Read Siyin Chin Joshua 6 Bible Online

Joshua 6 - Siyin Chin bible

Joshua 6

¹Israel te a tum thei ngawl natu in Jericho khua kongpi kikhak in, kicing hi. Khuapi sungah kitum thei ngawl kipusuak thei ngawl hi.

²TOPA in Joshua tungah, “Jericho khua sia a kumpipa le a ngalhang ngalkap theampo taw kopin na khut sungah koi zo khi hi.

³Nang le na ngalkapte khuapi kiimkot ah ni khat in khatvei veu ni luk sung pai tu nu hi.

⁴Thiampi sali sia lemle khat tek toai in Thuciamna Thingkuang mai ah pai tu hi. A ni sali ni ciangin nang le na ngalkapte sia khuapi kiimkot salivei pai tu nu hi, tuasia laitak thiampite in lemle tum tu uh hi.

⁵Tua zawkciang, amate in lemle aw a sau in khatvei muut tu hi. Tuasia na zaak po ciang pasalte a vekpi in a nging tak au khat sua tu uh a, tuasia ciang khuapi uumna luphungte cimhtham tu hi. Ngalkap hon bup sia a taangtan in khuapi sungah tum tu uh hi,” ci hi.

⁶Joshua in thiampite sam a, amate tungah, “Thuciamna Thingkuang la vun a, no sung pan sali sia lemle khat tek toai in a mai ah pai vun,” ci hi.

⁷Tua zawkciang a mite khuapi kiimkot ah a pai natu thupia hi, a cing ngalkap madawk pawlte sia TOPA Thuciamna Thingkuang mai ah paisak hi.

⁸Tua ahikom, Joshua ii thupiak sa bangma in ngalkap madawk pawlte sia lemle tum thiampite ii mai ah kipaisak hi. Hite ii nung panin Thuciamna Thingkuang a pua thiampite kipaisak a, tuate ii nung pan ngalkap nungdal pawl in zui uh hi. Hi hunsung bup sia lemle aw nging hi.

¹⁰Ahihang Joshua in a mite au ngawl natu in thupia hi, thu a piak mateng kammal khat zongh a pau ngawl natu in tho hi.

¹¹Tua ahikom ama in hi mipawlte sia Thuciamna Thingkuang pua in khuapi khatvei a kiimveal natu sawl hi. Tua zawkciang amate ngiaphual ah hong cia kik uh a, tua munah zan ngiak uh hi.

¹²Joshua sia a zing ciang zingtuungin tho a, thiampite le ngalkapte sia a nii veina khuapi kiimkot ah a zeini a pai uh bang tatakin pai uh hi: a masa in ngalkap madawk pawl teng, a zomin lemle sali a tum thiampite; tua zom ah Thuciamna Thingkuang a pua thiampite; a khakbel in nungdal ngalkapte pai uh hi. Hi hun sung teng lemle aw nging tan hi.

¹⁴Hi a ni nii ni in amate sia khuapi kiimkot khatvei pai kik in, ngiaphual zuan kik uh hi. Ni luk sung hi bang veu in vawt uh hi.

¹⁵Amate sia a ni sali ni khuavak po ciang tho in khuapi kiimkot ah salivei tuabang ma in hong pai uh hi — tua ni bekma in khuapi salivei kiimkot in pai hi.

¹⁶A salivei a kiimkotna, thiampite in lemle tum tu in a kipat ciang, Joshua in a mite a au keak natu thupia a, “TOPA in khuapi sia no hong pia zo hi!

¹⁷Khuapi le a sungah a om theampo sia, TOPA tungah piakkhiatna khat bangin kilalcipsak siat tu hi. Numei pumpi kizuak Rahab le a innkuanpuite bek kikhoaikhe tu hi, banghang ziam cile ama in ih thudawpkute hong sealsak hi.

¹⁸Ahizong a kisusia tu nate khat zongh la thei ngawl tu nu hi; tuabang na ngamta uh le ngimna le lalna Israel te ngiaphual ah tungsak tu nu hi.

¹⁹Ngunn, khamh, taau ahi buale thik taw a kivawt na theampo sia TOPA atu in kikoituam hi. Tuabangte sia TOPA sum kholna ah kikoi tu hi,” ci hi.

²⁰Tua ahikom thiampite in lemle tum hi. Mipite in tuasia a zaak poma ciang nging takin au uh a, tuaciang luphung pangte cimhtham hi. Tuaciang ngalkap hon bup sia a maisan tek mual tungah kaato in khuapi sungah tum a, tua khuapi la uh hi.

²¹A namsau uh taw khuapi sung a om mi theampo, nupi, pasal, a moi, a haam thatlum siat uh hi. Amate in khui, tuu le laa te zongh thatlum siat uh hi.

²²Joshua in thudawpku in a paisak te nii sam a, “Pumpi zuak numei nu inn sungah tum tavun a kamciam na piaksa uh bangma, ama le a innkuanpuite hong pusua tavun,” ci hi.

²³Tua ahiciang amate in Rahab sia a pa, a nu, a suapui pate le a innkuanpui dang teng taw hong pusua uh hi. Amate in tua innkuante le a silate dongin a vekpi la in Israel te ngiaphual nai ngam muanna khat ah koi uh hi.

²⁴Tua zawkciang amate in khuapi sia a sung a om theampo taw cip in haltham a, khamh, ngunn, taau le thik taw a kivawt vanhte ahile hal ngawl hi, tuate amate in la in TOPA sum kholna ah koi uh hi.

²⁵Joshua in pumpi zuak Rahab le a mealheakte sia khoaikhe hi, banghang ziam cile tua nu in Jericho khua ah a paisak thudawpkute nii phual hi. (Ama ii suan le paalte sia Israel ngam ah tu ni dongin teang hi.)

²⁶Tua hun laitakin Joshua in a ciliap huai kidop natu thupia hi: “Mihing khat pawpo Jericho khuapi saat kik tu in a hanciam sia Pathian haamsiat nuai ah om tu hi. A kuama po khuapi phungkawng a ciang sia in a tapa lianbel sia thisua tu hi. A kuama po kongpite a sa kik sia in a tapa nobel sia thisua tu hi.”

²⁷Tuabangin TOPA sia Joshua taw omkhawm a, ama ii minthanna sia ngam bup ah kizel hi.