Read Siyin Chin 1 Thessalonica te 1 Bible Online

1 Thessalonica te 1 - Siyin Chin bible

1 Thessalonica te 1

¹Paul, Silas le Timothy kung pan — Pa Pathian le Topa Jesus Christ ii neisa ahi Thessalonica pawlpi mite tungah: Thuthiamna le kilemna sia no aa hi tahen.

²Note theampo atu in Pathian tungah lungdam ka ko tawntung a, tuaciang thungetna sungah na min kong lo tawntung uh hi.

³Upna na zakzia uh, itna na nei uh hu a, nasia takin na nasepna zia le ih Topa Jesus Christ sungah na lametna uh a kipzia sia ih Pa Pathian mai ah kong phawk uh hang ahi hi.

⁴Ko ii suapuite awng, Pathian in note hong it a, ama atu in hong tealsa na hi uh sia ka he uh hi.

⁵Banghang ziam cile Lungdamna Thupha sia, kammal nguak taw hi ngawlin, vaangletna le Thaa Thiangtho taw zongh le a thumaan thutak saan tatakna taw no kungah kong puak uh hi. Note taw ka om uh lai in bangbangin nungta khu ziam ci in nong he uh hi; tuate in noma ii phat natu ahi hi.

⁶Koma le Topa ettee in nong zui uh hi; nasia takin thuak na hi ta uh zong, Thaa Thiangtho kung pan hong pai tua thu sia lungdamna taw na saang zo uh hi.

⁷Tua ahikom note sia Macedonia le Achaia ah thu umte theampo atu in ettee tu khat na suak uh hi.

⁸Bangbang ziam cile Topa thu in no tung pan Macedonia le Achaia kaantan in pai a, tua bek dom ngawlin, Pathian na upna uh thu sia mun theampo ah thang hi. Tua ahikom thudang bangma ka son tuan tu kisamh ngawl hi.

⁹Tua mihing theampo in kong haw uh lai a, nong saan zia uh, milim biakna pan Pathian sangah na kikhealna uhte son tek a, a maan le a nungta Pathian atu sepsak tu le,

¹⁰hong tung tu Pathian thin uukna pan hong suatak, ama ii thina pan a thawsak, vantung pan hong pai tu — ama Tapa Jesus ngak tu in na om uh thute son hi.