Read Siyin Chin Joshua 24 Bible Online

Joshua 24 - Siyin Chin bible

Joshua 24

¹Joshua in Israel nam teng theampo Shechem ah khawmtua hi. -Ama in upate, lampuite, thukhente, Israel uliante sam a, Pathian ompuina munah hong pai tek uh hi.

²Joshua in mipite theampo tungah, “TOPA Israel te ii Pathian ii a ci sia hi teng hi: ‘Khuangeipi hun lai in noma taanghpupite sia Euphrates ngun langkhat ah teang a, pathian dang bia uh hi. Tua taanghpupite sung pan khat sia Terah hi a, Abraham le Nahor ii pa ahi hi.

³Tuaciang noma ii taanghpupi Abraham ka la a, Euphrates ngunngal ngam pan Canaan ngam buppi kaantan in ka paipui hi. Suan le paal tam mama ka pia hi. Ama Isaac ka pia a,

⁴tuaciang Isaac tungah Jacob le Esau ka pia hi. Esau tungah a neisa tu in Edom mualtung ngam ka pia a, ahihang na taanghpupi uh Jacob le a tate ahile Egypt ah paisuk hi.

⁵A zawkciang Moses le Aaron ka paisak a, Egypt tungah ngimna lianpi ka pia hi. Ahihang no sia kong pusua pui hi.

⁶Egypt panin na taanghpupite uh ka pusua a, tuaciang Egypt te in siphu ngalleang le siphu ngalkapte taw del uh hi. Ahihang na taanghpupite uh San Tuipi a thet uh ciang,

⁷amate au in kei tungah hu hong ngen uh hi, tuasia ciang amate le Egypt te kilaklaw ah khua ka zingsak hi. Egypt te tungah tuipi ka kihualsak a, amate tuitaa siat hi. Egypt tungah ka vawt ka sep teng na he uh hi. “ ‘Sennealngam sungah khuangei ma na teang uh hi.

⁸Tua zawkciang Jordan ngun ii nisuana sang a om Amor te ngam ah kong paipui hi. Amate in no hong do ahihang amate kong zosak hi. Amate ngam la in, maisang na manaw uh ciang, amate ka mon hi.

⁹Tua zawkciang Moab kumpi pa, Zippor ii tapa Balak in no hong do hi. Ama in Beor tapa Balaam samin no hong haamsiat tu in sawl hi.

¹⁰Ahihang Balaam ii kam ka nangai bua hi, tua ahikom ama in no thupha hong pia hi, tuabangin Balak khut sung pan kong suatak hi.

¹¹Jordan ngun kaantan in, Jericho khua theng nu hi. Jericho mite in Amor te, Periz te, Canaan te, Hit te, Girgash te, Hiv te le Jebus te ii hong do bangma in no hong do hi. Ahihang amate tung theampo ah zawna kong pia hi.

¹²Maisang na manaw uh ciang Amor kumpipa te nii ka nawkeak natu in amate nasia takin ka lausak hi. No ma namsau te le thal te hang hi ngawl hi.

¹³Na thaw ngeingawl uh leitang kong pia a, na saat ngawl uh khuapite kong pia hi. Tu in note tua munah teangin noma suan ngawl sapitkungte pan sapitngate le na ciin ngawl uh olive kungte pan olive thaute na ne uh hi.’ ”

¹⁴“Tua ahiciang, tu in, TOPA zatak vawt vun a, thintak le thumaanna taw a na seam vun,” ci in Joshua in a thu son zom a, “Mesopotamia le Egypt a na taanghpupite ii biak pathiante vawk vun, TOPA atu bek seam vun.

¹⁵Ama na, na seam nuam bua uh le, tu ni in khensat vun, akua atu seam tu nu ziam, ih taanghpupite ii Mesopotamia ah a biak pathiante atu ziam maw, tu laitak na teenna leitang a nei Amor pathiante atu ziam? Ka innkuan puite le kei ka hi le TOPA atu ka seam tu uh hi.”

¹⁶Mipi te in “ko TOPA nusia in pathian dangte na seam ngeingawl tu khu hi!

¹⁷TOPA ih Pathian in ih pate le ei sia Egypt ngam saltanna pan hong pusuapui a, nalamdang lakna a vawtte ih mu hi. Ih paina po ah ih kaantan sa minamte khut sung panin hong keamcing hi.

¹⁸Hi ngam sungah maisang nawk in ih pai ciang hi munah a teang Amor te a vekpi in TOPA in hong nawkeaksak hi. Tua ahikom ko zongh TOPA na seam tu khu hi; ama ih Pathian hi,” ci in zo kik hi.

¹⁹Joshua in mipite tungah, “Ahihang TOPA na seam zo ngawl tha tu nu hi. Ama sia a thiangtho Pathian hi a, ama in na mawnate uh hong maisak ngawl tu hi. Ama in ama a demte kuama dual ngawl hi,

²⁰Tuaciang ngamdang pathiante ii na seam tu in ama na nusia uh le ama in note hong langpan tu a, daan hong pia tu hi. Nidangin no tungah hong dik hikale ama in note hong mon tu hi,” ci hi.

²¹Mipite in Joshua munah, “Hi ngawl hi! TOPA na seam tu khu hi,” ci uh hi.

²²Joshua in amate munah, “TOPA na seam tu a, na teal huvau in no mama a tetti hi tu nu hi,” a ci ciang, “Hi hi, koma tetti hi khu hi,” a ci uh hi.

²³“Tua ahiciang ngamdangte pathian na kep uhte vawk vun, tuaciang TOPA Israel te ii Pathian tungah na thumaanna kamkho pia vun,” ci in ngen hi.

²⁴Tuasia ciang Mipite in Joshua munah, “TOPA ih Pathian naseam tu khu hi. A thu piakte ni tu khu hi,” ci uh hi.

²⁵Tua ahikom Joshua in tua ni in mipite atu thuciamna khat vawt a, Shechem ah thukhamte le ngeina zui tute pia hi.

²⁶Joshua in hi thupiakna te Pathian Thukham laibu sungah at hi. Tua zawkciang ama in suangtum pui khat la in, TOPA biakna mun oak thingkung nuai khat ah phut hi.

²⁷Mipite theampo tungah ama in, “Hi suang sia ih tetti hi tu hi. TOPA ii ei tungah hong pau kammal theampo tuasia in za siat zo hi. Tua ahikom tuasia in note ii lang ah tetti hi tu a, TOPA na langpan ngawl natu hi tu hi.

²⁸Tua zawkciang Joshua in mipite ciasak a, mi theampo in a neisa ngam le lei ah heak kik uh hi.

²⁹Tuasia zawkciang Nun ii tapa TOPA naseampa Joshua sia kum za le kum sawm a phak ciang thi hi.

³⁰Ama sia ama ii neisa leitang, Ephraim mualtung ngam, Gaash Mual saksang Timnath Serah ah kiphum hi.

³¹Joshua nuntak lai teng Israel mite in TOPA na seam uh hi, tuaciang ama thi zawkciang zong, TOPA ii Israel atu a sep a vawt theampo a mu lampuite nuntak lai teng tuabang ma na a sepna zom suak uh hi.

³²Egypt pan Israel mite ii a paipui uh Joseph luang sia Shechem ii pa Hamor tapate tung pan ngunntang zakhat taw Jacob leisa leitang no khat sung Shechem ah kiphum hi. Hi leitang sia Joseph suante in lua hi.

³³Aaron tapa Eleazar thi a, Ephraim mualtung ngam ah a om, a tapa Phinehas tungah a kipia Gibeah khua ah kiphum hi.