Read Siyin Chin Joshua 18 Bible Online

Joshua 18 - Siyin Chin bible

Joshua 18

¹Ngam a zawthal zawk uh ciang Israel taangpi bup sia Shiloh ah kikhawm in, TOPA ompuina Puanbuk sa uh hi.

²Amate tel saan tu leitang a piak ngawl lai Israel mite nam sali om lai hi.

³Tua ahikom Joshua in Israel te mun ah, “TOPA, na taanghpupite ii Pathian ii hong piaksa ngam le lei sia va pai in na laak uh ma in bang tanvei ngak tu nu ziam?

⁴Noma nam sim panin mihing thum veu hong pia tavun. Ngam bup sungah ka vaksak kawkoai tu a, amate ii neisa tu in a dei uh ngam le lei ii ngamlim ka suaisak tu hi. Tua zawkciang amate kei kungah hong heak kik tu hi.

⁵A ngam sia khen sali kisua tu hi; Judah sia thangsang a ngam sungah om tu a, Joseph sia saksang a ngam sungah om tu hi.

⁶Hi ngam khen salite ii thu hong at tavun a, ka kungah hong paipui tavun. Tuasia ciang laimee sawkin TOPA ih Pathian tungah no atu in thu ka dongh tu hi.

⁷Levi te ahile no a dangte bangin leitang tel a saang buatu hi, banghang ziam cile amate tel sia TOPA ii thiampi a sepna ahi hi. Tuaciang Gad, Reuben le Nisuana Manasseh namte in, TOPA naseampa Moses ii Jordan nisuana ngam a piaksa sia nga zo hi.”

⁸Tua pasalte ngamlim suai tu in a pai ciang, Joshua in hi bangin thupia hi: “Ngamsung theampo ah va pai tavun a, ngamlim na suai zawk uh ciang ka kungah hong cia kik tavun. Tuaciang hi lai Shiloh ah TOPA kong dongh tu a, no atu in laimee ka sawk tu hi.”

⁹Tua ahikom pasalte sia ngamsung mun theampo ah vak a, khen sali in a khenna lai taw at in, khua om teng min zong ngual uh hi. Tua zawkciang amate sia Shiloh ngiaphual, Joshua kungah heak kik uh hi.

¹⁰Joshua in amate atu laimee sawk in TOPA dongh hi, a taanglai Israel namte khat sim tungah leitang khen khat tek pia hi.

¹¹Benjamin nam sung innkuan te ii neisa ngam sia a khatna in kipia hi. Amate ngam sia Judah le Joseph namte ii kilaklaw ah om hi.

¹²Saksang ah a ngamngi sia Jordan panin kipan a Jericho saksang munkhamna ah paito a, mualtung ngam nitumna sang kaantan in Bethaven sennealngam dong ahi hi.

¹³Ngamngi sia tua mun pan thangsang munkhamna ah paisuk a, Luz (Bethel zongh kici) pangh ah, tua zawkciang Beth Horon Nuainung ii thangsang mual tungah a om Ataroth Addar dong paisuk hi.

¹⁴Ngamngi sia tua mun pan mundang khat ah pai a, hi mual ii nitumna pangh panin thang sangah kiheak in, Judah nam ii neisa Kiriath Baal (ahibuale Kiriath Jearim) dong ahi hi. Hi sia nitumna sang ngamngi hi.

¹⁵Thangsang ngamngi sia Kiriath Jearim ngammong panin kipan a Nephtoah ciktui sun hi.

¹⁶Tua mun pan paisuk a, Rephaim Kuam saksang mong Hinnom Kuam etsuk theina mualpeang ah paisuk hi. Tua mun pan Hinnom Kuam kaantan in thangsang ah paisuk a, Jebus mualbawk ii thangsang Enrogel sang sun hi.

¹⁷Tua mun panin saksang ah kiheak in Enshemesh sangah, tuaciang Adumim Mualciangh ii langkhat Geliloth ah paitan hi. Ngamngi sia Bohan Suangphu (Bohan sia Reuben ii tapa khat hi) ah paisuk hi,

¹⁸tuaciang Jordan Kuam a kimu suk thei mualbawk saksia ah kaantan hi. Tua mun pan mualkuam sungah paisuk in,

¹⁹Beth Hoglah mualbawk saksang kaantan in pai a, Jordan Ngun ii tumna mun Tuipi Thi saksang ah tawp hi. Hisia sia a thangsang ngamngi hi.

²⁰Jordan sia nisuana ngamngi hi. Hiteng sia Benjamin nam innkuante nga tu ngam ii ngamngite ahi hi.

²¹Benjamin nam innkuante ii a nga khuapite sia Jericho, Beth Hoglah, Emek Keziz,

²²Beth Arabah, Zemaraim, Bethel,

²³Avvim, Parah, Ophrah,

²⁴Chepharammoni, Ophni, le Geba hi a; khuapi sawm le nii le a kiim a khuate zongh ahi hi.

²⁵A dang khuapite sia Gibeon, Ramah, Beeroth,

²⁶Mizpah, Chephirah, Mozah,

²⁷Rekem, Irpeel, Taralah,

²⁸Zela, Haeleph, Jebus (ahibuale Jerusalem) Gibeah le Kiriath Jearim hi a: khuapi sawm le li le a kiim a om khuate taw ahi hi. Hi ngam sia Benjamin nam innkuante ii nga ngam ahi hi.