Read Siyin Chin 2 Thessalonica te 1 Bible Online

2 Thessalonica te 1 - Siyin Chin bible

2 Thessalonica te 1

¹Paul, Silas le Timothy in — Ih Pa Pathian le Topa Jesus Christ neisa Thessalonica pawlpi mite tungah lai kong thaak uh hi:

²Ih Pa Pathian le Topa Jesus Christ in note tungah thuthiamna le thinnopna hong pia tahen.

³Suapuite awng, note atu in hun theampo ah Pathian ka pok uh kul hi. Tuabang ka ngamtat tu uh sia maan hi, banghang ziam cile na upna uh nasia khan mama a, tuaciang note khat sim ii midangte na itna uh lian vaial hi.

⁴Pathian ii pawlpite sungah no huvau ka kisuantaakna uh sia in hi thu hang ahi hi. Vawtsiatna le ngimna teng theampo na thuak uh kawm panin, thuak zawkna le upna na nei tan uh hu in a kisuangtaak ka hi uh hi.

⁵Tu a na thuakna teng in Pathian thukhen na sia thumaan a hina kilanghsak hi, tua in noma ii na ngimlaw uh ama Kumpi Ngam taw a kilawm hong suaksak tu hi,

⁶Pathian in a maan bangin seam tu hi: note hong thuaksakte tungah thuakna tungsak tu a,

⁷tuaciang no a thuakte le ko zongh nopsakna hong pia tu hi. Topa Jesus in ama ii a thahat vantunglalangte taw

⁸Pathian a nialte le Topa Jesus Lungdamna Thupha a zui nuam ngawlte daan pia tu in meikuang taw hong pai ciang ama in tuasia seam tu hi.

⁹Ama ii mihing theampo le a thu um mihingte tung pan minthanna le vaang piakna a nga tu in, tua Ni Topa hong pai ciang, Topa mai le vaanglet minthan na pan amate kikhen tu a, tawntung lalcipna daan thuak tu hi. Note zongh, ko ii kong son thute um zo na hi uh ciangin tua thu um te sungah na kihel tu uh hi.

¹¹Note atu in a tawntungin thu kong ngetsakna in hi thu hang ahi hi. A nungta tu in ama hong sap na nuntakna sungah a kiphu a kilawm hong suasak natu in, Pathian munah kong ngetsak uh hi. Ama in a vaangletna taw phat natu na deina theampo khuangkhimsak tahen a, upna taw nasepna hong taangtungsak tahen.

¹²Hi bangin ih Pathian le Topa Jesus Christ ii thuthiamna taw ih Topa Jesus min in, note tung pan minthanna saang tu a, note zongh in ama tung pan minthanna na saang tu uh hi.