Read Siyin Chin Joshua 16 Bible Online

Joshua 16 - Siyin Chin bible

Joshua 16

¹Joseph suan le paalte a kipia ngam le lei ii thangsang ngamngi sia Jericho hui Jordan panin kipan a, Jericho cikte ii nisuana sangah pai in sennealngam sung sun hi. Jericho pan Bethel dong mualtung ngam ah paito hi.

²Bethel pan a ngamngi sia Luz ah pai a, Ataroth Addar, Archit te teenna kaantan hi.

³Tua zawkciang nitumna Japhlet te ii ngam ah pai a, Beth Horon Nuainung ngam dong pai hi. Tua mun panin Gezer ah paisuakin tuaciang Mediterranean Tuipi ah tawp hi.

⁴Joseph ii suan le paalte Ephraim nam le nitumna Manasseh namte in hi ngam sia amate ii neisa in saang uh hi.

⁵Ephraim innkuante ii ngam sia hisia ahi hi: a ngamngi paizia sia, Ataroth Addar pan nisuana sangah Beth Horon Tungnung ah,

⁶tua mun panin Mediterranean Tuipi dong ahi hi. Michmethath sia a saksang ah om hi. Tua ii nisuana sangah ngamngi sia Taanath Shiloh sangah koai a, tuasia kaantan in nisuana sang Janoah dong paitan hi.

⁷Tua zawkciang paisuk a Janoah pan Ataroth le Naarah ah, Jericho pha in Jordan ah tawp hi.

⁸Ngamngi sia Tappuah pan nitumna sang Kanah lui ah pai in Mediterranean Tuipi ah tawp hi. Hi leitang sia Ephraim nam innkuante tan tu in kipia a,

⁹Manasseh ngamngite ii sungsang a om khuate le khuano pawlkhat taw kopin Ephraim te kipia khawm hi.

¹⁰Ahihang amate in Canaan mi Gezer a teangte sia notkeak ngawl ahikom Canaan mite sia Ephraim mite sungah tu ni dong teang khawm uh hi, ahihang amate sia salte bangin na kiseamsak hi.