thuthiamna hong om tahen.