Read Siyin Chin Joshua 2 Bible Online

Joshua 2 - Siyin Chin bible

Joshua 2

¹Tua zawkciang Joshua in thudawpkute nii sia Acacia ngiaphual panin paisak a, Canaan ngam, a tuanin Jericho khuapi vilku tu in thupia hi. Amate ngeal sia khuapi sung hong thet uh ciangin pumpi kizuak numei Rahab ii inn ah zan taam uh hi.

²Jericho khua kumpipa in ngal vil tu Israel mi pawlkhat tua zanin hong pai hi ci in za hi,

³tua ahikom ama in Rahab tungah thu puak a: “Na inn ah hong tung mite in ih ngam bup hong enkuu tu in hong pai hi! Amate hong pusua ta'n!” ci hi.

⁴“Mihing pawlkhat ahile ka inn ah hong pai peu hi, ahihang amate sia koisung pan hong pai ziam ka he bua hi. Khuapi kongpi a kikha ma nitum hunin amate heak kik zo hi. Amate zot natu kan se ngawl ka hi hang amate nung pan del memeang le uhte pha thei lai tu nu hi,” ci hi. (Tu in Rahab in hi thukankute nii sia a innkhum tungah huankhau kuung pawlkhat a koi te ii nuai ah seal hi.)

⁷Kumpipa mite in khuapi nusia a, tua zawkciang kongpi sia kikhak hi. Lamziikpi ii Jordan ngun a kaanna mun dong amate in Israel thudawpkute zong uh hi.

⁸Thudawpkute zan a lup ma in Rahab sia innkhum tungah kaato a,

⁹hi bangin ci hi; “TOPA in hi ngam sia no hong pia zo hi ci in ka he hi. Ngamsung mite khat simin no hong kiita vadil hi.

¹⁰TOPA in Egypt ngam na nusiat uh ciangin na mai a om San Tuipi sia kangsak ci in ka za uh hi. Jordan nisuana sang Amor te ii kumpite nii Sihon le Og na thalup uh zongh ka za uh hi.

¹¹Ka zaak uh po ciang ka lau uh hi; no hu in ka thin letna teng ka bosua uh hi. TOPA na Pathian sia vantung le hi lai leitung ii Pathian ahi hi.

¹²No tungah kong dik bangin ka innkuanpui te tungah dikna taw nong ngamtat natu in ama min taw hong kiciam tavun a, no kong muan thei natu in lim khat po hong pia tavun.

¹³Ka pa le ka nu, ka suapuipate ka suapuinute le a innkuanpui theampo nong suataksak natu kamciam hong pia tavun. Ko hong kithatlumsak heak vun!”

¹⁴Tua mite in ama tungah, “Koma pau bangin ka ngamta bua uh le Pathian in koma nuntakna hong la tahen! Koma ngamtatna teng kuama munah na son bua nale TOPA in hi ngam hong piak ciangin pha takin kong vawt tu uh hi ci in kamciam kong pia uh hi,” ci uh hi.

¹⁵Rahab sia khuapi luphung pang sungah inn vawtin teang ahi bangma ama in pasal te nii khauzeen taw kongvang no panin khiasuk hi.

¹⁶“Mual tung ngam sang zuan tavun, tua ahi bua na po le kumpipa mihingte in hong mu tu hi. Tua munah amate ii hong heak kik dong ni thum sung buu tavun. Tuasia zawkciang na lampi na tawn thei kik tu uh hi” ci hi.

¹⁷Pasalte in ama munah, “Kamciam nong vawtsak teng sia kholet tu khu hi. Hi bangin na ngamtat kul tu hi.

¹⁸Na ngam uh kong sim uh ciang khauhual san hisia khitin nong khiaksukna kongvang no panin kaaisuksak in. Na pa na nu le na suapuite na pa innkuanpuite theampo na inn sungah khawm siat tu ni hi.

¹⁹Khat po doipua ah a pusuak le ama ii thina sia ama ii khialna hi tu a, ko taw kisai ngawl tu hi; ahihang na inn sungah om khat pawpo sia bang khat po a kitawksak ahile ko khialna hi tu hi.

²⁰Ahizong ko ii ngamtatna sia khat po tungah na son a, ahile kamciam pia a nong sawl sia len ngawl tu khu hi.”

²¹Numei in tua thu lungkim in amate a paisak hi. Amate pai zawkciang numei nu in khauhual san khat a kongvang no panin a kaai suk tu in khit hi.

²²Thukankute mual kawm ah pai in buu uh hi. Kumpipa mite in amate sia ni thum tangciing mun theampo ah zong uh hi, ahihang mu ngawl ahikom amate Jericho khua ah heak kik uh hi.

²³Tua zawkciang thudawpkute nii sia mual tung pan hong tuaksuk uh a, ngun kaantan in Joshua kungah a heak kik uh hi. Ama tungah amate in thupiang theampo son uh hi,

²⁴tuasia zawkciang, “TOPA in ngam buppi sia ei hong pia zo hi ci in um khu hi. Tua munah a om mipi theampo sia ei hong kiita vadil hi,” ci uh hi.