Read Siyin Chin Colossae te 4 Bible Online

Colossae te 4 - Siyin Chin bible

Colossae te 4

¹To ahite awng, na sila te tungah dikna le thutang taw na ngamta vun. Vantung ah note zongh in Topa khat na nei uh hunlam phawk tavun.

²Thu na ngen tawntung nanak vun. Thu na nget uh ciang na pilvang vun a, Pathian tungah lungdam na ko vun.

³Ko atu zongh hong ngetsak tavun, tua hile Pathian in Christ ii thukute huvau ka hil natu hunpha hong pia tu hi. Banghang ziam cile tua thu in tu laitak a, thongsung a ka omna thu ahi hi.

⁴Tua ahikom tua thu a thiang a, ka son tu bangin ka son thei natu in thu na ngetsak vun.

⁵Thu um ngawlte tung na ngamtatna uh ah ciimna na zangh vun a, hunpha na nga uh theampo a pha takin na zangh vun.

⁶Na kampau na uh sia a zaak nop huai hi tu a, a lawp huai hi tawntung tu hi, tuaciangin mihing khat sim tungah a maanin na zo kik thei tavun.

⁷Ih it ih suapuipa Tychicus, a thumaan naseampa le Topa nasepna sungah ih naseppui pa in kei huvau thupiang thakte hong son siat tu hi.

⁸Note kungah ama kong paisakna in tua thu hang ahi hi, kote bangbangin om ka hi uh hunlam hong son ciangin na thin uh a nop natu ka deina ahi hi.

⁹Ama in Onesimus a kici khat taw hong ton hi, tua pa in a thumaan suapui hi a, no pawl sungah hong kihel khat ahi hi. Amate nii in hi sungah thupiang theampo hong son tu hi.

¹⁰Kei taw thong sungah a om Aristarchus in hong paupui hi, tuasia bangma Barnabas suapuisealpa Mark zongh in hong paupui hi. (Mark sia no sangah hong pai ahile vai na muak vun ci in sawlna zongh nga zo nu hi)

¹¹Justus zongh a kici Joshua zongh in paupuina kam hong thaak hi. Hite thum in Jew te sung pan hong kikhealte hi a Pathian ngam atu kei taw na a seam khawmte hi a, amate in nasia takin hong hute ahi uh hi.

¹²Epaphras zongh in hong paupui hi, ama in Jesus Christ ii naseampa khat hi a noma pawl sungah a kihel khat ahi hi. Ama in Pathian tungah note sia a khanthin le a cingtaak tak a, a thinzo Tapidawte, Pathian ii deina bang a, khuangkhim takin a zuite bangin kho takin, na din natu in nasia tatakin thu hong ngetsak tawntung hi.

¹³No atu le Laodicea le Hierapolis ah a om mihingte atu in nasia takin na a seampa hi ci in keima tatak ma in tetti ka pang hi.

¹⁴Ih it syavuan Luke le Demas in paupuina kam hong thaak hi.

¹⁵Laodicea khua ah a om ih suapuite le Nympha le tua nu inn ah a kikhawm pawlpi tungah thupha ka deisaknate na sonsak vun.

¹⁶Hi laithak na sim zawk uh ciangin Laodicea pawlpite zongh in na simsak hamtang vun. Laodicea khua a om ih suapuite hong puak tu lai sia zongh na sim vun.

¹⁷Tuaciangin Archippus munah, “Topa nasepna sungah, na sep tu hong kipiate na zaw thei natu na son in,” na cisak vun.

¹⁸Paul ii hong paupuina ci in hi lai, keima khut vateak taw ma kong at hi. Koltaang ka hi hong mangil heak vun! Pathian ii thuthiamna in no taw hong om tahen.