Read Siyin Chin 1 Thessalonica te 5 Bible Online

1 Thessalonica te 5 - Siyin Chin bible

1 Thessalonica te 5

¹Suapuite awng, hi thute hong pianna tu a hun a taang huvau, lai kong at tu uh kul sa ngawl khu hi.

²Banghang ziam cile noma ma in Topa Ni sia, zan lai a, nguta khat hong pai bang in, hong pai tu hi, ci in a pha tak na he uh hi.

³Mihingte in, “Na theampo thim khipkhep hi, lungmuanna om hi,” a ci laitakin thakhat thu in, siatna sia amate tungah hong theng vat tu hi! Nau a suak tu numei khat sia nautun a, a nat bangin thakhatin hong pai tu hi, tuaciang mihingte a suakta buatu uh hi.

⁴Ahihang suapuite awng, note in khuazing sungah om ngawl nu hi, tua ahikom tua Ni in nguta khat hong pai a, lamdang na sak bang ahi buatu hi.

⁵Note theampo in khuavak ii neisa, sun hun ii neisa na hi uh hi. Eite sia zan ii neisa, khuazing sungah a omte ih hi bua hi.

⁶Tua ahikom ngualdangte bangin ih mutthip buatu hi; eite khangciimin ih pilvang tu hi.

⁷Zan sia mihingte mut hun hi; zanin amate zukham uh hi.

⁸Ahihang eite in sun hun ii neisa ih hi a, ih pilvang kul tu hi. Eite in upna le ki itna sia awmdalna in ih silh tu a, ih lamet ngupna sia thik lukhu bangin ih khuk kul hi.

⁹Pathian in eite sia a thin uukna thuak tu in hong teal bua a, Topa Jesus Christ tungtawnin, ngupna a nga tu in hong teal hi zaw hi.

¹⁰Ama hong pai ciang, ih thi a ih nung zong, ama taw ih nuntak khop thei natu in eite atu a thi ahi hi.

¹¹Tua ahiciang tu laitak a, na sep uh bangma in khat le khat kihanthawnin na kihuu tavun.

¹²Suapuite awng, Tapidaw nuntakna sungah lam hong lak, hong hil a, no sungah na hong seamte tungah ahi tu bang zatakna na piak natu in kong ngen uh hi.

¹³Amate ii sepna hu in itna le zatakna lianbel taw na kizom tavun. Noma sungah kilemna taw na om tavun.

¹⁴Suapuite awng, hi bangin kong hanthawn uh hi. A zuzaute kidop natu thu na pia vun a, a lauthauhte na hansua vun, a thazawmte na hu vun, a kuama theampo tungah thinsau in na khual vun.

¹⁵Khialna sia khialna taw in na thuk heak vun a, khat le khat tung le mihing theampo tungah phatna vawt tu sia hun theampo sungah na tup na sawm uh na hisak tavun.

¹⁶A tawntungin lungdam vun,

¹⁷hun theampo sungah thu ngen tawntung vun,

¹⁸na theampo sungah lungdamko vun. Christ Jesus taw pumkhat a, na nuntak sungah Pathian hong deisak thu in hisia ahi hi.

¹⁹Thaa Thiangtho na khaam heak vun;

²⁰Pathian tung pan hi a kici kamsaannate sia zawngsak heak vun.

²¹Na theampo na sittel vun: a pha teng na keam tavun,

²²A sia nam theampo na pial tavun.

²³Eite thinnopna hong pia Pathian in note a nanam in hong thiangthosak tahen, na nuntakna buppi - na thaa, na thinsung le na pumpi — hong keam tahen, Topa Jesus Christ hong pai ciangin sepkhial vawtkhial theampo taw hong kipealsak tahen.

²⁴Hong sampa ama in na hong seam tu hi, banghang ziam cile ama thumaan hi.

²⁵Suapuite awng, ko atu zongh thu hong ngetsak tavun.

²⁶Thu um theampo suapui kinapna taw na kimuak tavun.

²⁷Thu um mi theampo tungah hi laithak na sim natu in Topa thuneina suangin kong thawn hi.

²⁸Ih Topa Jesus Christ ii thuthiamna no tungah hong om tahen.