Read Siyin Chin Joshua 13 Bible Online

Joshua 13 - Siyin Chin bible

Joshua 13

¹Joshua sia tu in huai mama zo hi. TOPA in ama munah, “Nang huai mama zo ni hi, ahihang ngam le lei tam mama laak tu om lai hi:

²Philistia le Geshur te ngam theampo,

³thang sangah Avvim te ngam theampo zongh ahi hi. (Shihor lui pan Egypt te ngamngi dong, saksang pan Ekron te ngamngi dong leitang teng sia Canaan te ngam in kingaisun hi; Philistine kumpite sia Gaza, Ashdod, Ashkelon, Gath, le Ekron ah teang hi.)

⁴Canaan te ngam theampo le Mearah (Sidon te neisa hi) om lai a, Amor te ngamngi a om Aphek dong hi a;

⁵Gebal te ii ngam; nisuana ah Lebanon bup, Hermon Mual ii thangsang Baalgad pan Hamaath Mualciangh dong ahi hi.

⁶Hisia Lebanon Mualte le Misrephoth Maim kilaklaw mualtung ngam a teang Sidon te ngam theampo kihel hi. Israel mite a mai sang a nawk kawmin hi mite theampo ka notkhia tu hi. Kong sawl sa bangma in ngam le lei te sia Israel mite sungah na hawmsak tu uh hi.

⁷Tua ahiciang tu in, Israel nam kua le Manasseh ii nam a lang teng ii tan tu in hawmsak in” ci hi.

⁸Reuben le Gad nam te le Manasseh ii nam a lang teng in TOPA naseampa Moses ii piaksa ngam le lei tek nga zo a; tuasia Jordan ngun ii nisuana sangah om hi.

⁹Amate ii ngam sia Aroer (Arnon Kuam ii kiil ah a om) le tua kuam ii laizang a om khuapi dong zai a, Medeba pan Dibon dong mual zaangtam theampo kihel hi.

¹⁰Tuasia Ammon te ngamngi dong hi a, Heshbon pan a uk Amor te kumpipa Sihon ii khuapi theampo zongh kihel siat hi.

¹¹Gilead, Geshur le Maacah ngamte, Hermon Mual bup le, Bashan bup Salecah dong kihel hi.

¹²Ashtaroth le Edrei panin a uk Rephaim kumpi nam a khakbel ahi Og ii kumpi ngam kihel hi. Moses in hi mite sia zo in notkeak hi.

¹³Ahihang Israel te in Geshur le Maacah mite not ngawl uh a; amate Israel ngam ah teang lai uh hi.

¹⁴Moses in Levi nam sia ngam le lei a pia bua hi. TOPA ii Moses tungah a sonsa bangma in Israel ii TOPA Pathian biakpiakna tau tungah a hal sangaw biakpiaknate sung pan tel khat sia amate in tang tu hi.

¹⁵Moses in ngam khen khat sia Reuben ii nam innkuante tan tu in pia hi.

¹⁶Amate ngam sia Aroer (Arnon Kuam kiil a om) le tua kuam laizang a om khuapi dong hi a Medeba mual zaangtam kiim teng kihel hi.

¹⁷Tuasia sungah Heshbon le mual zaangtam tung a om khuapite: Dibon, Bamoth Baal, Beth Baalmeon,

¹⁸Zahaz, Kedemoth, Mephaath,

¹⁹Kiriathaim, Sibmah, tua kuam sung mual tung a om Zereth Shahar,

²⁰Bethpeor, Pisgah Mual pangh suk teng le Beth Jeshimoth kihel hi.

²¹Heshbon pan a uk Amor te kumpipa Sihon kumpi ngam bup le mual zaangtam a om khuapite kihel hi. Moses in ama zo a, Midian a ukte: Evi, Rekem, Zur, Hur le Reba te zongh zo hi. Amate theampo in Kumpipa Sihon atu in ngam uk uh hi.

²²Israel te ii thalupte sungah Beor tapa Balaam, aisaan thei pa kihel hi.

²³Jordan sia Reuben nam ii nitumna ngamngi ahi hi. Hi khuapite le khuate sia Reuben nam innkuante tan tu in kipia hi.

²⁴Moses in zongh ngam khen khat sia Gad nam innkuante tan tu in a piaksa hi.

²⁵Amate ii ngam sia, Jazer le Gilead khuapi theampo, Ammon ngam a lang, Rabbah ii nisuana sang Aroer dong ahi hi;

²⁶amate ngam sia Heshbon panin Ramath Mizpeh le Betonim dong, Mahanaim pan Lodebar ngamngi dongin kithung hi.

²⁷Jordan Kuam sungah Beth Haram, Bethnimrah, Sukkoth, le Zaphon, Heshbon kumpipa Sihon ii kumpi ngam a om lai teng ahi hi. Amate ii nitumna sang ngamngi sia Jordan ngun hi a, saksang ah Galilee Tuili dong hi to hi.

²⁸Hite sia Gad nam innkuante tan tu a kipia khuapite le khuate ahi hi.

²⁹Moses in Manasseh nam a lang ii innkuante tan tu in ngamkhen khat a piaksa hi.

³⁰Amate ngam sia Mahanaim dong kithung a, Bashan theampo huam hi — Bashan kumpipa Og ii kumpi ngam bup le Bashan sungah Jair khuano 60 teng ahi hi.

³¹Bashan kumpipa Og ii kumpi ngamsung khuapi thupibel te Astaroth le Edrei, le Gilead ngam khenlang zongh tua ii sungah kihel hi. Hite theampo sia Manasseh tapa Machir ii suan innkuan te ii lang atu a kipia ahi hi.

³²Tuasia Jericho le Jordan nisuana sang ngam le lei teng Moses ii Moab zaangtam ah a om lai in a khensakna bang ahi hi.

³³Ahihang Moses in Levi nam sia leitang a pia bua hi. Israel ii TOPA Pathian tungah a piak biakpiaknate sung pan tel khat amate ii neisa ahi sia ama sonsa hi.