Read Siyin Chin 2 Thessalonica te 3 Bible Online

2 Thessalonica te 3 - Siyin Chin bible

2 Thessalonica te 3

¹A khakbel in suapuite awng, Topa thu sia note sungah na saan bangma in, manlang takin a kizel natu le thasiana taw a kisaan thei tawntung natu in, kote atu thu hong ngetsak tavun.

²Mihing seksolte le misiate khut sung pan Pathian ii hong suataksak natu in thu hong ngetsak si tavun; banghang ziam cile mihing simin tua thu um ngawl hi.

³Ahihang Topa sia thumaan a, ama in note A Ngilopa kung pan hong keamcingin hong thahatsak tu hi.

⁴Note kungah kong son thute na zui uh bangma in zui paisuak tatak tu ci in note muanna thin kote sungah Topa in hong pia hi.

⁵Pathian hong itna le Christ ii hong piak thuak zawkna a thukzaw in na tel thei natu Topa in lam hong pui tahen.

⁶Suapuite awng, kong lamlak nate zui ngawl a, datham nuntakzia taw a nungta suapuite theampo kung panin na kikeam tavun ci in Topa Jesus Christ min taw thu kong pia uh hi.

⁷Ko ngamtat bang na ngamtat tu uh sia noma ma in na heak uh ahi hi. Note taw ka om uh lai in ko datham ngawl khu hi.

⁸Man piak ngawlin kuama tung pan huna saang ngawl khu hi. Tua taangin naseam a, diang khu hi; note khat po atu in supna zanna ka hi ngawl natu in a sun a zanin ka seam tan uh hi.

⁹Hi bangin ka hi uh sia, ngual ii hu tu le et tu in, a kilawm ngawl ka hi uh hang, ahi bua hi; nong ettee tu le nong zui tu in tuabangin ngamta ka hi uh hi.

¹⁰No taw ih om lai in, “Na a seam nuam ngawl peuma an nesak ngawl tu hi,” kong ci uh hi.

¹¹Hi bangin kong ci theina uh sia, no sungah mihing pawlkhat datham a, ngual nasepna kamkumh in, nawngkaisak tu ci simngawl sep dang nei ngawl ci in ka za uh hi.

¹²Topa Jesus Christ min taw hi mihingte tungah ahi tu bangin nungta tahen a, nasepna taw a nuntak natu thalaw tahen, ci in kidop natu thu ka pia uh hi.

¹³Ahihang suapuite awng, a pha sepna sia cimtak peuma heak vun.

¹⁴Hi laithak sungah kong son uh thute a zui ngawl tu khat po om tha tu hi. Tuabang ahile, ama sia ciamtee tavun a, na koithong lel vun, tua hile, ama a maizum tu hi.

¹⁵Ahihang ama na ngal vawt heak vun; tua hi ngawl zaw in, suapui khat bangin a kidop thei natu na hil vun.

¹⁶Eite thinnopna ii naak ahi Topa ama mama in, a tawntung le a nanam in, thinnopna hong pia tahen. Topa in note theampo taw hong omkhawm tahen.

¹⁷Paul in kong paupui hi ci in lai kong thaak sia keima khut tatak taw ka at hi: Laithak ka at sim ka minthuna sia hisia ahi hi; lai ka atzia hi bang ahi hi.

¹⁸Ih Topa Jesus thuthiamna in note theampo taw hong om tahen.