Read Siyin Chin Joshua 10 Bible Online

Joshua 10 - Siyin Chin bible

Joshua 10

¹Jerusalem kumpipa Adonizedek in Joshua ii Ai khua la zo a, Jericho khua le a kumpipa a vawt bangma in, a zaancip sakna, a kumpipa a thalupna thu teng za hi. Ama in Gibeon mite sia Israel mite taw kilemna vawt a, amate taw teang khawm hi ci in za si hi.

²Jerusalem mite sia nasia takin patau uh hi, banghang ziam ci le Gibeon sia kumpi a nei khuapi lian khat pawpo cia ma pha hi; Ai sangin zongh lian zaw a, a mite zongh ngalsim thiam vive hi.

³Tua ahikom Adonizedek in Hebron kumpipa Hoham, Jarmuth kumpipa Piram, Lachish kumpipa Japhia, Eglon kumpipa Debir te tungah thu puak a:

⁴“Hong pai tavun, Gibeon hong sim pui tavun, banghang ziam cile amate in Joshua le Israel te taw kilemna vawt hi,” ci hi.

⁵Hi Amor kumpi nga ahi Jerusalem, Hebron, Jarmuth, Lachish le Eglon te kumpipa te ii ngalkap teng kingawmtua a, Gibeon khua kiim uum in sim uh hi.

⁶Gibeon mite in Gilgal ngiaphual ah Joshua atu kam thaak a: “Topa awng, ko hong nusia heak in! A manlang in hong pai tavun a hong hu tavun! Hong hun tavun! Mualtung ngam a teang Amor kumpite theampo in a ngalkap teng ngawmtua in ko hong sim uh hi!” cisak hi.

⁷Tua ahikom Joshua le a ngalkaphonpi bup, ngalkap phabel te kihel a, Gilgal panin kuan uh hi.

⁸TOPA in Joshua munah, “Amate kiita heak in. Keima in nang zawna hong pia zo khi hi. Amate khat zongh in nang hong nang zo ngawl tu hi,” ci hi.

⁹Zankhuateakin Joshua le a ngalkaphonpi sia Gilgal pan Gibeon khua sang zuanin kuan uh a, Amor te heakkhol ngawlin sim uh hi.

¹⁰TOPA in Amor te sia Israel ngalkaphonpi a mu po ciang patau keaksak hi. Israel te in amate Gibeon ah a thatlup kawmin, Beth Horon mualciangh ah delsuk a, thang sangah Azekah le Makkeda dong simsuk lai hi.

¹¹Amor te mualciangh zui in Israel ngalkaphonpi mai ah a taisuk laitak, TOPA in ngialtang puite Azekah lampi tawntung kiasak hi. Israel te ii thalup sangin ngialtang ii denlup tamzaw hi.

¹²TOPA in Amor te tungah Israel te zawna a piak ni in, Joshua in TOPA paupui hi. Israel mai ah ama in “Ni awng, Gibeon tung san ah ding zii in; Tha awng, Aijalon Kuam tungah tawlnga in,” ci hi.

¹³Ni zongh tawlnga a, tha zongh Israel te ii a ngalte a zaw thal dong a kiin bua hi. Hisia sia Jashar Thubu sungah ki at hi. Ni sia van laizang ah ding zii a, ni khat bup a tum suk bua hi.

¹⁴Tua masia hikale a zawkciang hikale TOPA in mihing khat ii thu a nit hun, tuabang ni khat om ngeingawl hi. TOPA sia Israel sangah pangin ngalsim hi.

¹⁵Hi sia zawkciang Joshua le a ngalkaphonpi Gilgal ngiaphual zuan kik uh hi.

¹⁶Amor kumpi nga teng ahile suakta in Makkedah suanghawng sungah buu uh hi.

¹⁷Pawlkhat in amate mu a, a bukna mun Joshua hil uh hi.

¹⁸Ama in, “Suang hawng mai ah suangtum pawlkhat lumliik vun. A cing tu pawlkhat koi vun,

¹⁹ahihang noma tatak tua munah om heak vun; ngalte zuizen vun a, a nungsang pan sim vun; a khuapite ah thengsak kik heak vun! TOPA na Pathian in amate tungah noma zawna hong pia zo hi,” ci hi.

²⁰Joshua le Israel mite in amate thatlum hi, ahihang pawlkhatte sia a khuapi luphung pangte sung sang theng thei a, kithatlum ngawl hi.

²¹Joshua ii mite a vekpi in bangma tat ngawlin Makkedah ngiaphual, ama kungah hong cia kik uh hi. Ngam sungah a om mite kuama in Israel te sia sonsia ngam ngawl liang hi.

