Read Siyin Chin Philippi te 2 Bible Online

Philippi te 2 - Siyin Chin bible

Philippi te 2

¹Christ sungah na nuntakna in, hong thahatsak a, tuaciang ama hong itna in hong thinnuamsak hi. Note in Thaa taw na kipawlkhawm uh a, tuaciang khat le khat ii tungah dikna le ciliapna na nei uh hi.

²Tua ahikom ka lungdamna nong pawlcinsak natu in ngaisutna kibangin, ki itna khat nei khawm a, thin khat lung khat hi in na om natu uh kong hanthawn hi.

³Kaangsung atu tupna bek taw ahizong, kisak thei nopna lel taw ahizong bangma seam heak vun, tua hi ngawlzaw in, khat le khat ii tungah kiniamkhiakin noma sangin ngualdangte a phazaw in ngaisun tawntung zaw vun.

⁴Noma ii kinsante bek na en heak vun a, khat le khat ii kinsante zongh na ki etpui tavun:

⁵Christ Jesus ii a nei thinpuak na nei tavun.

⁶Ama in Pathian ii pianzia nei nginge a, ahihang Pathian taw kikim natu in zawthawk thu zanghin hanciam tu a ngaisun bua hi.

⁷Tua hi ngawlzaw in, ama uuk thu in a nei theampo nusia in naseampa pianzia la hi. Ama in mihing taw kibangin piang a, mihing bangin kilangh hi.

⁸Ama in kiniamkhiak a, a thi tu in thunitna lampi tawn a — a thina thinglamtee tung dongah pai hi.

⁹Hi thu hangin Pathian in ama sia a saangbelna munah laamto a mindang khat pawpo sangin a lianzaw min pia hi.

¹⁰Tua ahikom Jesus min patoai natu in vantung, leitung ah nuntakna a nei theampo, nuai simlei ah a om theampo in khupdin tu uh a,

¹¹tuaciang a theampo in Pa Pathian minthan natu Jesus Christ sia Topa hi ci in, a kilangh takin thangsak tu uh hi.

¹²Tua ahikom ka itte awng, no kungah kong om lai in ka thu nong nit tawntung uh bangma in, no taw kong omkhop ngawl ciang ngawngawn in, ka thu nong nit tu uh sia thupi zaw lai hi. Na ngupna a cingtaak natu in launa le liinna taw na seam tan tavun,

¹³banghang ziam cile ama deina na zui thei natu le na uuk natu in Pathian sia a tawntung na sung uh ah na hong seam hi.

¹⁴Na theampo ah phun ngawl, nial ngawlin seam vun,

¹⁵tua hile mawna le ngamtat siatna taw kidim leitung mite kawmah, a sitbaang ngawl Pathian ii tate bangin a maw ngawl, a thiangthote na suak thei tu uh hi. Aksite ii van ah a taan bangma in,

¹⁶nuntakna thu amate na son uh ciangin amate sungah na taang tu uh hi. Tuabangin na hi uh le Christ Ni hong thet ciangin, no kong kiphatsak pui natu a thu ka nei tu hi, banghang ziam cile ka hanciamna sa le ka sepna sa teng a luithawthong hi ngawl hi ci in hong lak tu hi.

¹⁷Note upna hangin Pathian a kipia sangaw biakpiakna tungah piakkhiatna khat bangin ka nuntakna chisan kibua tu ahile zong ka lungdam tu a, ka thinnopna no theampo kong hawmsawn tu hi.

¹⁸Tuasia bangma in note zongh na lung uh na damsak vun a, na thinnopna uh kei nong hawm tu uh hi.

¹⁹Topa ii deina a om le noma thu ka zaakna taw ka kihansua natu in Timothy kong paisak pal thei tu hi.

²⁰Ama bekma sia kei taw ngaisutna kisi a, no hong thinnuammaw tatak pa ahi hi.

²¹Midang khat pawpo ahile Jesus Christ atu sangin, ama ii aituam thute bek kin hi.

²²Ama taktai ziate bangbangin hong lak a, ama le kei sia pata bangin lungdamna thu atu bangza in diangkhawm khu ziam ci sia na heak uh hi.

²³Tua ahikom ka vai bangbang takin hong piang tu ci in ka heak po ciang, no kungah ama kong paisak tu hi.

²⁴Keima mama no kung kong pai pal thei natu in Topa ka muang hi.

²⁵Keima hong hu tu in kamtai a na zak sa uh, kei taw kop a, naseamin ngal hong do pui ih suapui Epaphroditus kong paisak kul tu hi ci in ka ngaisun hi.

²⁶Ama in note theampo hong mu tu kaal ngakla a, a cina hi ci in na zaak uh sia a thinnuam ngawl hi.

²⁷Ama a cina takpi peu a, thi dektak zawsap hi. Ahihang Pathian in ama hesuak a, ama bek hi ngawlin kei zongh, khuangaina nasia zaw ka thuak ngawl natu in hong hesuak hi.

²⁸Tua ahikom kong paisak tu sia ka thalawp kan hi. Tua hile ama na mu uh ciang na lungdam tu a, kei khuangaina bo tu hi.

²⁹Tua ahikom Topa sungah suapui khat a hina hangin lungdamna taw na saang vun. Ama bang ahi tua mi theampo tungah zatakna lak tavun,

³⁰banghang ziam cile kei nong hu thei ngawlna munah huna hong piak natu in, Christ ii na a sepna sungah a luangkhaamin a thi dektak pa ahi hi.