Read Siyin Chin Colossae te 2 Bible Online

Colossae te 2 - Siyin Chin bible

Colossae te 2

¹Kei akua ci hong he ngawl midangte le Laodicea a om mihingte le note atu in bangzata haksa in naseam khi ziam ci sia kong son tu hi.

²Hi bang ka ngamtat sia amate thinletna taw a kidim natu, ki itna sungah a kikaizot natu, le thumaan heakna pan a piang thinmuanna a kicing hauna a nei thei natu deina ahi hi. Hisia lam panin Pathian thuku ahi Christ ama mama sia amate in he tu uh hi.

³Pathian ciimna le heakna a kiphualseal sumngum theampo a kihonna tawtang sia ama ahi hi.

⁴Tua ahikom kong son hi, bangza po in pha tu bang ahitazong, kinialna maan ngawlte taw kuama in na theamsak heak vun.

⁵Banghang ziam cile ka pumpi taw hong omkhawm ngawl ka hihang ka thinsung taw note kungah kong om hi, tuaciangin Christ ih upna sungah kip takin na din khopna uh ka mu ciangin ka lungdam hi.

⁶Jesus Christ sia Topa a na saan zawk uh nungsang, ama taw kikopin nungta tavun.

⁷Ama sungah zung thuk tha vun a, ama tungah na nuntakna uh sa to tavun, tuaciangin hong kihil sa bangin na upna sungah hat seseam vun. Lungdamkona taw na kidim tavun.

⁸Tua ahikom Christ sung pan ahi ngawl, vaannuai a uk thaa te ii mihingte tungah a piak susuk a mannung ngawl kitheamna, mihing ciimnate taw kuama in sila a hong mat ngawl natu in kikeam tavun.

⁹Banghang ziam cile thaa pianzia sia Christ le ama ii mihing a hina sung mama ah a cing takin teang a,

¹⁰tuaciangin ama taw na kikopna uh sungah a kicing nuntakna hong pia zo hi. Ama sia thaa lam sangah a ukte le thuneite khat sim sangin lianzaw hi.

¹¹Jesus taw kikopna sungah note vunteap at sa na hi uh a, mihing vunteap atzia taw hi ngawlin, hi mawna pumpi thahatna pan hong suatak Christ vunteap atzia taw hong ki at zo hi.

¹²Cinopna in na ki baptize uh ciang Christ taw a kivui sa na hi zo uh a, na ki baptize na in thina pan a thokiksak Pathian ii vaangletna sungah na upna tungtawnin note zongh Christ taw hong kitho kik khawmsak zo hi.

¹³Hun khat lai in, na mawna uh hang le Thukham nei ngawl Gentile te na hi uh hangin note sia thaa lam ah a thisa na hi uh hi. Ahitazong tu in Pathian in Christ taw nuntakna sungah hong then zo hi. Pathian in ih mawna theampo hong maisak zo hi.

¹⁴Ama in eite hong heencip ahi thusia tepteena leiba theampo hong phiatsak a, thinglamtee tungah hong kilcipsak siat zo hi.

¹⁵Tuaciang tua thinglamtee tungah Christ in thaa lam sangah ukna neite le thuneite ii vaangletna pan ama le ama kisuaktasak hi; tuate sia ama ngalzaw poai sungah sila tu in a kimante bangin mihonte ii mu tu in kai hi.

¹⁶Tua ahikom neak le dawn huvau ahizong, a thiangtho nite huvau ahizong, Thadet poai le Sabbath nipi huvau ahizong note tungah zui tu ngeina vawtsak heak vun.

¹⁷Tuabangte theampo sia maisang a hong pai pheang tu nate ii limh ahi hi; a tatak sia Christ ahi hi.

¹⁸Vawttawm kiniamkhiakna le vantunglalangte bia in hong sawl a, mukhol thei tuam a neina hangin thupi a kisate ii hong puavawk tu sia noma le noma na ki oai heak vun. Bangma thu om ngawl bulin tuabang mihingte sia a mihing khua ngaisutna taw kisuangtaak uh a,

¹⁹tuaciang pumpi lutang ahi Christ thasua uh hi. Christ ukna nuai ah pumpi bup kipuua to a, a ngu le a sapiatte in a om natu san tek len in Pathian dei bangin khangto uh hi.

²⁰Note Christ taw thi khawm zo a, vaannuai a uk thaa te panin hong kisuaktasak zo hi. Tua ahile banghangin hi leitung ii neisa bangin nungta nu ziam?

²¹“Hisia tham heak in, tuasia tep heak in, a dang sia thutha heak in,” ci bang thukhamte banghangin ni nu ziam?

²²Hite in khatvei a kizak zawkciang, kimanna a nei nawn ngawl thute a cina hi; tuate in mihing vawttawm ngeinate le hilnate hi bek hi.

²³Tuabang ngeinate sia ciimna bulphu in a piang hi tuak a, vantunglalangte biak tu sawl ngawpna sung, vawttawm kiniamkhiakna sung le pumpi nasia tak a ngim piakna sungah kizangh hi; ahihang tuate in pumpi deinate ukna tu in bangma man nei ngawl hi.