Read Siyin Chin Philippi te 4 Bible Online

Philippi te 4 - Siyin Chin bible

Philippi te 4

¹Tua ahikom suapuite awng, no sia kei atu bangza in na ithuai uh a, bangza in hong phawk khi ziam! Nong lungdamsak mama uh a, note hu in ka angtang mama hi! — ka it suapuite awng, hisia in na nuntak sung teng Topa sungah na khodin tu uh zia ahi hi.

²Euodia le Syntyche te awng, kong nget nop thu in kei nong hesuakna in Topa sungah unau numeite bangin na thukim thei natu uh na hanciam vun.

³Tuaciang a thumaan ka naseppui noma zongh in, hi numeite na hu tu uh ka dei hi; banghang ziam cile amate sia Pathian ii nuntakna laibu sungah a om Clement le ka naseppui dangte theampo taw kop in, lungdamna thu kizel natu in keima taw nasia tak a diangte ahi uh hi.

⁴Topa taw pumkhat na hi hu in, a tawntung lungdam tavun. Kong ci kik hi: na lungdam tavun!

⁵Mihing khat sim tungah na cikna uh lak tavun. Topa hong pai pal tu hi.

⁶Na khat pawpo atu in thinngim heak vun, ahihang na thungetna theampo ah na kisap uh te, Pathian tungah lungdamko nopna thin taw na ngen tawntung vun.

⁷Tua hile mihing tel zawk ngawl Pathian ii thinnopna in Christ Jesus taw na kipumkhatna hangin, na thin na lung hong ngammuangsak tu hi.

⁸A khakbel kong cinopna ah ka suapuite awng, thupha le a pok huai thute: a thumaan, mipi tan huai, a thutang, a thiangtho, a ithuaite le a thasiahuai nate na ngaisun tavun.

⁹Ka kammalte le ka ngamtatnate pan na heak uh, na saan uhte sia na zangh vateak tavun. Tua hile eite thinnopna hong pia Pathian in no taw hong omkhawm tu hi.

¹⁰Topa taw kipumkhat a ka nuntak sungah a khuangei hun khat zawkciangin khatvei ma nong thin nopmawkna uh nong lak thei lai natu in, hunpha nga kik na hi uh ciangin ka lungdamna lian hi. Hong kin ngawl nu hi kong ci bua hi — nong thin nopmawkna uh nong lak tu hun om ngawl hi bek hi.

¹¹Hi bang ka ci ciang hong kingaingon kong sakna hi tuan ngawl hi, banghang ziam cile ka nei babang taw lungkim natu ka sin sa ahi hi.

¹²Cimawkna le ci thei zawknate ka he hi. A koima pawpo ah bang hun po ahizong ngilvana le ngilkialna, hauna le zawnna sungah, lungkim thei natu in hi thuku ka sin sa ahi hi.

¹³Christ ii hong piak vaangletna taw na theampo phul zawk natu thahatna ka nei hi.

¹⁴Tua ahitazong, ka ngim nganate ah nong hu uh sia na phat mamana uh hi.

¹⁵Lungdamna Thupha ka hil kipat sawng, Macedonia ka nusiat ciangin kei hong hu pawlpi sia noma bekma na hi hunlam noma Philippi te in pha tak ma na heak uh ahi hi; ka nganate le ka supnate ah noma bekma in nong sikpui uh hi.

¹⁶Thessalonica khua ah huna ka kisap laitakin khatvei bek hi ngawlin, huna nong thathaak uh hi.

¹⁷Letsong nga tute a thangai ka hi bua hi; na thupha vawt sate tungah a meet a kibelap tu ka mu nopna hizaw hi.

¹⁸Tua ahikom hi sungah nong piaksa uh theampo kong saanna lai om a — kicing vaal hi! Epaphroditus in na letsong uh theampo hong puak ahikom, tu in ka kitaangsap theampo nei zo khi hi. Tuate in Pathian mai ah ngimnamtui piak taw kibangin a saannophuai le dik a sak biakpiakna hi.

¹⁹Tuaciang ka Pathian in Jesus Christ tungtawnin a kicing ama hauna theampo taw kizui in na kitaangsap theampo hong sik tu hi.

²⁰Ih Pathian le Pa tungah minthanna a tawntung, a tawntungin om tahen! Amen.

²¹Jesus Christ ii neisa ahi Pathian mihing khat sim tungah kong paupui hi. Hi sungah keima taw a om u le naute in nuksetna kam hong thaak hi.

²²Hi sungah a om Pathian mite theampo, a tuanin Kumpilianpa inn sungah a omte in hong paupui hi.

²³Topa Jesus Christ ii thuthiamna note theampo taw om tahen.