Read Siyin Chin 1 Thessalonica te 3 Bible Online

1 Thessalonica te 3 - Siyin Chin bible

1 Thessalonica te 3

¹A khakbel ciang ka thuak zo nawn bua uh hi. Tua ahikom Athens ah koma nguakin, om tu in ka khensat uh hi.

²Tua lanin, Christ huvau Lungdamna Thupha hil a, Pathian atu ko taw naseam khawm ko ii suapui Timothy kong paisak uh hi. Hong thakhosak tu le, na upna uh sungah hong hu tu in kong paisak uh a,

³hi vawtsiatna hu in, kuama na nungtol kik ngawl natu ka deina uh ahi hi. Tuabang vawtsiatna in Pathian ii ei atu a deina thu khat om hi ci in, noma ma in na he uh hi.

⁴Banghang ziam cile noma taw ka om nginge laitakin, ko hong kivawtsiat natu te kong sonkhol zo uh hi; tuaciang na heaksa uh bangma in, tuabang tatak ma in hong piang hi.

⁵Tuasia hu in Timothy kong paisak kul hi. Vei zo nawn ngawl ka hikomin na upna uh dawp tu in ama kong paisak hi. Doaimangpa in no hong ze et zo a, ko nasep teng a luithawthong hi zo ci sia suak thei mama ngawl tu hi!

⁶Tu in Timothy hong heak kik zo a, tuaciangin ama na upna uh le, na itna uh taw kisai ka ngalaak uh thu, hong puak hi. Ama in kote tung hong sonna pan, a pha in nong ngaisut tawntung na uh le, ko ii kong mu nop uh bangma no zongh in nong mu nopna thu ahi hi.

⁷Tua ahikom ka ngimna uh le ka thuakna theampo sungah, note ii thu in thin letna hong pia hi, suapuite awng. Ko hong thinliansak sia in noma upna ahi hi,

⁸banghang ziam cile tu in na nuntakna sungah Topa taw pum khat a, a kho in na ding uh le a nungta takpite ih hi hi.

⁹Tu in note atu in Pathian tungah lungdam ka ko thei zo uh hi. Note hangin ama mai ah lungnopna ka nei uh hu in Pathian tungah lungdam ka ko uh hi.

¹⁰Maitang kisi a, kimu thei natu le na upna uh sungah a kisamh sia hong piak thei natu a sun a zanin, ka thin theampo taw thu ka ngen uh hi.

¹¹Ih Pa Pathian mama le ih Topa Jesus in no kungah kong pai thei natu in lampi hong sialsak tahen!

¹²Khat le khat na ki itna uh le mihing theampo na itna sungah khangto vaialin, noma kong itna a lian za ma in na ki it natu uh, Topa in hong siam tahen.

¹³Hi bangin ama in no hong thahatsak tu a, ama ii neisa mihing theampo taw Topa Jesus hong pai ciang, ih Pa Pathian omna ah sit baang ngawlin na thiangtho tu uh hi.