Read Siyin Chin 1 Thessalonica te 4 Bible Online

1 Thessalonica te 4 - Siyin Chin bible

1 Thessalonica te 4

¹A khakbelin suapuite awng, Pathian ii diksak nuntakzia sia, ko tung panin na sin sa uh ahi hi. Hisia in note nuntakzia sia ma ahi hi. Tu in tua sang zong a nasia zaw in na nuntak natu uh Topa Jesus min taw kong ngen uh a, kong thawn uh hi.

²Banghang ziam cile Topa Jesus thuneina taw hilna kong piakte na he uh hi.

³Pathian in note thiangtho in, numei le pa paktatna pan a thiangtho tak a, a kipealte na hi tu uh hong dei hi.

⁴No pasalte khat sim in, na zi uh taw a thiangtho le a thasiahuai in nuntakzia tu na heak uh kul hi.

⁵Pathian a he ngawlte bangin cii le sa deina taw na nungta heak vun.

⁶Tua ahikom hi thu tungtaang ah, kuama in ama ii Tapidawpuipa tungah khial ngawl tu a, hamphatna in la thei ngawl tu hi. Hi thu kong son ngei zo uh a, tuabang a ngamtate Topa in daan pia tu hi, ci in nasia takin kidop natu kong son zo uh hi.

⁷Pathian in eite sia paktatna taw nungta ngawlin a thiangtho nuntakna taw a nungta zaw tu in hong sam hi.

⁸Tua ahikom, hi kihilna a nial pawpo sia mihing nial ahi bua a, a Thaa Thiangtho no tungah hong pia Pathian nial ahi hi.

⁹Noma thu up puite itna tu huvau lai at tu kul ka sa bua uh hi. Khat le khat na ki it natu in Pathian in no tung mama ah hong hil zo hi.

¹⁰Tuaciang a tatak ci leang Macedonia ngam mun theampo ah a om, suapui teng tungah tuabangin na ngamta zo uh hi. Tua ahikom suapuite awng, tu a sangin zongh a kician zaw lai in na ngamta tavun.

¹¹Kong son ngeisa bangma in, na nuntakna sungah nuam hithiatin na nuntak tu, noma taw kisaite bek ngaisutin nei tu, noma nuntak natu in na thalaw natu uh teng sia tup in na nei vun.

¹²Hi bang teng taw in thu um ngawlte ii zatakna na nga tu uh a, tuaciang na kitaangsapna tungtaang ah kuama na konlaw uh a kul buatu hi.

¹³Ko ii suapuite awng, lametna a nei ngawlte bangin na khuangai ngawl natu in, a thisate huvau thumaan thutak na heak tu uh ka dei uh hi.

¹⁴Jesus thi a, tho kik hi, ci in ih um hi, tua ahikom ama um a, a thite sia Pathian in Jesus taw hong la kik tu hi, ci in ih um hi.

¹⁵Tu a kong hil uh sia in Topa ii hilcianna ahi hi: Topa hong pai ni in, ei a nungta laite in a thisate mai ah ih pai buatu hi.

¹⁶Vantunglalangte sung pan a lianbel sia ii aw taw thupiak auna, Pathian lemle aw om tu a, tuaciang Topa ama mama vantung pan hong tuaksuk tu hi. Christ um a, a thite hong tho masabel tu a,

¹⁷tua hunin a nungta lai eite sia Topa taw vui sungah kisi tu in, amate taw meei sungah hong kikaikhawm tu hi. Tuabangin eite in a tawntungin Topa taw ih omkhawm tu hi.

¹⁸Tua ahikom, hi kammalte taw khat le khat na kihanthawn tavun.