Read Siyin Chin 1 Timothy 2 Bible Online

1 Timothy 2 - Siyin Chin bible

1 Timothy 2

¹Tuaciang a masa phitbel kong hanthot nopna panin, maangkaana, thungetna, hu ngetna le lungdamkona sia mihing theampo atu Pathian tungah na vawt vun;

²eite nuam takin kilem vadiam in om thei a, Pathian thasia in a kilawm ngamtatna taw ih nuntak thei natu in kumpite le a dang thu nei uliante atu zongh tuabangin na vawtsak natu kong thawn hi.

³Hi bangin a pha ih vawtte in Pathian ih Ngumpa lungkimsak hi,

⁴mihing khat sim ngupna nga a, thumaan thutak a heak tu sia Pathian in dei hi.

⁵Banghang ziam cile Pathian khat bek om a, Pathian le mihing hong kilemsak kik, mihing ahi Jesus Christ khat bek om hi.

⁶Ama in mihing nam theampo tat natu in, a nuntakna pia hi. Tua in a hun a cin ciang Pathian ii mihing khat sim ngupna a piak nopna thu a lakna hi a,

⁷tua thu hu in upna le thumaan thutak thangsak tu in, Gentile te ii sawltak khat le sya khat bangin hong kipuak hi. A leilot ka hi bua a; thumaan thutak son ka hi hi!

⁸Pawlpi sungah biakpiak simin, thin uukna le kinialna om ngawlin, a khut laamin thungen thei a, Pathian tungah a kipumpiak pasalte ii thu a nget tu ka dei hi.

⁹Numeite zongh a kiniamkhiak ngamtatna le puansilh kizepna ah a etlawm, a hoi ciaciangin khua ngaisutna a nei tu ka dei hi; sam khawng a lamdadang in vawtna taw ahizong, khamhte, keptangte le a manham nikteen puansilhte taw ahizong kizeam ngawlin,

¹⁰biakna kin numeite atu taw a kilawm ngamtat phate taw om tahen.

¹¹Numeite in thim khipkhep in om thei in, kiniam khiakna theampo sin tahen.

¹²Amate in pasalte tungah a hilcian tu ahizong, thu a nei natu ahizong, ka oai bua hi; amate thim khipkhep in om tahen.

¹³Banghang ziam cile Adam kibitphua masa a, tua zawkciang Eve kibitphua hi.

¹⁴Tuaciangin theam a thuak sia in Adam hi ngawl hi; theam thuak a, Pathian thukham a paltan sia in numei ahi hi.

¹⁵Ahihang, ama in upna, ki itna le thianthona sungah omdan thiamna taw zom suak pole numei sia ta a neina tungtawnin kingum tu hi.