Read Siyin Chin Joshua 9 Bible Online

Joshua 9 - Siyin Chin bible

Joshua 9

¹Israel te ngalzawnate Jordan nitumna sang kumpi theampo — mualte, mualpeangte le Mediterranean Tuipi vaal zaangtam theampo saksang Lebanon dong kihe hi; hite sia Hit, Amor, Canaan, Periz, Hiv le Jebus kumpipa te uk sung ngamte ahi uh hi.

²Amate teng kingawmtua in a kisawl ngalkapte taw Joshua le Israel te sim tu in hong pai uh hi.

³Ahihang Jericho le Ai khuate Joshua in bang law ci sia Hiv minam Gibeon mite in za uh hi,

⁴tuaciang amate in Joshua theam sawm uh hi. Amate pai in nguai an pawlkhat sia ip sia sa le, savun thawl a kiphaw sa sungah heang uh hi.

⁵Amate in puansia ngapkaai silhin phaw zazaan sa peangdapte bul uh hi. A anluum kente ko in ap hi.

⁶Tua zawkciang amate in Gilgal ngiaphual ah pai in Joshua le Israel mite mun ah, “Ngam khuala na pan hong pai khu hi. Ko taw kilemna kamciam kho khat nong vawt tu uh dei khu hi,” ci hi.

⁷Ahihang Israel te in, “A banghang peuma no taw kilemna kamciam kho khat vawt tu khu ziam? Note sia a nai no na ah a teangte po hi tha thei tu nu hi,” ci uh hi.

⁸Amate in Joshua mun ah, “Ko sia nangma ii nong sawl pawpo seam tu khu hi,” ci hi. Joshua in, “No a kuate nu ziam? Koisung pan hong pai nu ziam?” ci in dongh hi.

⁹Tuasia ciang amate in hi bangin son uh hi: “Topa awng, ko sia ngam khuala mama na khat pan hong pai khu hi, banghang ziam cile TOPA na Pathian huvau za khu hi. Egypt ngam a, a sep a vawt theampo ka za uh hi,

¹⁰Jordan ngam nisuana a teang Amor kumpipate nii: Hesbon kumpipa Sihon le Ashtaroth ah a teang Bashan kumpipa Og tungah a vawtna teng zongh ka za uh hi.

¹¹Koma lampuite le ka ngam sungah a teang mite theampo in no taw kimu tu in nguai an taw khualhaw in hong sawl hi. Noma ii sawl po seam a, kipawl thei natu kilemna kamciam kho khat vawtin hong sawl hi.

¹²Ka anluumte uh en vun. No taw kimu tu in tuate pua in inn pan ka pusua uh lai in lum lai hi. Ahihang en vun! Tu in kocip a ap zo liang hi.

¹³Hi savun thawlte ka dip uh lai in thak sitset lai hi, ahihang en le uhte! Tu in ekkeak zo hi. Ka puansilhte ka peangdapte lamkhuala hu in paat zo hi!” ci hi.

¹⁴Israel te in an pawlkhat amate tung pan saang hi, ahihang tua taw kisai in TOPA a dongh bua uh hi.

¹⁵Joshua in tua Gibeon mite taw kipawl thei natu kilemna kamciam kho khat vawt in, amate khoaikhe hi. Israel taangpi lampuite in tua kilemna thuciam kho sia a kholet natu kamciam pia uh hi.

¹⁶Kamciam kho a vawt zawk ni thum ni ciangin Israel te in hi mite sia a nainona ah a teangte hi takpi hi ci in phawk uh hi.

¹⁷Tua ahikom Israel te dingkhia in ni thum a pai zawkciang hi mite ii teenna khuapi ahi Gibeon, Chephirah, Beeroth, le Kiriath Jearim ah theng uh hi.

¹⁸Ahihang Israel te in amate that thei ngawl uh hi, banghang ziam cile Israel lampuite sia TOPA Israel te ii Pathian min suangin amate taw a ciliap huai kamciam kho khat vawt zo uh hi. Mipite theampo in lampuite tungah hi thu huvau in lungkim ngawlna a pau tek uh hi,

¹⁹ahihang amate in “TOPA Israel te ii Pathian min suangin amate taw ciliap huai kamciam ih pia zo hi. Tu in amate bangma kilaw thei ngawl hi.

²⁰Ih kamciam vawt hu in amate a nuntak kul tu hi; tuabangin ih hi buale Pathian in ei sia daan hong pia tu hi.

²¹Tua ahiciang nungta tahen, ahizong ei atu thing hong tomsak in tui hong toaisak tahen,” ci in zo hi. Tuasia lampuite ii ngaisut piakna ahi hi.

²²Joshua in thupia a, ama mai ah hong kipaipui Gibeon mite tungah “Hi sung teng ma a teang napi banghangin a khuala mama na ah ka teang uh ci in hong theam nu ziam?

²³Hi bangin na ngamtat uh hu in Pathian in no sia hong ningkhiin zo hi. Na mite uh sia sal hi tawntung tu a, ka Pathian biakna mun khat sia atu thingtom in tui toai tu nu hi,” ci hi.

²⁴Amate in, “Topa awng, hi bangin ka ngamtat uh sia TOPA na Pathian uh in a naseampa Moses tungah thupia zo a, ngam le lei buppi no hong pia in, a sung a teang mite sia maisang na mainawt uh kawmin thatlum siat tu ci thu maan takpi hi ci in ka tel uh hang hi. Tuabangin ngamta khu hi. Banghang ziam cile ko sia nasia takin lau khu hi; ka nuntakna atu mama in patau khu hi.

²⁵Tu in ko sia nangma thuneina nuai ah om khu hi; Tang na sak bangin ko tungah hong vawt ta'n,” ci in zo hi.

²⁶Tua ahikom Joshua in hi bangin vawt hi: ama in amate hung a, Israel te ii thalup tu a oai bua hi.

²⁷Ahihang tua hunin amate sia sal suaksak hi, TOPA biaknatau atu le Israel mite atu thing tomsakin tui toaisak hi. Tu ni dongin TOPA ii ama ih biak natu a tealsa mun pawpo ah amate in hi nasep seam tan uh hi.