²²Tua zawkciang Joshua in, “Suanghawng tumna sia hong keak vun a, tua kumpi nga teng ka kungah hong paipui tavun,” ci hi.

²³Tua ahikom suanghawng sia hong keakin, Jerusalem, Hebron, Jarmuth, Lachish le Eglon kumpipa nga teng pusua a,

²⁴Joshua kungah paipui uh hi. Joshua in Israel mi theampo sam a, ama taw a kuankhawm ngalkap bute munah, tua kumpite ngawng ah a peang uh nga in sawl hi. Tuabangin ngamta uh hi.

²⁵Tuaciang Joshua in a ngalkap bute munah, “Kiita heak vun a, thinkiam heak vun. Na thin khosak vun a kimuang vun, banghang ziam cile hisia in na ngalte theampo tungah TOPA sep tu sia ahi hi,” ci hi.

²⁶Tua zawkciang Joshua in kumpi nga teng thatlum in thingkung nga tungah a luangte nitak sang dong khai uh hi.

²⁷Nitum ciangin Joshua in thupia a, amate buk maksakna suanghawng sungah a luangte lawnsak hi. Suangtum puite suanghawng tumna ah koi uh a, tuate tua munah om lai hi.

²⁸Joshua in Makkedah khua sim a, a zaw ni in a kumpipa man hi. A khua mi theampo khat zongh hingkhoai ngawlin that siat hi. Jericho kumpipa a vawt bangma in Makkedah kumpipa tungah vawt hi.

²⁹Tua zawkciang Joshua le a ngalkaphonpi Makkedah panin Libnah ah pai in sim hi.

³⁰TOPA in Israel te hi khuapi le a kumpipa zosak leleau hi. Amate in kuama khoaikhe ngawlin a sungah a om mi theampo thatlum siat uh hi. A kumpipa tungah Jericho kumpipa a vawt bangin amate in vawt uh hi.

³¹Tua zawkciang Joshua le a ngalkaphonpi Libnah panin Lachish ah paitanin tuasia kiim uum in sim uh hi.

³²A kido zawk ni nii ni ciang TOPA in Israel te Lachish khua zosak hi. Libnah ah a vawt uh bangma in kuama khoaikhe ngawlin khuapi sungah a om mi theampo thatlum uh hi.

³³Gezer kumpipa Horam in Lachish hu tu hong pai ahihang Joshua in a ngalkaphonpi zothal in, amate kuama hingkhoai ngawl hi.

³⁴A kizomin Joshua le a ngalkaphonpi sia Lachish panin Eglon ah pai suak a, tua khua kiim uum in sim uh hi.

³⁵Tua ni ma in a khuapi la in, tuasung ah a om theampo Lachish ah a vawt bang keak ma in thatlum uh hi,

³⁶Hisia zawkciang Joshua le a ngalkaphonpi Eglon panin mual tungah kaato in Hebron sim uh a,

³⁷tua khua la uh hi. A kumpipa le a dang khuapi sungah a om theampo ahi zong khua nai nate sungah a om theampo ahi zong thatlum uh hi. Joshua in tua khuapi sia Eglon a vawt lai bangma in zaancipsak hi. Kuama a hingkhoai bua hi.

³⁸Tua zawkciang Joshua le a ngalkaphonpi sia Debir ah heak kik in, tua khua sim uh hi.

³⁹Ama in tua khua le a kumpipa, tuaciang a naina khua theampo la hi. Tua mun a om theampo thatlum siat uh hi. Hebron, tuaciang Libnah a kumpipa tungah a vawt bangin Joshua in Debir le a kumpipa tungah vawt hi.

⁴⁰Tua ngam le lei buppi sia Joshua in zothal hi. Mualtung ngam, nisuana sang mualpanghte le nitumna sang mualpeangte ii kumpite ahizong, thangsang mun kona ngam kumpite ahizong zo siat hi. Kuama khoaikhet nei ngawlin thatlum siat hi. Hisia sia TOPA Israel te ii Pathian thupiak ahi hi.

⁴¹Joshua ii ngalsimna sia thangsang Kadesh Barnea pan tuipi hui Gaza, Goshen ngamkhen teng kihel in, saksang pan Gibeon dong ahi hi.

⁴²Joshua in hi kumpite le a ngam a lei teng theampo nawk khat in zo siat hi, banghang ziam cile TOPA Israel te ii Pathian sia Israel atu in ngal sim hi.

⁴³Hisia zawkciang, Joshua le a ngalkaphonpi Gilgal ngiaphual zuan kik uh hi.